EDWƐKƐ TITILI | ƐKULO KƐ ƐSUKOA BAEBOLO NE Ɔ?

Baebolo Ɛzukoalɛ Nwo Ngyehyɛleɛ Maa Awie Biala

Bɛze Gyihova Alasevolɛ ne mɔ kɛ bɛbɔ edwɛkpa ne nolo. Noko asoo ɛze kɛ eza yɛyɛ Baebolo ɛzukoalɛ nwo ngyehyɛleɛ wɔ ewiade amuala ɔ?

Bɛ nee nrenyia bie ɛlɛsukoa Baebolo ne wɔ ye gyima nu

Wɔ 2014, Alasevolɛ mɔɔ bo 8,000,000 mɔɔ wɔ azɛlɛ 240 azo la yɛle Baebolo ɛzukoalɛ kɛyɛ 9,500,000 la siane ko biala.a Nɔhalɛ nu, menli dodo mɔɔ yɛ nee bɛ sukoa Baebolo ne la bo menli mɔɔ bɛwɔ maanle kɛyɛ 140 anu la anwo zo!

Amaa Gyihova Alasevolɛ ne mɔ ayɛ ngilehilelɛ gyima ɛhye la, yɛyɛ Baebolo, mbuluku, magazine nee mbuluku mɔɔ yɛfa yɛsukoa Baebolo ne la asɛɛ mgbe mgbe ko nee foa ɛvolɛ biala wɔ aneɛ kɛyɛ 700 anu! Mbuluku ɛhye mɔɔ tɛla biala la maa menli kola sukoa Baebolo ne wɔ aneɛ mɔɔ bɛkulo la anu.

“Ɛnee me nye ɛnlie debiezukoalɛ nwo wɔ sukulu, noko debiezukoalɛ ɛhye yɛ anyelielɛ. Ninyɛne mɔɔ menzukoale la kyekyele me rɛle somaa!”—Katlego, South Africa.

“Debiezukoalɛ ne buale me kpuya ne mɔ amuala nee mɔɔ bokɛboka nwo la.”—Bertha, Mexico.

“Yɛyɛ Baebolo ɛzukoalɛ ne wɔ me sua nu wɔ mekɛ mɔɔ ɔle kpalɛ ɔmaa me la anu. Boni bieko a mekpondɛ a!”—Eziquiel, Brazil.

“Ɔyɛ a debiezukoalɛ ne di mitini 15 kɔdwu 30 yɛɛ bie a ɔkyɛ—nuhua biala le kpalɛ maa me.”—Viniana, Australia.

“Bɛndua ɛhwee wɔ debiezukoalɛ ne anwo—ɔyɛ azibɛnwo!”—Aimé, Benin.

“Ɛnee me Baebolo kilehilevolɛ ne lɛ abotane yɛɛ atiakunlukɛnlɛma. Yɛvale yɛ nwo agɔnwolɛ kpalɛ.”—Karen, Northern Ireland.

“Menli dɔɔnwo sukoa Baebolo ne mɔɔ bɛnyɛ Dasevolɛ a.”—Denton, England.

BAEBOLO ƐZUKOALƐ NWO NGYEHYƐLEƐ NWO KPUYA MƆƆ BƐTA BƐBIZA LA ANWO MUALƐ

Kɛzi bɛyɛ debiezukoalɛ ne ɛ?

Yɛkpa Baebolo edwɛkɛtile ngakyile na yɛsuzu Baebolo ngyɛnu mɔɔ fane edwɛkɛtile ne anwo la anwo. Kɛ neazo la, Baebolo ne bua kpuya mɔɔ le kɛ ɛhye mɔ: Nyamenle a le nwane? Kɛzi ɔde ɛ? Asoo ɔlɛ duma? Nienwu a ɔwɔ a? Yɛbahola yɛabikye ye ɔ? Ɛleka mɔɔ yɛbanwu mualɛ ne wɔ Baebolo ne anu la a le yɛ se a.

Amaa yɛaboa menli yɛamaa bɛanwu mualɛ ne la, yɛfa Duzu A Baebolo ne Kilehile Amgba A? buluku ne mɔɔ lɛ mukelɛ 224 la yɛdi gyima.b Bɛyɛle buluku ɛhye kɛ bɛfa bɛaboa menli bɛamaa bɛade Baebolo ne anu mɔlebɛbo ngilehilelɛ ne abo. Ɛzukoalɛdeɛ mɔɔ wɔ nu la bie a le Nyamenle, Gyisɛse Kelaese, alesama amaneɛnwunlɛ, ewudwazo ne, asɔneyɛlɛ, nee dɔɔnwo mɔɔ bokɛboka nwo la.

Mekɛ boni yɛɛ nienwu a bɛkola bɛyɛ debiezukoalɛ ne a?

Bɛbahola bɛayɛ debiezukoalɛ ne wɔ mekɛ nee ɛleka mɔɔ le kpalɛ maa wɔ la.

Mekɛ dodo nyɛ a bɛfa bɛyɛ debiezukoalɛ ne a?

Menli dɔɔnwo ye dɔnehwele ko anzɛɛ mɔɔ ɔndwu zɔ la sie ɛkɛ fa sukoa Baebolo ne dapɛne biala. Yɛnyɛ ye kyengye wɔ mekɛ dodo mɔɔ yɛfa yɛsukoa la anwo. Yɛbamaa ɔ nee wɔ mekɛ ngyehyɛleɛ ne ayɛ ko. Bie mɔ fa mitini 10 anzɛɛ 15 sukoa debie dapɛne biala.

Ezukoa ɛzɛ a bɛtua ye wɔ debiezukoalɛ ne anwo a?

Bɛndua debiezukoalɛ ne nee mbuluku ne mɔ anwo ɛhwee. Ɛhye nee adehilelɛ mɔɔ Gyisɛse vale maanle ye ɛdoavolɛma ne la yia: ‘Bɛnyia ye mgbane, yemɔti bɛva bɛmaa mgbane.’—Mateyu 10:8.

Mekɛ dodo nyɛ a bɛfa bɛwie debiezukoalɛ ne a?

Mekɛ dodo mɔɔ ɛbava wɔazukoa la gyi ɛ nwo zo. Ɛzukoalɛdeɛ 19 a wɔ Duzu A Baebolo ne Kilehile Amgba A? buluku ne anu a. Ɛbahola wɔazukoa ɛzukoalɛdeɛ ne biala mɔɔ ɛkulo la anzɛɛ ɔ muala wɔ mekɛ dodo mɔɔ baboa wɔ la anu.

Ɔwɔ kɛ meyɛ Gyihova Dasevolɛ ɔ?

Kyɛkyɛ. Yɛbu adenle mɔɔ awie biala lɛ kile mɔɔ ɔdie ɔdi la kpalɛ. Noko akee, menli mɔɔ nyia Baebolo nu mɔlebɛbo ndelebɛbo la kola si kpɔkɛ mɔɔ bɛkulo la.

Nienwu a mebanyia nwolɛ edwɛkɛ dɔɔnwo a?

Kɔ jw.org/nzi Web site ɛkɛ. Ɛbanyia Gyihova Alasevolɛ diedi nee bɛ gyima ne anwo edwɛkɛ dɔɔnwo.

Kɛ ɔkɛyɛ na meabiza Baebolo ɛzukoalɛ nwo adenle ɛ?

Dua www.jw.org/nzi Intanɛte ne azo biza nwolɛ adenle.
Dua adelɛse mɔɔ wɔ magazine ɛhye mukelɛ nwiɔ ne azo la kɛlɛ bɛ.
Nwu Gyihova Alasevolɛ mɔɔ bikye wɔ la. Ɛbahola wɔakpondɛ “Gyihova Alasevolɛ” wɔ telefun nɔma mɔɔ bɛhile la azo.

a Bɛ nee sonla ko anzɛɛ menli ekpunli ekyi a yɛ Baebolo ɛzukoalɛ ne a.

b Gyihova Alasevolɛ a yɛle a. Bɛyɛ buluku ɛhye mɔɔ bo mgbe 230 la bɛhɔ aneɛ mɔɔ bo 260 la anu.

MOALƐ MAA MBUSUA

“Mekɛ mɔɔ me ye bɔle ɔ bo kɛ ɔsukoa Baebolo ne la, menwunle kɛ yeyɛ nzenzaleɛ dɔɔnwo. Yɛ abusua asetɛnla ne yɛle kpalɛ. Ɛnee mekulo kɛ menwu mɔɔ ɔlɛsukoa la ati, medame noko membɔle ɔ bo kɛ mesukoa. Mɔɔ menzukoale la ɛmaa meyɛ sonla kpalɛ. Baebolo ne mɔɔ yɛzukoa la ɛha yɛ abusua ne ɛbɔ nu.”—Eziquiel.

“Membɔle Baebolo ne ɛzukoalɛ bo la yeangyɛ, mengyakyile nyile ɛtane ɛnlonlɛ, meambo nza bieko, na menzukoale kɛ mebahomo me ɛya zo. Me sua nu le bɔkɔbɔkɔ. Me nye sɔ me abusua ne kpalɛ na meyɛ debie memaa bɛ nye die. Me nye die kpalɛ.”—Karen.

“Menli bie mɔ tendɛ tia me, ɔlua Baebolo ne mɔɔ melɛsukoa la ati. Noko me hu gyinlanle me nzi wɔ me kpɔkɛzilɛ ne anwo, ɔse: ‘Mendwenle mɔɔ menli ka la anwo. Mɔɔ hyia me la a le kɛ mekɛnwu ye kɛ wɔyɛ nzenzaleɛ mɔɔ fɛta la. Toa mɔɔ ɛlɛyɛ la azo.’ Yɛ abusua asetɛnla ne ɛtɛyɛle kpalɛ zɛhae ɛlɛ!”—Viniana.