Duzu A Baebolo Ne Ka a?
Nyamenle Belemgbunlililɛ ne a le duzu?
MENLI BIE MƆ DIE DI kɛ ɔgyi ɛkɛ ne ɔmaa Nyamenle tumililɛ mɔɔ wɔ awie ahonle nu la; bie mɔ noko dwenle kɛ menli mɔdenlebɔlɛ a bamaa anzodwolɛ nee koyɛlɛ ara ewiade a. Kɛzi ɛdwenle nwo ɛ?
MƆƆ BAEBOLO NE KA LA
“Nyamenle bamaa maanle ko avinde, na ɔbahomo maanle zɔhane mɔ anwo zo yeamaa bɛagolo. . . . Awie ɛnrɛhola ɛnrɛzɛkye ye kenle bie maanle nu.” (Daneɛle 2:44) Nyamenle Belemgbunlililɛ ne le arane mɔɔ wɔ ɛkɛ.
DEBIE BIEKO MƆƆ YƐSUKOA YƐFI BAEBOLO NE ANU LA
Nyamenle Belemgbunlililɛ ne di tumi wɔ anwuma.—Mateyu 10:7; Luku 10:9.
Nyamenle dua Belemgbunlililɛ ne azo maa ye ɛhulolɛdeɛ yɛ ɛkɛ wɔ anwuma nee aze.—Mateyu 6:10.
Mekɛ boni a Nyamenle Belemgbunlililɛ ne bara a?
DUZU A ƐBAHA A?
Awie biala ɛnze
Ɔnrɛhyɛ
Ɔnrɛra ɛlɛ
MƆƆ BAEBOLO NE KA LA
“Bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ yeamaa aleɛabo amra kolaa na awieleɛ ne ara.” (Mateyu 24:14) Bɛbɔ edwɛkpa ne nolo bɛwie a, Belemgbunlililɛ ne bazɛkye ɛtane ewiade ɛhye.
DEBIE BIEKO MƆƆ YƐSUKOA YƐFI BAEBOLO NE ANU LA
Awie biala ɛnze mekɛ mɔɔ Nyamenle Belemgbunlililɛ ne bara la.—Mateyu 24:36.
Baebolo ngapezo kile kɛ ɔnrɛhyɛ Belemgbunlililɛ ne bara.—Mateyu 24:3, 7, 12.