Ɛkulo Kɛ Ɛfa Mɔɔ Ɛdie Ɛdi La Ɛtoto Baebolo Ne Anwo Ɔ?

ƐBU ɛ nwo kɛ ɛle Kilisienenli ɔ? Saa ɔle zɔ a, ɛnee ɛboka menli mɔɔ bo mgbe mgbe nwiɔ mɔɔ wɔ azɛlɛ ye azo anwo. Asɛɛ ɛye menli 3 ɛsie ahane a nuhua 1 biala ka kɛ ɔle Kelaese ɛdoavolɛ. Ɛnɛ, asɔne dɔɔnwo wɔ ɛkɛ mɔɔ bɛfɛlɛ bɛ nwo Kilisienema a, noko bɛ nuhua ɛhyehyɛ ɔluakɛ bɛ diedi nee bɛ adwenle le ngakyile. Yemɔti bie a wɔ diedi le ngakyile fi Kilisienema gyɛne mɔɔ ɛha la anwo. Asoo mɔɔ ɛdie ɛdi la anwo hyia amgba ɔ? Ɛhɛe, ɔhyia—saa ɛkulo kɛ ɛfa mɔɔ Baebolo ne kilehile ye wɔ Kilisienezonlenlɛ nwo la ɛdi gyima a.

Bɛvɛlɛle Gyisɛse Kelaese ɛdoavolɛma mɔɔ bɛlimoa la ‘Kilisienema.’ (Gyima ne 11:26) Ɛnee ɔngyia kɛ bɛbava duma gyɛne bavɛlɛ bɛ, ɔluakɛ ɛnee Kilisiene diedi kokye a wɔ ɛkɛ a. Kilisienema vale koyɛlɛ lile ngilehilelɛ nee adehilelɛ mɔɔ Gyisɛse Kelaese mɔɔ Vale Kilisienezonlenlɛ rale la azo. Na wɔ asɔne ɛdeɛ ne noko ɛ? Asoo ɛdie ɛdi kɛ wɔ asɔne ne kilehile mɔɔ Kelaese hanle nee mɔɔ ye ɛdoavolɛma ne liele lile la ɔ? Kɛ ɔkɛyɛ na wɔanwu ɛhye ɛ? Adenle kokye a le kɛ ɛbava Baebolo ne wɔatoto nwolɛ.

Suzu ɛhye anwo: Ɛnee Gyisɛse Kelaese lɛ ɛbulɛ kpole maa Ngɛlɛlera ne kɛ ɔle Nyamenle Edwɛkɛ. Yeanlie bɛdabɛ mɔɔ bɛsɛkye Baebolo ne anu ngilehilelɛ ne na bɛdi sonla amaamuo nzi la yeando nu. (Maake 7:9-13) Yɛbahola yɛaha kɛ Gyisɛse nɔhalɛ ɛdoavolɛma maa bɛ diedi ne gyinla Baebolo ne azo. Yemɔti ɔwɔ kɛ Kilisienenli biala biza ɔ nwo kɛ, ‘Asoo mɔɔ me asɔne ne kilehile me la nee Baebolo ne le ko ɔ?’ Amaa wɔabua kpuya ɛhye la, kɛmɔti a ɛnva wɔ asɔne ne ngilehilelɛ ne ɛntoto mɔɔ Baebolo ne amgba ka la anwo ɛ?

Gyisɛse hanle kɛ ɔwɔ kɛ yɛ Nyamenle ɛzonlenlɛ ne gyinla nɔhalɛ ne azo—nɔhalɛ ne wɔ Baebolo ne anu. (Dwɔn 4:24; 17:17) Yɛɛ ɛzoanvolɛ Pɔɔlo hanle kɛ “nɔhalɛ ne” mɔɔ yɛbanwu ye la a bamaa yɛanyia ngoane a. (1 Temɔte 2:4) Yemɔti nwolɛ hyia kɛ yɛbamaa yɛ diedi ne agyinla Baebolo nu nɔhalɛ ne azo. Kɛmɔti ɛ, ɔluakɛ zolɛ a yɛ ngoane gyi a!

KƐZI YƐFA MƆƆ YƐDIE YƐDI YƐTOTO BAEBOLO NE ANWO LA

Yɛsɛlɛ wɔ kenga kpuya nsia ɛhye mɔɔ doa zo la na yɛ mualɛ mɔɔ Baebolo ne fa maa la nzonlɛ. Nea Baebolo tɛkese mɔɔ bɛha nwolɛ edwɛkɛ la, na dwenle mualɛ ne mɔ anwo. Akee biza ɛ nwo kɛ, ‘Asoo mɔɔ me asɔne ne kilehile la nee mɔɔ Baebolo ne ka la le ko ɔ?’

Kpuya nee mualɛ ɛhye mɔ bahola aboa wɔ yeamaa wɔayɛ ndotonwo kpalɛ mɔɔ tɛla biala. Ɛkulo kɛ ɛfa wɔ asɔne ngilehilelɛ gyɛne ɛtoto mɔɔ Baebolo ne ka la anwo ɔ? Gyihova Alasevolɛ anye balie kɛ bɛbaboa wɔ bɛamaa wɔazuzu Baebolo nu nɔhalɛ ne anwo. Nzɔne ati a ɛnga ɛngile Dasevolɛ bie ɛmmaa ɔ nee wɔ ɛnzukoa Baebolo ne mɔɔ ɛndua ɛhwee a? Anzɛɛ ɛbahola wɔahɔ yɛ wɛbsaete jw.org/nzi ne azo.

1 KPUYA: Nyamenle a le nwane?

MUALƐ: Gyihova mɔɔ le Gyisɛse ɔ ze la a le damɛnlangoate Nyamenle ne nee tumivolɛ bedevinli Bɔvolɛ ne, mɔɔ bɔle debie biala la.

MƆƆ BAEBOLO NE KA LA:

“Dahuu yɛsɛlɛ yɛmaa bɛ, yɛyɛ Gyisɛse Kelaese ɔ Ze Nyamenle ne mo.”—Kɔlɔsaema 1:3.

“Yɛ Awulae nee yɛ Nyamenle! Ɛfɛta anyunlunyia, enililɛ, nee tumi. Ɔluakɛ ɛdawɔ a ɛbɔle ninyɛne kɔsɔɔti a.”—Yekile 4:11.

Eza nea Wulomuma 10:13; 1 Temɔte 1:17.

2 KPUYA: Gyisɛse Kelaese a le nwane?

MUALƐ: Gyisɛse le Nyamenle belamunli ralɛ Nrenyia. Bɛbɔle Gyisɛse, ɛhye ati ɔnyianle ye mɔlebɛbo. Gyisɛse vea Nyamenle abo na ɔyɛ tieyɛ ɔyɛ Ye ɛhulolɛdeɛ.

MƆƆ BAEBOLO NE KA LA:

‘Selɛ ne le kpole tɛla me.’—Dwɔn 14:28.

“Kelaese le Nyamenle ne mɔɔ ɛnyelɛ ɛnnwu ye la sɔhovolɛ. Yemɔ a ɔle abɔdeɛ muala anu belamunli Ralɛ a.”—Kɔlɔsaema 1:15.

Eza nea Mateyu 26:39; 1 Kɔlentema 15:28.

3 KPUYA: Sunsum nwuanzanwuanza ne a le duzu?

MUALƐ: Sunsum nwuanzanwuanza ne le tumi mɔɔ Nyamenle fa yɛ ye ɛhulolɛdeɛ la. Ɔnle sonla. Sunsum nwuanzanwuanza ne kola wolo menli na ɔmaa bɛ anwosesebɛ.

MƆƆ BAEBOLO NE KA LA:

“Mɔɔ Ɛlezabɛte dele Mɛle ahyebizalɛ ne la, ɔ ra ne mɔɔ la ɔ kunlu la hanle ɔ nwo, Sunsum Nwuanzanwuanza ne wolole Ɛlezabɛte.”—Luku 1:41.

“Na saa Sunsum Nwuanzanwuanza ne ba bɛ nwo zo a bɛbanyia tumi”—Gyima ne 1:8.

Eza nea Mɔlebɛbo 1:2; Gyima ne 2:1-4; 10:38.

4 KPUYA: Nyamenle Belemgbunlililɛ ne a le duzu?

MUALƐ: Nyamenle Belemgbunlililɛ le anwuma arane. Gyisɛse a le Nyamenle Belemgbunlililɛ ne azo Belemgbunli a. Ɔnrɛhyɛ Belemgbunlililɛ ɛhye bamaa bɛayɛ Nyamenle ɛhulolɛdeɛ wɔ azɛlɛ ye azo amuala.

MƆƆ BAEBOLO NE KA LA:

“Akee Nyamenle soanvolɛ ne mɔɔ tɔ zolɛ nsuu la bɔle ye aweɛne tendenle ne anu. Na ɛnelɛ mgbole dɔɔnwo bie vi anwuma hanle kɛ, ‘Azɛlɛ ye azo tumi muala ɛyɛ Awulae nee yɛ Mɛzaya ne ɛdeɛ; ɔbali belemgbunli ɛvolɛ mɔɔ ɛnlɛ awieleɛ!’”—Yekile 11:15.

Eza nea Daneɛle 2:44; Mateyu 6:9, 10.

5 KPUYA: Asoo kpalɛma kɔsɔɔti kɔ anwuma ɔ?

MUALƐ: Kyɛkyɛ. Nyamenle ɛkpa ekpunli ekyii bie mɔɔ bɛdi nɔhalɛ na bɛfɛlɛ bɛ “mboane ekpunli ekyi” la kɛ bɛkɔ anwuma. Bɛ nee Gyisɛse bali belemgbunli wɔ alesama anwo zo.

MƆƆ BAEBOLO NE KA LA:

“Me mboane ekpunli ekyi, bɛmmasulo, ɔluakɛ bɛ Ze mɔɔ wɔ anwuma la kulo kɛ bɛnyia Belemgbunlililɛ ne.”—Luku 12:32.

“Bɛbayɛ Nyamenle nee Kelaese sɛlɛvolɛma na bɛ nee Kelaese ali belemgbunli ɛvolɛ apenle.”—Yekile 20:6.

Eza nea Yekile 14:1, 3.

6 KPUYA: Bodane boni a Nyamenle lɛ maa azɛlɛ ne nee alesama a?

MUALƐ: Wɔ Nyamenle Belemgbunlililɛ ne abo, azɛlɛ ne bayɛ paladaese na alesama mɔɔ di nɔhalɛ la banyia kpɔkɛdelɛ kpalɛ, anzodwolɛ nee dahuu ngoane.

MƆƆ BAEBOLO NE KA LA:

“Na bɛlɛvoma bava azɛlɛ ne ayɛ bɛ ɛdeɛ, na bɛ nye alie bɛ ɛkpazilɛ nwo.”—Edwɛndolɛ 37:10, 11.

“Ɔbakyikyi bɛ nye anwo monle. Ewule ɛnle ɛkɛ bieko, monle ɛnle ɛkɛ, nyane ɛnle ɛkɛ, ɛzunlɛ ɛnle ɛkɛ ne bieko. Ɔluakɛ alumua ninyɛne ne mɔ ɛze ɛhɔ.”—Yekile 21:3, 4.

Eza nea Edwɛndolɛ 37:29; 2 Pita 3:13.