Gyihova ‘Dwenle Ɛ Nwo’

KƐ ƆKƐYƐ na wɔanwu kɛ amgba Gyihova dwenle ɛ nwo ɛ? Debie ko a le kɛ Baebolo ne ka ye zɔ. Ɔka ye wɔ 1 Pita 5:7 kɛ: “Bɛva bɛ adwenleadwenle muala bɛgua ɔ nwo zo, ɔboalekɛ ɔdwenle bɛ nwo.” Daselɛ boni a kile kɛ Gyihova Nyamenle dwenle ɛ nwo a?

GYIHOVA MAA MENLI NYIA BƐ NWONANE AFOA NU NGYIANLƐ

Nyamenle lɛ subane mɔɔ ɛ nye la kɛ ɛ gɔnwo kpalɛ bie bala ye ali la. Menli mɔɔ da atiakunlukɛnlɛma nee nyeleyɛlɛ ali kile bɛ nwo la yɛ agɔnwolɛma kpalɛ. Kɛ mɔɔ ɛkola ɛnwu ye la, Gyihova da atiakunlukɛnlɛma nee nyeleyɛlɛ ali kile menli dahuu. Suzu neazo ko anwo: “Ɔmaa ye ezule tɔ na ye ewia fi maa ɛtanevolɛma nee kpalɛyɛlɛma amuala.” (Mat. 5:45) Duzu gyima a ewia nee ezule yɛ a? Nyamenle dua ewia, ezule nee ninyɛne dɔɔnwo azo maa menli “aleɛ na ɔmaa bɛ nye die.” (Gyi. 14:17) Nɔhalɛ, Gyihova nea kɛ azɛlɛ ne bamaa yɛ aleɛ dɔɔnwo, yɛɛ ɛye aleɛ kpalɛ ɛsie ahane a, ninyɛne ekyi bie ala a maa yɛ nye die kpalɛ a.

Ɛnee duzu ati a ɛhɔne ku menli dɔɔnwo a? Ɔluakɛ alesama mɔɔ di tumi la fa bɛ adwenle sie tumililɛ nee ezukoa ɛkpondɛlɛ zo tɛla menli ne. Ɔnrɛhyɛ, Gyihova baye maanyɛlɛ ngyehyɛleɛ ɛhye mɔ na yeava anwuma Belemgbunlililɛ ne mɔɔ ɔ Ra ne di zolɛ Belemgbunli la yeazie ɔ gyakɛ anu. Wɔ zɔhane mekɛ ne, ɛhɔne ɛnrɛhu awie biala. Kolaa na zɔhane mekɛ ne adwu la, Gyihova baboa ye nɔhalɛ azonvolɛ. (Edw. 37:25) Asoo ɛhye ɛngile kɛ ɔdwenle yɛ nwo ɔ?

GYIHOVA NYIA MEKƐ MAA AWIE MƆ

Agɔnwolɛ kpalɛ nyia mekɛ maa wɔ. Bie a ɔbava mekɛ dɔɔnwo ɔ nee wɔ abɔ ninyɛne mɔɔ bɛ nye die nwolɛ la anwo adawu. Na saa ɛlɛka wɔ ngyegyelɛ nwo edwɛkɛ wɔahile ye a, ɔbadie wɔ kpalɛ. Asoo kɛ Gyihova noko tie yɛ la ɛne? Ɛhɛe! Ɔtie yɛ asɔneyɛlɛ. Ɛhye ati, Baebolo ne se yɛyɛ “nzɛlɛlɛ dahuu.”​—Wlo. 12:12; 1 Tɛs. 5:17.

Mekɛ tendenle nyɛ a Gyihova kpondɛ kɛ ɔfa ɔtie yɛ asɔneyɛlɛ a? Baebolo ne anu neazo bie maa yɛnwu mualɛ ne. Kolaa na Gyisɛse akpa ye ɛzoanvolɛma ne la, “ɔzɛlɛle Nyamenle nɔe ne amuala.” (Luku 6:12) Wɔ zɔhane nzɛlɛlɛ ne anu, bie a Gyisɛse zuzule ye ɛdoavolɛma dɔɔnwo aluma, bɛ subane nee bɛ bɛtɛɛyɛlɛ ne mɔ anwo na ɔzɛlɛle ye Papa kɛ ɔboa ye ɔmaa ɔkpa bɛ. Ewia ne kavinde la, ɛnee Gyisɛse ze kɛ yekpa menli mɔɔ fɛta kɛ bɛyɛ ye ɛzoanvolɛma la. Gyihova ‘mɔɔ tie yɛ nzɛlɛlɛ la’ anye die kɛ ɔbadie asɔneyɛlɛ mɔɔ vi ahonle nu la kɔsɔɔti. (Edw. 65:2) Saa awie fa dɔnehwele dɔɔnwo yɛ debie mɔɔ gyegye ye la anwo asɔne a, Gyihova ɛnnea mekɛ ne.

NYAMENLE FA ƐTANE KYƐ

Ɔyɛ a ɔyɛ se kɛ agɔnwolɛma kpalɛ bɔbɔ bava ɛtane ahyɛ. Ɔyɛ a, kɛmɔ ɔyɛ se kɛ menli bava ɛtane ahyɛ la ati, ɔmaa bɛsɛkye agɔnwolɛvalɛ mɔɔ bɛ nee awie ɛnyia ye mekɛ tendenle la. Gyihova ɛnle zɔ. Baebolo ne ka kile awie biala mɔɔ ɔlɛ ahonle kpalɛ la kɛ ɔzɛlɛ ɛtanefakyɛ, “na Nyamenle bava ye ɛtane ahyɛ ye.” (Aye. 55:6, 7) Duzu a ka Nyamenle ɔmaa ɔfa ɛtane ɔkyɛ a?

Ye ɛlɔlɛ kpole ne ati ɔ. Ɔkulo ewiade kpole kpalɛ la ati a ɔvale ɔ Ra Gyisɛse ɔmaanle a, amaa yealie alesama yeavi ɛtane nee nwolɛ ngyegyelɛ kɔsɔɔti anu. (Dwɔn 3:16) Nɔhalɛ nu, ɛkpɔnedeɛ ne yɛ ninyɛne dɔɔnwo. Ɔlua Kelaese afɔlebɔlɛ ne ati, Nyamenle fa menli mɔɔ ɔkulo bɛ la ɛtane kyɛ bɛ. Ɛzoanvolɛ Dwɔn hɛlɛle kɛ: “Saa yɛka yɛ ɛtane ne mɔ yɛkile ye a, ɔkɛva ɔkɛhyɛ yɛ na ɔkɛde yɛ nwo ɔkɛvi nyɛleɛ mɔɔ ɛndenrɛ la amuala anwo.” (1 Dwɔn 1:9) Kɛmɔ Gyihova fa ɛtane kyɛ la ati, menli kola nee ye nyia agɔnwolɛvalɛ, na ɛhye ka yɛ ahonle kpalɛ.

SAA ƐHYIA MOALƐ A ƆBOA WƆ

Agɔnwolɛ kpalɛ boa awie mɔ wɔ mekɛ mɔɔ bɛhyia moalɛ la. Asoo kɛ Gyihova de la ɛne? Ye Edwɛkɛ ne se: “Saa [Nyamenle sonvolɛ bie tɔ] aze bɔbɔ a, ɔnrɛha ɛkɛ, ɔluakɛ [Gyihova] bakpogya ye zo.” (Edw. 37:24) Gyihova boa ye azonvolɛ wɔ ndenle ngakyile zo. Yɛ neazo bie mɔɔ zile St. Croix, bɔra bie mɔɔ wɔ Caribbean azo la nzonlɛ.

Kɛmɔ adiema kakula raalɛ bie ɛmbiza fɛlɛnra ahye la ati, ɔ gɔnwo mɔ sukuluma gyegyele ye. Ɔzɛlɛle Gyihova moalɛ na akee ɔzile kpɔkɛ kɛ ɔdi ngyegyelɛ ne anwo gyima. Akee ɔluale Me Buluku Mɔɔ Ɔka Baebolo nu Edwɛkɛ la azo ɔhilehilele kɛzi Hyeedelake, Mihyake nee Abɛdenɛgo edwɛkɛ ne ɛmaa yezi kpɔkɛ kɛ ɔnrɛbiza fɛlɛnra ahye la anu ɔhilele ye sukuluma ne. Ɔhanle kɛ, “Gyihova bɔle Hibuluma nsa ne anwo bane ɔluakɛ bɛanzonle ananze.” Akee ɔvale buluku ne ɔmaanle menli mɔɔ wɔ ɛkɛ la. Bɛ nuhua bulu nee ko liele bie. Kɛmɔ Gyihova maanle adiema kakula raalɛ ne akɛnrasesebɛ nee nrɛlɛbɛ ɔmaanle ɔhilehilele edwɛkɛtile zɔhane anu la ati, ɔ nye liele.

Saa ɛnlie ɛnli kɛ Gyihova dwenle ɛ nwo a, dwenledwenle ngɛlɛlera ɛhye mɔ anwo: Edw. 34:17-19; 55:22; nee 145:18, 19. Maa Alasevolɛ mɔɔ bɛzonle Gyihova bɛhyɛ la ɛha kɛzi Gyihova ɛboa bɛ la anwo edwɛkɛ ɛhile wɔ. Saa ɛhyia Nyamenle moalɛ a, yɛ wɔ ngyegyelɛ ne anwo asɔne. Ɔnrɛhyɛ ɛbanwu kɛzi Gyihova ‘dwenle ɛ nwo’ la.