EDWƐKƐ TITILI | ƐBAHOLA WƆADE BAEBOLO NE ABO
Kɛmɔti A Ɔwɔ Kɛ Ɛte Ɔ Bo Ɛ?
“Baebolo ne le asɔne buluku mɔɔ awie biala ze a. Noko ɔnrɛboa Chinama ɔluakɛ ɔle maanle gyɛne zo buluku.”—LIN, CHINA.
“Mende me Hindu asɔne ne anu mbuluku nwuanzanwuanza ne mɔ abo bɔbɔ. Yemɔti kɛ ɔkɛyɛ na meade Baebolo Nwuanzanwuanza ne abo ɛ?”—AMIT, INDIA.
“Mebu Baebolo ne kɛ ɔle buluku mɔɔ ɛhyɛ na mede kɛ bɛtɔ ye kpalɛ. Noko metɛnwunle bie ɛlɛ.”—YUMIKO, JAPAN.
Menli dɔɔnwo mɔɔ wɔ ewiade ye la bu Baebolo ne kpalɛ. Noko bie a Baebolo ne anu edwɛkɛ ekyi bie ala a bɛze a. Zɔhane ala a ɔde ye wɔ menli mgbe dɔɔnwo mɔɔ wɔ Asia la afoa nu a. Eza kɛ ɔde ye wɔ maanle dɔɔnwo mɔɔ bɛva Baebolo ne dɔɔnwo bɛmaa la azo la ɛne.
Noko bie a ɛbabiza kɛ, ‘Duzu ati a ɔwɔ kɛ me nye die nwo kɛ mebade Baebolo ne abo ɛ?’ Saa ɛte mɔɔ buluku nwuanzanwuanza ɛhye ka la abo a, ɔbaboa wɔ yeamaa wɔayɛ ɛhye mɔ:
Ɛbanyia ahunlundwolɛ nee anyelielɛ
Ɛbagyinla abusua nu ngyegyelɛ nloa
Ɛbagyinla adwenleadwenle nloa
Ɛbanyia agɔnwolɛvalɛ kpalɛ
Ɛbanlea wɔ ezukoa zo boɛ
Yɛva Yoshiko mɔɔ wɔ Japan la kɛ neazo. Ɛnee ɔnze mɔɔ Baebolo ne ka la na ɔzile kpɔkɛ kɛ ɔkenga. Duzu a ɔhanle a? Ɔse, “Baebolo ne ɛboa me ɛmaa menyia bodane wɔ ɛbɛlabɔlɛ nu yɛɛ kenle bie anyelazo.” Ɔtoa zo kɛ: “Mende nganeɛ kɛ meminli debie.” Amit, mɔɔ yɛlimoa yɛha ɔ nwo edwɛkɛ la zile kpɔkɛ kɛ ɔsukoa Baebolo ne. Ɔka kɛ, “Ɔzinle me nwo. Edwɛkɛ mɔɔ wɔ Baebolo ne anu la baboa awie biala.”
Baebolo ne ɛboa menli mgbe dɔɔnwo. Duzu ati a ɛdawɔ noko ɛnzukoa na wɔanwu kɛzi ɔbaboa wɔ la ɛ?