Deɛmɔti Baebolo Ne Tɛbɔ Ɛkɛ Ne La

Baebolo ne tɛbɔ ɛkɛ. Ɔlua ɛhye ati, ɛbahola wɔanyia bie ɛnɛ na wɔagenga. Na saa ɛnyia Baebolo mɔɔ bɛhile ɔ bo kpalɛ la a, ɛbahola wɔanyia anwodozo kɛ ɛlɛkenga mɔlebɛbo ngɛlɛlera ne bie.a Noko nzɔne ati a Baebolo ne tɛbɔ ɛkɛ ɔnva nwo kɛ ɔkola ɔsɛkye, ɔyiale dwazotia nee mɔdenle mɔɔ bɛbɔle kɛ bɛkakyi nuhua edwɛkɛ ne la ɛ? Duzu a maa buluku ɛhye yɛ ngakyile a?

Baebolo sukoavoma dɔɔnwo ɛha edwɛkɛ ko ne ala mɔɔ ɛzoanvolɛ Pɔɔlo hɛlɛle la kɛ: “Bɛfa Nyamenle Sunsum a bɛkɛlɛ Nyamenle Edwɛkɛ ne a.” (2 Temɔte 3:16) Bɛdie bɛdi kɛ Baebolo ne tɛbɔ ɛkɛ ɔluakɛ ɔle Nyamenle anloa Edwɛkɛ na Nyamenle ɛbɔ nwolɛ bane too badwu ɛnɛ. Faizal mɔɔ yɛhanle ɔ nwo edwɛkɛ la, zile kpɔkɛ kɛ ɔneɛnlea edwɛkɛ mɔɔ bɛha ye wɔ nwolɛ la anu ɔlua Baebolo ne mɔɔ ɔbazukoa la azo. Mɔɔ ɔnwunle ye la zinle ɔ nwo. Yeangyɛ ɔnwunle kɛ ngilehilelɛ dɔɔnwo mɔɔ ɛbu zo wɔ Kilisienemaanle ne anu la ɛnle Baebolo ne anu. Bieko, Nyamenle bodane mɔɔ ɔlɛ ɔmaa azɛlɛ ne mɔɔ yela ye ali wɔ Ye Edwɛkɛ ne anu la hanle ye ahonle.

Ɔse, “Kɛkala medie medi kɛ Baebolo ne mɔɔ melɛ la le ahyɛlɛdeɛ mɔɔ vi Nyamenle ɛkɛ a. Saa Nyamenle kola bɔ anwuma nee aze a, asoo ɔnlɛ tumi mɔɔ ɔbava buluku yeamaa yɛ na yeabɔ nwolɛ bane ɔ? Saa yɛka kɛ ɔnle zɔ a ɛnee yɛlɛkile kɛ Nyamenle tumi ne ɛha aze​—yɛlɛbɛlɛ Tumivolɛ Bedevinli ne tumi ne aze! Na medame a le nwane mɔɔ mebabɛlɛ Nyamenle tumi ne aze a?”​—Ayezaya 40:8.