Ɔnrɛhyɛ Nyamenle Baye Amaneɛnwunlɛ Avi Ɛkɛ

‘O Gyihova, menzu menvɛlɛ wɔ moalɛ ɔhɔdwu kenlenzu na wɔadie me? Anzɛɛ mendeɛdea nu kɛ, “Konle o! Konle o!” na wɔalie yɛ?’ (Habakɛke 1:2, 3) Ɛhye le Habakɛke mɔɔ ɛnee le sonlakpalɛ na Nyamenle anye die ɔ nwo la asɔneyɛlɛ. Asoo ye asɔneyɛlɛ ne kile kɛ ɛnee ɔnlɛ diedi ɔ? Ɔnle zɔ fee. Nyamenle maanle Habakɛke nyianle anwodozo kɛ ɔlɛ mekɛ mɔɔ ɔbamaa amaneɛnwunlɛ bo apɛ a.​—Habakɛke 2:2, 3.

Saa ɛdawɔ anzɛɛ wɔ kulovolɛ bie ɛlɛnwu amaneɛ a, ɔnyɛ se kɛ ɛbaha kɛ, ɔwɔ kɛ Nyamenle yɛ tɛnlabelɛ ne anwo debie ndɛndɛ. Noko Baebolo ne maa yɛ anwosesebɛ kɛ: “Gyihova ɛngyɛ ye ɛwɔkɛ nwo kɛ mɔɔ bie mɔ bu ye kɛ ɔkyɛ la, emomu ɔlɛ bɛ nwo abotane ɔluakɛ ɔngulo kɛ bɛsɛkye awie biala, emomu ɔkulo kɛ menli kɔsɔɔti nu bɛ nwo.”​—2 Pita 3:9.

KENLENZU A NYAMENLE BALI NWOLƐ GYIMA A?

Ɔnrɛhyɛ fee! Gyisɛse maanle ɔlale ali kɛ, awolɛndoazo bie banwu ninyɛne bie mɔ mɔɔ basisi la. Ɛnee ɛhye bayɛ mekɛ mɔɔ li ‘awieleɛ la anwo sɛkɛlɛneɛ.’ (Mateyu 24:3-42) Gyisɛse ngapezo ne mɔɔ ɛra nu ɛnɛ la kile kɛ ɔnrɛhyɛ Nyamenle balie alesama.a

Noko kɛzi Nyamenle bamaa amaneɛnwunlɛ ara awieleɛ ɛ? Mɔɔ Gyisɛse wɔ azɛlɛ ye azo la ɔmaanle ɔlale ali kɛ Nyamenle lɛ tumi ye alesama amaneɛnwunlɛ fi ɛkɛ. Ɛhye anwo neazo bie mɔ ɛne.

Esiane: Mɔɔ Gyisɛse nee ye ɛzoanvolɛma ne lua Galeli Nyevile ne azo la, anwoma kpole bie dule mɔɔ anrɛɛ ɔbutu bɛ ɛlɛne ne a. Noko Gyisɛse hilele kɛ ɔ nee ye Papa lɛ tumi wɔ abɔdeɛ zo. (Kɔlɔsaema 1:15, 16) Gyisɛse hanle ye sikalɛ kɛ: “Gyinla! Yɛ koonwu!” Duzu a zile a? “Anwoma ne ɛdulɛ ne hanle aze na ɔguale dii.”​—Maake 4:35-39.

Anwodolɛ: Ɛnee bɛze Gyisɛse kɛ ɔyɛ anyezinliravolɛma nee abuburama ayile. Eza ɔmaa menli mɔɔ mgbutike, kokobɛ nee ewule ngakyile wɔ bɛ nwo la te kpɔkɛ. “Na ɔyɛle bɛdabɛ mɔɔ bɛlɛnwu amaneɛ la kɔsɔɔti ayile.”​—Mateyu 4:23, 24; 8:16; 11:2-5.

Ɛhɔne: Gyisɛse vale tumi mɔɔ ye Papa vale maanle ye la lile gyima maanle aleɛ ekyi bie yɛle dɔɔnwo. Bɛyɛ nwolɛ kɛlɛtokɛ fane nwiɔ wɔ Baebolo ne anu kɛ ɔmaanle menli apenle dɔɔnwo aleɛ.​—Mateyu 14:14-21; 15:32-38.

Ewule: Menli nsa mɔɔ bɛyɛ bɛ nwo kɛlɛtokɛ kɛ Gyisɛse dwazole bɛ la maa yɛnwu ye kɛ Gyihova lɛ tumi ye ewule fi ɛkɛ ne bɔkɔɔ. Ɛnee menli ɛhye mɔ anu ko ɛwu ɛnyia kenle nna.​—Maake 5:35-42; Luku 7:11-16; Dwɔn 11:3-44.