Nwɔlɔra Neɛnleanu Nee Kenle Bie Edwɛkɛ Ɛhanlɛ​—Asoo Bɛmaa Yɛnwu Kenle Bie?

NWƆLƆRA NEƐNLEANU

Nwɔlɔra neɛnleanuma lɛ diedi kɛ nwɔlɔra ne mɔ, siane ne nee pelanet ne mɔ lɛ menli mɔɔ de azɛlɛ ye azo ɛbɛlabɔlɛ zo tumi wɔ adenle titili zo. Bɛkile kɛ, ɛleka mɔɔ nwɔlɔra, siane nee pelanet ne mɔ bɛahɔdɔ wɔ kenle mɔɔ bɛbawo awie la bahile ye subane nee ye kenle bie. Ɔwɔ nu kɛ nwɔlɔra neɛnleanu vi tete Babelɔnma amaamuo nu, noko ɔtɛdie duma wɔ ɛnɛ. Wɔ 2012, bɛbizebizale menli bie mɔ edwɛkɛ wɔ United States, saa ɛkyɛ menli ɛhye mɔ anu nsa a, bɛ nuhua ko die di kɛ “abɔdeɛ nwo nrɛlɛbɛ ekyi” wɔ ninyɛne mɔɔ nwɔlɔra neɛnleanuma yɛ la anu, yɛɛ bɛ nuhua ɛya ngyɛnu 10 hanle kɛ ɔle “abɔdeɛ nwo nrɛlɛbɛ.” Asoo ɔle nɔhalɛ? Kyɛkyɛ. Nea deɛmɔti.

• Pelanet yɛɛ nwɔlɔra ne mɔ ɛnlɛ tumi biala mɔɔ kola nyia menli nwo zo tumi kɛ mɔɔ nwɔlɔra neɛnleanuma kile la.

• Fane dɔɔnwo ne ala edwɛkɛ mɔɔ bɛka la ɛnvale debie kpɔtee bie anwo.

• Ɛnɛ, edwɛkɛ mɔɔ menli mɔɔ neɛnlea nwɔlɔra nu ka la gyi diedi mɔɔ ɛnee bɛlɛ ye wɔ tete ne kɛ pelanet ne mɔ bɔ azɛlɛ ne anwo mgbɔlɔka la azo. Nɔhalɛ ne a le kɛ, pelanet ne mɔ bɔ ewia ne anwo mgbɔlɔka emomu.

• Edwɛkɛ mɔɔ nwɔlɔra neɛnleanuma ngakyile ka ye wɔ sonla ko anwo la ɛnyia.

• Nwɔlɔra neɛnleanuma gyinla kenle mɔɔ bɛbava bɛawo awie la azo bɛfa ye bɛto ekpunli 12 anzɛɛ zodiac sɛkɛlɛneɛ ne ko abo. Ɔluakɛ ɛleka mɔɔ azɛlɛ ne la wɔ anwomanyunlu la ɛhakyi wɔ ɛvoya dɔɔnwo anu la ati, menli awolɛ kenle mɔɔ bɛkile a zodaic sɛkɛlɛneɛ ne mɔ gyi ɛkɛ ne maa la ɛnyia bieko.

Bɛkile kɛ zodiac sɛkɛlɛneɛ ne kola maa bɛnwu awie subane. Nɔhalɛ ne a le kɛ, menli mɔɔ bɛwole bɛ kenle ko la subane ɛnle ko; kenle mɔɔ bɛwole awie la nee ye subane ɛnlɛ abusuabɔlɛ biala. Kɛ anrɛɛ bɛbanwu awie kɛ mɔɔ ɔde la, nwɔlɔra neɛnleanuma gyinla ninyɛne bie mɔ azo bɔ bɛ ti anu ka ye nyɛleɛ nee ye subane nwo edwɛkɛ. Asoo ɛhye ɛmmaa bɛnnyia menli nwo adwenle ɛtane ɔ?

KENLE BIE EDWƐKƐ ƐHANLƐ

Ɔvi tete ne amuala menli kɔ menli mɔɔ ka kenle bie edwɛkɛ la ɛkɛ. Menli mɔɔ ka kenle bie edwɛkɛ la dua nane yɛɛ sonla kunlu ninyɛne anzɛɛ kɛzi akɔlɛ nyinli suso aleɛ la azo ka kenle bie edwɛkɛ. Bie mɔ noko dua ninyɛne mɔɔ wɔ tii nya zo yɛɛ kafe bo zo la azo bɛka kenle bie edwɛkɛ. Ɛnɛ bɛdua nzeleba, avile, daese nee ndenle fofolɛ zo “bɛka” awie mɔ kenle bie bɛkile bɛ. Asoo yɛbahola yɛava yɛ nwo yɛado menli ɛhye mɔ anwo zo amaa yɛanwu kenle bie edwɛkɛ ɔ? Kyɛkyɛ, ɔnle zɔ. Bɛmaa yɛzuzu ɛhye anwo.

Suzu kɛzi menli ɛhye mɔ anloa ɛnzɛ bɛ nwo la anwo. Saa menli ngakyile ka sonla ko anwo kenle bie edwɛkɛ a, mɔɔ bɛka la ɛnyia. Saa bɛluale adenle ko ne ala azo bɛyɛle zɔ bɔbɔ a, bɛnyia. Kɛ neazo la, saa awie biza menli nwiɔ mɔɔ ka kenle bie edwɛkɛ la edwɛkɛ ko ne ala a, anrɛɛ ɔwɔ kɛ mualɛ mɔɔ “bɛkenga” kaade ne a bɛnwu ye la yɛ ko. Noko fane dɔɔnwo ne ala ɔnyia.

Menli ɛnlɛ anwodozo wɔ ndenle mɔɔ menli mɔɔ ka kenle bie edwɛkɛ dua zo anzɛɛ adwenle mɔɔ bɛfa bɛyɛ bɛ gyima ne la anu bieko. Tendɛtiama ka kɛ nzeleba anzɛɛ avile ɛnle ninyɛne titili bie yɛɛ menli mɔɔ ka kenle bie edwɛkɛ la nea ahenle nyɛleɛ na bɛaha ye kenle bie edwɛkɛ bahile ye na tɛ nzeleba ne anzɛɛ avile ne a maa bɛnwu ye a. Kɛ neazo la, awie mɔɔ ɛbe wɔ kenle bie edwɛkɛhanlɛ nu la biza kpuya bie mɔ na ɔwie a yeanlea kɛzi ahenle bayɛ ye nyɛleɛ abua edwɛkɛ ne la kpalɛ, na yemɔ maa ɔnwu ahenle anwo edwɛkɛ. Akee ahenle mɔɔ ka kenle bie edwɛkɛ la ka kɛ ɔze ninyɛne bie mɔ mɔɔ ahenle adwenle ɛnle zo na yeha la amuala. Menli mɔɔ ka kenle bie edwɛkɛ la di awie mɔ adwenle zɛhae wie a, bɛdie ezukoa kpole bɛfi bɛ ɛkɛ.

MƆƆ BAEBOLO NE KA LA

Nwɔlɔra neɛnleanuma nee menli mɔɔ ka kenle bie edwɛkɛ la kile kɛ bɛhyehyɛ yɛ kenle bie bɛdo ɛkɛ dɛba. Asoo ɛhye le zɔ? Baebolo ne ka kile yɛ kɛ yɛlɛ adenle yɛsi mɔɔ yɛkulo kɛ yɛdie yɛdi na yɛyɛ la anwo kpɔkɛ na kpɔkɛ mɔɔ yɛbazi la baha yɛ kenle bie.​—Dwɔhyua 24:15.

Nyamenle azonvolɛ eza kpo ninyɛne ɛhye mɔ ɔluakɛ, Nyamenle kyi sunsum ɛtane nyɛleɛ biala. Yɛnwu edwɛkɛ ɛhye wɔ Baebolo ne anu kɛ: ‘Bɛ nuhua biala mmayɛ sunsum nu debie biala mɔɔ kile kɛ ɔbiza awie anwo edwɛkɛ, anzɛɛ ɔbɔ awie munzule, anzɛɛ ɔye ngonyia, anzɛɛ ɔkye awie mɔ sili, anzɛɛ ɔtendɛ sunsum ɛtane nloa azo, anzɛɛ ɔbɔ bayivolɛ ɛbɛla. Awie biala mɔɔ yɛ ninyɛne ɛhye mɔ la bɔ munzule wɔ Gyihovaa anyunlu.’​—Mɛla ne 18:10-12.