“Sonla Mɔɔ Asa Do La Banyia Nyilalɛ”

ƆVI tete ne amuala, ɛnee menli bɔ afɔle anzɛɛ ye ndoboa boa nɔhalɛ ɛzonlenlɛ. Yizilayɛma vale nane bɔle afɔle, yɛɛ bɛze Kilisienema noko kpalɛ kɛ bɛbɔ “ayɛlɛyelɛ afɔle.” Noko, afɔlebɔlɛ gyɛne wɔ ɛkɛ mɔɔ Nyamenle anye die nwo a. (Hib. 13:15, 16) Kɛ mɔɔ neazo ɛhye mɔ kile la, afɔlebɔlɛ ɛhye mɔ maa bɛnyia anyelielɛ nee nyilalɛ.

Nyamenle tete sonvolɛ Hana ɛnee kulo kɛ ɔnyia ralɛ, noko ɛnee ɔnwo. Ɔbɔle Gyihova ɛwɔkɛ wɔ asɔneyɛlɛ nu kɛ saa ɔmaa ɔwo ralɛ nrenyia a, ‘ɔbadu ye nee ye ɛbɛlabɔlɛ muala yeamaa Gyihova.’ (1 Sa. 1:10, 11) Nzinlii, Hana nrenzɛle na ɔwole ralɛ nrenyia mɔɔ bɛfɛlɛ ye Samoɛle. Mɔɔ Hana pɛle Samoɛle nyɛfonlɛ la, ɔ nee ye hɔle ndanlɛ sua ne anu kɛ mɔɔ ye ɛwɔkɛ ne se la. Gyihova yilale Hana wɔ ye tunwomaa sunsum ne anwo. Ɔholale ɔwole mralɛ nnu bieko, na Samoɛle rayɛle ngapezonli nee Baebolo kɛlɛvolɛ.—1 Sa. 2:21.

Kɛmɔ Hana nee Samoɛle yɛle la, Kilisienema noko ɛnyia nwolɛ adenle kɛ bɛbava bɛ ngoane bɛamaa bɛ Bɔvolɛ ne na bɛazonle ye. Eza kɛ mɔɔ Gyisɛse bɔle ɛwɔkɛ la, Gyihova bayila afɔle biala mɔɔ yɛbabɔ yɛazonle ye la azo.—Maake 10:28-30.

Wɔ ɛvoyia mɔɔ limoa la anu, ɛnee bɛze Kilisienenli raalɛ Dɔkase kpalɛ kɛ “ɛnee gyima kpalɛ ɛyi ye tɛkɛɛ yɛɛ ɔboa ehyiavolɛma”—ɔbɔle afɔle ɔboale awie mɔ. Noko, “ɔ nwo dole ye na ɔwule,” ɛhye maanle asafo ne lile nyane kpalɛ. Mɔɔ ɛdoavolɛma ne dele kɛ Pita ɛbikye ɛkɛ ne la, bɛbodole ye kɛ ɔrɛla ndɛndɛ. Nea kɛzi bɛ nye liele wɔ mekɛ mɔɔ Pita rale na ɔdwazole Dɔkase ɔvile ewule nu la—ɔdaye a ɛzoanvolɛ bie limoa dwazole ye mɔɔ bɛyɛ nwolɛ kɛlɛtokɛ a! (Gyi. 9:36-41) Nyamenle arɛle anvi afɔle mɔɔ Dɔkase bɔle la. (Hib. 6:10) Bɛhɛlɛ ye nyeleyɛlɛ nwo neazo kɛnlɛma ne wɔ Nyamenle Edwɛkɛ ne anu kɛ yɛzukoa.

Ɛzoanvolɛ Pɔɔlo noko nyianle mekɛ maanle awie mɔ vale yɛle neazo kɛnlɛma. Pɔɔlo kɛlɛ ɔ mediema Kilisienema mɔɔ wɔ Kɔlente la, ɔhanle kɛ: “Mame, mebavi fɛlɛkolilɛ nu meava me nwo ninyɛne nee me nwo amuala meamaa bɛ.” (2 Kɔl. 12:15) Pɔɔlo mumua ne nwunle kɛ saa awie tu ɔ nwo maa boa awie mɔ a ɔmaa ɔ kunlu dwo ɔ nwo—yɛɛ mɔɔ hyia kpalɛ la ɔmaa ɔnyia Gyihova nyilalɛ nee ɔ nyunlu ɛlolɛ.—Gyi. 20:24, 35.

Ɔda ali kɛ, saa yɛfa yɛ mekɛ nee anwosesebɛ yɛboa Belemgbunlililɛ gyima ne nee yɛ mediema diedima a, ɔmaa Gyihova anye die. Noko, ndenle gyɛne wɔ ɛkɛ mɔɔ yɛbahola yɛalua zo yɛaboa Belemgbunlililɛ edwɛkɛhanlɛ gyima ne ɔ? Ɛhɛe! Saa yɛye ɛlɔlɛ mɔɔ yɛda ye ali la yɛsie ahane a, yɛbahola yɛali Gyihova eni ɔlua ndoboa ɛyelɛ zo. Bɛfa bɛboa ewiade amuala edwɛkɛhanlɛ gyima ne mɔɔ edwɛkpatɛlɛvolɛma nee dahuu ɛzonlenlɛ gyima titilima gyɛne noko boka nwo la. Bieko, ndoboa mɔɔ yɛfi yɛ ɛhulolɛ nu yɛye la di yɛ mbuluku nee vidio ne mɔ mɔɔ bɛkile ɔ bo la anwo gyima, bɛfa bɛboa wɔ esiane mekɛ nu yɛɛ eza bɛfa bɛsi Belemgbunlililɛ Asalo fofolɛ. Yɛkola yɛnyia anwodozo kɛ “sonla mɔɔ asa do la banyia nyilalɛ.” Bieko, saa yɛfa yɛ anwonyia yɛmaa Gyihova a, ɛnee yɛlɛdi ye eni.—Mrɛ. 3:9; 22:9.

Kɛzi Bie Mɔ Ye Ndoboa Boa Ewiade Amuala Gyima Ne La

Ɛnɛ, menli dɔɔnwo ‘te ezukoa to ahane’ anzɛɛ fa ezukoa sie amaa bɛava bɛagua asafo ne ndoboa nlɛka mɔɔ bɛhɛlɛ nwolɛ “Ewiade Amuala Gyima” la anu. (1 Kɔl. 16:2) Siane biala, asafo ne mɔ fa ezukoa ɛhye nwa Gyihova Alasevolɛ ɔfese ne mɔɔ nea gyima ne azo wɔ bɛ maanle ne anu la. Ɛdawɔ noko ɛbahola wɔava wɔ ndoboa wɔanwa mɛla adenle zo ngyehyɛleɛ ne mɔɔ Gyihova Alasevolɛ fa di gyima wɔ wɔ maanle ne anu la. Amaa wɔanwu mɛla adenle zo ngyehyɛleɛ ne mɔɔ Gyihova Alasevolɛ fa di gyima wɔ wɔ maanle ne anu la, yɛsɛlɛ wɔ ɛ nee ɔfese ne ɛli ngitanwo. Ɛbanwu adelɛse ne wɔ www.jw.org azo. Ndoboa ngakyile mɔɔ ɛbahola wɔava wɔanwa la bie a le ɛhye mɔ:

NDOBOA

Ɛbahola wɔalua ɛlɛtɔlɔneke ninyɛne le kɛ debit kaade, credit kaade anzɛɛ mobile money transfer zo wɔaye ndoboa. Wɔ ɔfese bie mɔ anu, ɛbahola wɔalua jw.org anzɛɛ wɛbsaete gyɛne zo wɔaye ndoboa.
Ɛbahola wɔava ezukoa, agudeɛ, anzɛɛ wɔ agyadeɛ gyɛne wɔaboa. Kɛlɛ kɛlata to zo fa kile kɛ wɔva ezukoa ne anzɛɛ deɛ ne wɔhyɛ bɔkɔɔ.

NDOBOA MƆƆ NGYEHYƐLEƐ WƆ NWO

Ɛbahola wɔava ezukoa wɔaboa na wɔayɛ ngyehyɛleɛ kɛ saa ɛhyia nwo a bɛva bɛmaa wɔ.
Kɛlɛ kɛlata to zo fa kile kɛ ngyehyɛleɛ wɔ ndoboa ne anwo.

NDENLE GYƐNE MƆƆ ƐBAHOLA WƆALUA ZO WƆAYE NDOBOA

Ndenle gyɛne mɔɔ ɛbahola wɔalua zo wɔaye ndoboa wɔaboa ewiade amuala Belemgbunlililɛ gyima ne la bie mɔ a bɛhile ye wɔ ɔ bo ɛke la. Yɛsɛlɛ wɔ, ɛ nee ɔfese ne mɔɔ nea gyima ne azo wɔ wɔ maanle ne anu la ɛzuzu nwo kolaa na wɔanwu mɔɔ ɔwɔ kɛ ɛyɛ la. Asolo maanle biala anu mɛla nee adwule nwo ngyehyɛleɛ, yemɔti biza awie mɔɔ ɔze adwule nee mɛla ne anu la kolaa na wɔanwu adenle kpalɛ mɔɔ ɛbalua zo wɔaye ndoboa la.

Insurance: Awie bahola ayɛ ngyehyɛleɛ yeamaa bɛadua ye insurance anzɛɛ pɛnhyɛne ezukoa bɛamaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la.

Bange Ezukoa: Awie bahola ayɛ ngyehyɛleɛ yeamaa bava ye ezukoa mɔɔ wɔ bange, anzɛɛ ɔkɔ pɛnhyɛne anzɛɛ ɔwu a bɛbadua bɛamaa ye la bɛamaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la, kɛmɔ bange ezukoa nwo ngyehyɛleɛ mɔɔ wɔ bɛ ɛkɛ ne de la.

Kyɛfoa Wɔ Gyima Nu Nee Ezukoa Mɔɔ Bɛfa Bɛbɔ Bosea: Awie bahola amaa bɛadua ye kyɛfoa mɔɔ ɔnyia ɔfi gyima bie anu anzɛɛ bosea mɔɔ ɔwɔ kɛ bɛtua bɛmaa ye la bɛamaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la. Eza ɔbahola yeahɛlɛ kɛ saa ɔwu a bɛdua bɛmaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la.

Azua Nee Azɛlɛ: Awie bahola ava ye sua anzɛɛ azɛlɛ mɔɔ bɛbahola bɛadɔne ye la yeamaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la. Eza ɔbahola yeayɛ ngyehyɛleɛ kɛ saa ɔwu a bɛva ye sua mɔɔ ɔde nu la bɛmaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la.

Agyapadeɛ: Awie bahola ayɛ ngɛlata ahile kɛ saa ɔwu a bɛva ye agyapadeɛ anzɛɛ ye ezukoa bɛmaa mɛla adenle zo ngyehyɛleɛ bie mɔɔ Gyihova Alasevolɛ fa di gyima la. Bie a ngyehyɛleɛ ɛhye ɛnrɛmaa ahenle mɔɔ ɛva agyapadeɛ ne ɛhyɛ la ɛnrɛdua adwule biala.

Kɛ mɔɔ edwɛkɛ “nyeleyɛlɛ ngyehyɛleɛ” kile la, ɔwɔ kɛ awie mɔɔ kulo kɛ ɔdua ndenle ɛhye mɔ bie azo ye ndoboa la yɛ nwolɛ ngyehyɛleɛ. Amaa bɛaboa menli mɔɔ bɛkulo kɛ bɛdua nyeleyɛlɛ zo bɛboa Gyihova Alasevolɛ ewiade amuala gyima ne la bɛyɛ brohyua bie mɔɔ ɔ ti ne se Charitable Planning to Benefit Kingdom Service Worldwide la. Bɛyɛ ye wɔ Nrelenza nee Spanish nu, na ɔkile ndenle ngakyile mɔɔ ɛkola ɛdua zo ɛfa ahyɛlɛdeɛ ɛmaa kɛkala anzɛɛ kenle bie wɔ wɔ ewule nzi la. Bie a edwɛkɛ mɔɔ wɔ brohyua ɛhye anu la amuala ɛnrɛvale ɛ nwo ɔlua kɛzi adwulelielɛ nwo mɛla anzɛɛ mɛla gyɛne mɔɔ wɔ wɔ maanle ne anu de la ati. Nyeleyɛlɛ ngyehyɛleɛ ɛhye mɔ mɔɔ menli dɔɔnwo ɛlua zo ɛboa yɛ ɛzonlenlɛ nee moalɛ gyima mɔɔ yɛyɛ ye wɔ ewiade amuala la ɛmmaa menli mɔɔ fa agyapadeɛ kyɛ la ɛndua adwule biala. Saa bɛlɛ brohyua ne bie wɔ bɛ maanle ne anu a, biza kɛlɛhɛlɛvolɛ ne mɔɔ wɔ bɛ ɛkɛ ne asafo ne anu la die ko.

Saa ɛkpondɛ nwolɛ edwɛkɛ dɔɔnwo a, kɔ jw.org azo na tinli “Ye Ndoboa Fa Boa Yɛ Ewiade Amuala Gyima Ne” mɔɔ wɔ Quick Links abo la azo anzɛɛ ɛ nee ɔfese ne ɛli ngitanwo.