Bɛdule Bɛ Nwo Bɛmaanle​—Wɔ Ghana

ASOO ɛze adiema bie mɔɔ ɛdu ɛhɔ maanle mɔɔ bɛhyia Belemgbunlililɛ nolobɔlɛma dɔɔnwo la anu ɔ? Asoo wɔbiza ɛ nwo ɛlɛ kɛ: ‘Duzu a ka bɛ maa bɛkɔsonle maanle gyɛne zo a? Kɛzi bɛsiezie bɛ nwo bɛmaa gyima ɛhye ɛ? Asoo mebahola meayɛ bie ɔ?’ Amaa wɔanwu kpuya ɛhye mɔ anwo mualɛ la, ɔwɔ kɛ ɛbiza mediema ɛhye mɔ. Yemɔti bɛmaa yɛbiza bɛ.

DUZU A KA BƐ ƆMAA BƐYƐ ZƆ A?

Duzu a maanle ɛnyianle adwenle kɛ ɛkazonle wɔ maanle mɔɔ bɛhyia moalɛ kpole la anu a? Amy mɔɔ yebo ɛvolɛ 30 la vi United States. Ɔse: “Medwenle nwolɛ ɛvolɛ dɔɔnwo kɛ mekpondɛ kɛ mesonle wɔ maanle gyɛne zo, noko ɛnee ɔle kɛ asɛɛ ɔnrɛyɛ boɛ ɛlɛ.” Duzu a maanle ye adwenle hakyile a? “Wɔ 2004 ne anu, agyalɛma bie mɔɔ bɛlɛsonle wɔ Belize la hanle kɛ memamkpɔla bɛ na yɛyɛ adekpakyelɛ gyima ne siane ko. Mengɔle, na me nye liele nwolɛ kpalɛ! Ɛvolɛ ko anzi, mengɔnzonlenle wɔ Ghana kɛ adekpakyelɛnli.”

Ɛvolɛ bie mɔɔ ɛze ɛhɔ la, Stephanie, mɔɔ ɔlɛkɔ ɛvolɛ 30 na ɔvi United States la, nleɛnleanle ye ɛbɛlabɔlɛ nu boɛ na ɔhanle kɛ: ‘Mete kpɔkɛ kpalɛ yɛɛ menlɛ abusua nu ɛzonlelilɛ biala. Yemɔti mebahola meayɛ dɔɔnwo meamaa Gyihova meadɛla mɔɔ melɛyɛ ye kɛkala la.’ Zɔhane neɛnleanu ne maanle ɔradɛlɛle ye ɛzonlenlɛ gyima ne anu wɔ Ghana. Dahuu ɔwɔ Filip nee Ida, agyalɛma bie mɔɔ bɛwɔ bɛ ɛvolɛ 50 ne anu mɔɔ bɛvi Denmark la adwenle nu kɛ bɛbazonle wɔ ɛleka mɔɔ bɛhyia moalɛ kpole la. Bɛkpondɛle adenle mɔɔ bɛbalua zo bɛadwu bodane ɛhye anwo la. Filip se: “Mɔɔ nwolɛ adenle ne bukele la, ɛnee ɔle kɛ asɛɛ Gyihova ɛlɛka ahile yɛ kɛ: ‘Bɛhɔ!’” Bɛdule bɛhɔle Ghana wɔ 2008 na bɛzonlenle ɛkɛ ne ɛvolɛ mɔɔ bo nsa.

Hans nee Brook, agyalɛma bie mɔɔ bɛwɔ bɛ ɛvolɛ 30 ne anu la le adekpakyelɛma wɔ United States. Mɔɔ Hurricane Katrina zile wɔ 2005 la, bɛhɔboale. Amozi, bɛhyehyɛle maanle maanle avinli suazilɛ gyima kɛlata ne bie, noko bɛanvɛlɛ bɛ. Hans se: “Akee yɛdiele ɛdendɛlɛ bie wɔ nyianu bo, na bɛhanle kɛ Belemgbunli Devidi liele dole nu kɛ bɛnrɛmaa ye adenle bɛnrɛmaa ɔnrɛzi ɛzonlenlɛ sua ne, yemɔti ɔhakyile ye adwenle. Edwɛkɛ ɛhye maanle yɛnwunle kɛ ɔnle ɛtane kɛ awie bahakyi bodane mɔɔ gyi ɔ nye zo wɔ Gyihova ɛzonlenlɛ nu la.” (1 Ek. 17:1-4, 11, 12; 22:5-11) Brook toa zo kɛ: “Ɛnee Gyihova kpondɛ kɛ yɛfa bodane fofolɛ yɛsie yɛ nye zo.”

Mɔɔ Hans nee Brook dele bɛ gɔnwo mɔ mɔɔ bɛhɔhanle edwɛkɛ ne wɔ maanle gyɛne zo anwubielɛ ne la, bɛdabɛ noko bɛhɔyɛle adekpakyelɛ gyima ne bie wɔ maanle gyɛne zo. Wɔ 2012, bɛvale siane nna bɛhɔboale mumule aneɛ asafo bie wɔ Ghana. Ɔnva nwo kɛ ɛnee ɔwɔ kɛ bɛsia bɛkɔ United States la, anwubielɛ mɔɔ bɛnyianle wɔ Ghana la maanle bɛnyianle ɛhulolɛ kpole kɛ bɛbava Belemgbunlililɛ ne bɛalimoa bɛ ɛbɛlabɔlɛ nu. Akee bɛboale bɛmaanle bɛzile Micronesia Bɛtɛle ne.

KƐZI BƐDWULE BƐ BODANE NWO LA

Kɛzi ɛzieziele ɛ nwo ɛmaanle gyima ɛhye ɛ? Stephanie se: “Mengengale edwɛkɛ dɔɔnwo mɔɔ fale ɛleka mɔɔ bɛhyia moalɛ dɔɔnwo anwo la wɔ Ɛzinzalɛ Arane ne mɔ anu.a Eza menganle bodane mɔɔ gyi me nye zo la anwo edwɛkɛ mengilele asafo nu mgbanyima yɛɛ maangyebakyi zo neavolɛ ne nee ɔ ye. Mɔɔ hyia kpalɛ la, ɛnee meta meyɛ me bodane ne anwo asɔne.” Stephanie anva ninyɛne mgbole ɛkpondɛlɛ anzie ɔ nye zo, na yemɔ maanle ɔnyianle ezukoa mɔɔ ɔbava yeanlea ɔ nwo wɔ mekɛ mɔɔ ɔlɛsonle wɔ maanle gyɛne zo la.

Hans se: “Yɛzɛlɛle Gyihova kɛ ɔhile yɛ adenle ɔluakɛ ɛnee yɛkpondɛ kɛ yɛkɔ ɛleka mɔɔ ɔbahile yɛ la. Eza yɛhanle mekɛ holɛ ko mɔɔ yɛkpondɛ kɛ yɛdi yɛ bodane ne anwo gyima la anwo edwɛkɛ wɔ yɛ asɔneyɛlɛ nu.” Agyalɛma ne hɛlɛle Bɛtɛle ngakyile nna kɛlata. Mɔɔ Ghana Bɛtɛle ne maanle bɛ mualɛ la, bɛyɛle bɛ adwenle kɛ bɛkali siane nwiɔ wɔ ɛkɛ. Hans se: “Yɛ nye liele asafo ne mɔɔ yɛyɛle gyima wɔ nu la anwo kpalɛ, yemɔti yɛhyɛle ɛkɛ ekyi.”

Ɛnee George nee Adria, agyalɛma bie mɔɔ ɔka ekyi bɛnyia ɛvolɛ 40 na bɛvi Canada la ze kɛ Gyihova yila kpɔkɛzilɛ kpalɛ zo na tɛ adwenle kpalɛ mɔɔ awie banyia la ala. Yemɔti bɛbɔle mɔdenle kɛ bɛbadwu bɛ bodane ne anwo. Bɛvɛlɛle adiema raalɛ bie mɔɔ ɔlɛsonle wɔ ɛleka mɔɔ bɛhyia moalɛ dɔɔnwo wɔ Ghana la, na bɛbizebizale ye edwɛkɛ dɔɔnwo. Eza bɛhɛlɛle Canada nee Ghana Bɛtɛle ne mɔ ngɛlata. Adria se, “yɛbɔle mɔdenle kɛ yɛbatete ninyɛne zo kpalɛ.” Zɔhane ninyɛne ne mɔɔ bɛyɛle la maanle bɛholale bɛhɔle Ghana wɔ 2004.

KƐZI BƐLILE NGYEGYELƐ NWO GYIMA LA

Mɔɔ ɛhɔle la, duzu ngyegyelɛ a ɛyiale a, na kɛzi ɛlile nwolɛ gyima ɛ? Mɔlebɛbo ne, ɛnee Amy anwo dɔ sua nu. “Ɛnee debie biala le ngakyile wɔ me nye zo.” Duzu a boale ye a? “Mɔɔ me mbusuafoɔ bie mɔ vɛlɛle me hanle kɛzi bɛ nye sɔ mɔɔ melɛyɛ la, ɔboale me ɔmaanle mendoale me gyima ne azo. Amozi ɛnee me nee me abusua ne di vidio zo adwelie wɔ Yintanɛte ne azo. Kɛmɔ ɛnee yɛnwu yɛ nwo la ati, meande nganeɛ kɛ me abusua ne wɔ moamoa.” Amy se, adiema raalɛ bie mɔɔ ɔlɛ anwubielɛ mɔɔ ɔvale ye agɔnwolɛ wɔ ɛleka mɔɔ ɔlɛsonle la maanle ɔnwunle bɛ amaamuo ne kpalɛ. “Saa mende deɛmɔti menli dua ndenle bie mɔ azo yɛ bɛ ninyɛne la abo a, mekɔbiza me gɔnwo ne. Ɔboale me ɔmaanle menwunle mɔɔ ɔwɔ kɛ meyɛ nee mɔɔ ɔnle kɛ meyɛ la, na ɛhye maanle menvale anyelielɛ menyɛle me ɛzonlenlɛ gyima ne.”

George nee Adria se, mɔɔ bɛhɔdwule Ghana ɛkɛ ne ala la, ɛnee debie biala le ngakyile bɔkɔɔ. Adria se: “Yɛnlɛ milahyinli mɔɔ yɛfa yɛkpo ninyɛne a, yemɔti yɛkpo ye wɔ bokiti nu. Saa yɛlɛto aleɛ a, yɛkyɛ nwolɛ kpalɛ. Noko yeangyɛ biala yɛɛ zɔhane tɛnlabelɛ ne nee yɛ nwo lile a.” Brook se: “Ɔnva nwo ngyegyelɛ mɔɔ yɛyia kɛ adekpakyelɛma la, yɛ kunlu dwo yɛ nwo. Anwubielɛ ngɛnlɛma ngakyile mɔɔ yɛnyia la amuala maa yɛ nye die dahuu.”

GYIMA MƆƆ NVASOƐ WƆ ZO

Duzu ati a ɛbamaa awie mɔ anwosesebɛ kɛ bɛyɛ ɛzonlenlɛ gyima ɛhye bie ɛ? Stephanie ka kɛ, “Saa ɛlɛka edwɛkɛ ne wɔ azɛlɛsinli mɔɔ menli ne kpondɛ kɛ bɛsukoa nɔhalɛ ne na yemɔti bɛmaa ɛ nee bɛ sukoa Baebolo ne dahuu la anu a, ɔmaa ɛ nye die kpalɛ. Ɛleka mɔɔ bɛhyia moalɛ dɔɔnwo mɔɔ mehɔzonle la boka kpɔkɛ kpalɛ mɔɔ mezi la anwo!” Aaron gyale Stephanie wɔ 2014, na kɛkala bɛlɛsonle wɔ Ghana Bɛtɛle.

Christine, adekpakyelɛnli bie mɔɔ yebɔ ɛvolɛ 30 na ɔvi Germany la ka kɛ: “Ɔle anwubielɛ kɛnlɛma kpalɛ.” Christine zonlenle wɔ Bolivia kolaa na yeahɔ Ghana. Ɔtoa zo kɛ: “Me abusua ne mɔɔ menvile bɛ nwo mengɔle moa la ati, ɛnee dahuu mesɛlɛ Gyihova moalɛ. Ɛhye ɛmaa menwu ye kpole kpalɛ. Eza menyia koyɛlɛ mɔɔ wɔ Gyihova menli avinli la azo nvasoɛ kpalɛ. Ɛzonlenlɛ gyima ɛhye ɛmaa me ɛbɛlabɔlɛ ne ɛwie me boɛ.” Gideon gyale Christine la ɛtɛkyɛle, na bɛ mu nwiɔ bɛlɛsonle wɔ Ghana.

Filip nee Ida maa yɛnwu ninyɛne mɔɔ bɛyɛle bɛboale bɛ Baebolo sukoavoma bɛmaanle bɛnyianle anyuhɔlɛ la. “Ɛnee yɛlɛ Baebolo sukoavoma 15 anzɛɛ mɔɔ bɛbo zɔ la, noko amaa yɛahola yɛahilehile bɛ kpalɛ la, yɛdele zo yɛmaanle bɛhale 10.” Asoo sukoavoma ne nyianle anyuhɔlɛ? Filip se: “Ɛnee me nee kpavolɛ bie mɔɔ bɛfɛlɛ ye Michael la sukoa debie. Ɛnee ɔsiezie ɔ nwo kpalɛ yɛɛ yɛsukoa debie kenle ko biala, yemɔti yɛvale siane ko yɛzukoale Baebolo Ne Kilehile buluku ne yɛwiele. Yemɔ anzi, Michael rayɛle nolobɔlɛnli mɔɔ bɛtɛsɔnenle ye. Kenle mɔɔ limoa mɔɔ me nee ye hɔle daselɛlilɛ la, ɔbizale me kɛ: ‘Ɛbahola wɔaboa me wɔamaa meayɛ me Baebolo ɛzukoalɛ ne ɔ?’ Edwɛkɛ ne zinle me nwo. Michael hanle hilele me kɛ ɔ nee menli nsa ɛyɛ Baebolo ɛzukoalɛ nwo ngyehyɛleɛ, na ɔkpondɛ kɛ awie boa ye wɔ debiezukoalɛ ne ɛyɛlɛ nu.” Dwenle nwolɛ nea, yɛhyia kilehilevolɛma dɔɔnwo anwo kpalɛ, yemɔti Baebolo sukoavoma ɛrayɛ Baebolo kilehilevolɛma!

Amy ka kɛ, memanwunle kɛzi ɔhyia kɛ bɛka edwɛkɛ ne la: “Memandwule Ghana ala la, yɛlile daselɛ wɔ namule bie azo na yɛkpondɛle mumulema mɔɔ bɛwɔ ɛkɛ la. Tɛ mumule sonla ko ala a yɛnwunle ye a, bɛlua mɔtwɛ wɔ namule ko ne ala azo!” Eric gyale Amy, na kɛkala bɛ mu nwiɔ bɛlɛsonle kɛ adekpakyelɛ titilima. Bɛwɔ mumule aneɛ asafo bie anu, na bɛlɛboa nolobɔlɛma mɔɔ bɛbo 300 mɔɔ bɛle mumulema nee anyelielɛma wɔ maanle ne anu la. Wɔ George nee Adria afoa nu, Ghana mɔɔ bɛzonlenle la maanle bɛdele edwɛkpatɛlɛvolɛ gyima ne abo kpalɛ. Yemɔti mɔɔ bɛdole ɛsalɛ bɛvɛlɛle bɛ kɛ bɛhɔ Geleade Sukulu ne mɔɔ tɔ zo 126 ne bie la, nea kɛzi bɛ nye liele a! Kɛkala bɛlɛsonle kɛ edwɛkpatɛlɛvolɛma wɔ Mozambique.

ƐLƆLƐ A MAA BƐYƐ ZƆ A

Ɔyɛ anyelielɛ kɛ mediema dɔɔnwo mɔɔ vi maanle gyɛne nu la kɔboa bɛ mediema wɔ ɛbuhenle gyima ne anu wɔ bɛ maanle nu a. (Dwɔn 4:35) Yeanyɛ boɛ fee la, dapɛne biala bɛsɔne menli kɛyɛ 120 wɔ Ghana. Kɛ mɔɔ ɔde wɔ mediema 17 ne mɔɔ bɛhɔboale wɔ Ghana afoa nu la, Gyihova anwo ɛlɔlɛ ti, edwɛkpakavolɛma apenle dɔɔnwo ‘ɛdu bɛ nwo ɛmaa’ wɔ ewiade amuala. Bɛlɛsonle wɔ ɛleka mɔɔ bɛhyia Belemgbunlililɛ edwɛkpakavolɛma dɔɔnwo la. Nea kɛzi mediema ɛhye mɔ mɔɔ bɛdu bɛ nwo bɛmaa la maa Gyihova anye die a!​—Edw. 110:3; Mrɛ. 27:11.