Gyisɛse Ewule Nee Ye Ewudwazo​—Mɔɔ Bɛkile Bɛmaa Wɔ La

Bɛambɔ sonla kɛ ɔwu

“[Gyihova] Nyamenle manle sonla hɔdɛnlanle Yidɛn tola ne anu kɛ ɔyɛ nu egyinli na ɔziezie ɛkɛ. Ɔzele ye kɛ, ‘Ɛkola ɛdi bakama biala mɔɔ wɔ tola ye anu la bie, na kpalɛ nee ɛtane ɛnwunlɛ baka ne, yemɔ mmadi ye ma ne bie, ɔluakɛ kenle ko ne mɔɔ ɛkɛli bie la, ɛbawu.’”​—Mɔlebɛbo 2:15-17.

Nyamenle bɔle nrenya ne mɔɔ lumua Adam, dole Yidɛn tola mɔɔ le azɛlɛ ye azo paladaese mɔɔ ɛbɔ nu nane nee mbaka ngɛnlɛma wɔ nu la anu. Ɛnee mbakama ngɛnlɛma mɔɔ Adam bahola ali bie la wɔ ɛkɛ. Noko, Gyihova Nyamenle hanle hilele Adam kɛ ɔmmadi bakama fɔɔnwo bie mɔɔ wɔ ɛkɛ la, na ɔbɔle Adam kɔkɔ kɛ ɔdi bie a ɔbawu.

Asoo Adam dele mɛla ɛhye abo? Ɛnee ɔze ewule deɛ holɛ; ɛnee ɔnwu kɛ nane ne mɔ wu. Saa bɛbɔle Adam kɛ awieleɛ bɔkɔɔ ne ɔbawu a, anrɛɛ nvasoɛ biala ɛnle Nyamenle kɔkɔbɔlɛ ne azo. Emomu, Adam nwunle kɛ saa ɔtie Nyamenle na yeanli zɔhane bakama ne bie a, ɔbadɛnla aze dahuu​—ɔnrɛwu.

Bie mɔ die di kɛ baka ne gyi ɛkɛ maa nla nwo ngitanwolilɛ, noko ɛhye ɛnle nɔhalɛ. Yeanyɛ boɛ fee la, ɛnee Gyihova kpondɛ kɛ Adam nee ɔ ye Yive ‘wo, na bɛyɛ mɔnwo mɔnwo’ na ‘bɛyi azɛlɛ ye na bɛsie azɛlɛ ne.’ (Mɔlebɛbo 1:28) Baka kpalɛ a bɛduale ye kɛ ɔmmadi a. Gyihova vɛlɛle ye “kpalɛ nee ɛtane ɛnwunlɛ baka” ɔluakɛ ɛnee ɔgyi ɛkɛ ɔmaa adenle mɔɔ ɔlɛ kɛ ɔkile alesama mɔɔ le kpalɛ anzɛɛ ɛtane la. Saa Adam anli zɔhane bakama ne a, anrɛɛ ɔbahile kɛ ɔyɛ tieyɛ yɛɛ eza ɔ nye sɔ Ahenle mɔɔ bɔle ye na yeyila ye dɔɔnwo la.

Adam wule ɔluakɛ yeandie Nyamenle

“Na [Nyamenle] zele Adam kɛ, ‘Kɛmɔ . . . wɔli bakama ne mɔɔ menzele wɔ kɛ ɛmmadi la bie la ati, . . . Ɛbahwi ɛ ti anwo na wɔanyia aleɛ wɔali, kɔkpula mekɛ mɔɔ ɛkɛzia ɛkɛhɔ azɛlɛ ye anu bieko la, ɔluakɛ nuhua yɛɛ ɛvi ɛrale a; ɛle ndɛtɛlɛ na ɛbazia wɔahɔ ndɛtɛlɛ nu.’”​—Mɔlebɛbo 3:17, 19.

Adam lile bakama mɔɔ ɛnee bɛdua ye kɛ ɔmmadi la. Ɛnee anyebolo wɔ anzosesebɛyɛlɛ ne anu. Ɔle atuadelɛ, ɔ nye mɔɔ ɔbule ɔguale ninyɛne kpalɛ mɔɔ Gyihova ɛyɛ ɛmaa ye kɔsɔɔti azo la. Adam kpole Gyihova ɔlua bakama ne mɔɔ ɔlile bie la ati, ɔkpale kɛ ɔbali ɔ ti anwo na ɛhye vale ngyegyelɛ dɔɔnwo rale.

Awieleɛ bɔkɔɔ ne, Adam wule kɛmɔ ɛnee Gyihova ɛha ɛdo ɛkɛ la. Nyamenle “vale ndɛtɛlɛ nwonle” Adam na ɔzele ye kɛ ‘ɔbazia yeahɔ azɛlɛ ye anu bieko.’ Adam angakyi debie gyɛne bie anzɛɛ andɛnla aze bieko wɔ sunsum nu ɛleka bie. Ɔwule la, ɔrayɛle kɛ ndɛtɛlɛ ne mɔɔ bɛvale bɛbɔle ye mɔɔ ngoane ɛnle nu la.​—Mɔlebɛbo 2:7; Nolobɔvo ne 9:5, 10.

Yɛwu ɔluakɛ yɛvi Adam anu a yɛrale a

“Yemɔti kɛmɔ ɛtane luale sonla ko anwo zo a rale ewiade, na sonla ko ne ɛtane ne vale ewule rale la, yɛɛ ewule dele kpondenle aleɛabo amra anwo zo a, ɔluakɛ menli kɔsɔɔti ɛyɛ ɛtane.”​—Wulomuma 5:12.

Adam anzosesebɛ anzɛɛ ɛtane ne ɛva ngyegyelɛ dɔɔnwo ɛra. Ɔlua Adam ɛtane ne ati, tɛ ɛvolɛ 70 anzɛɛ 80 ala a yeminli ye a, emomu dahuu ngoane nwo anyelazo. Bieko, mekɛ mɔɔ Adam yɛle ɛtane la, yeanli munli bieko na ɔvale sinlidɔlɛ ɔmanle ɔ bo zo amra kɔsɔɔti.

Yɛ muala yɛle Adam abozoamra. Yemaa yɛnyia sinlidɔlɛ mɔɔ maa yɛyɛ ɛtane na awieleɛ ne yɛwu mɔɔ tɛ yɛdayɛ a yɛkpondɛle a. Pɔɔlo hilehilele yɛ tɛnlabelɛ ne anu. Ɔhɛlɛle kɛ: “Mele nwonane nu debie mɔɔ bɛdɔne me kɛ kanranli bɛmaa ɛtane a. Me nwo yɛ anwunvɔne kpole! Na nwane a kɛlie me kɛvi nwonane ɛhye asa nu, mɔɔ ɔ nee me ɛlɛkɔ ewule nu a?” Pɔɔlo mumua ne buale kpuyia ɛhye kɛ: “Melua yɛ Awulae Gyisɛse Kelaese anwo zo meyɛ Nyamenle mo.”​—Wulomuma 7:14, 24, 25.

Gyisɛse vale ye ngoane dole ɛkɛ amaa yɛadɛnla aze dahuu

“Selɛ ne ɛzoa ɔ Ra ne kɛ yemɔ a ɔle ɛtane ewiade ye amra ngoanedievolɛ a.”​—1 Dwɔn 4:14.

Gyihova Nyamenle ɛyɛ nziezielɛ mɔɔ ɔbalua zo yealie yɛ yeavi ɛtane nee ewule nu. Kɛzi? Ɔzoanle ye kulovolɛ Ralɛ ne ɔmanle bɛwole ye kɛ dasanli mɔɔ di munli kɛ Adam la. Noko, Gyisɛse anyɛ kɛ Adam la “yeanyɛ ɛtane biala.” (1 Pita 2:22) Ɔluakɛ ɔdi munli la ati, ɛnee ɔnle ewule tumi bo yɛɛ anrɛɛ ɔbahola yeadɛnla aze dahuu.

Noko akee, Gyihova manle adenle manle ye agbɔvolɛ hunle Gyisɛse. Ye kenle nsa ne azo, Gyihova dwazole ye rale ngoane nu kɛ sunsum nu abɔdeɛ amaa yeahola yeazia yeahɔ anwuma. Gyisɛse vale ye dasanli ngoane bolɛ mɔɔ sonle la hilele Nyamenle wɔ anwuma lɔ amaa yeadua mɔɔ Adam ɛmaa yebɔ ye nee ɔ bo zo amra la anwo kakɛ. Gyihova liele afɔlebɔlɛ ɛhye dole nu, na yeyɛ boɛ kɛ bɛdabɛ mɔɔ bɛkɛnyia Gyisɛse anu diedi la kɛnyia dahuu ngoane.​—Wulomuma 3:23, 24; 1 Dwɔn 2:2.

Yemɔti Gyisɛse manle yɛ sa hanle mɔɔ Adam manle ɔvile yɛ sa la. Ɔwule ɔmanle yɛ amaa yɛahola yɛadɛnla aze dahuu. Baebolo ne ka kɛ: ‘Gyisɛse wule nyane ewule. Nyamenle luale ɔdaye ye ɛlolɛ zo yɛɛ ɔmanle ɔwule wɔ awie biala ati a.’​—Hibuluma 2:9.

Nziezielɛ ɛhye maa yɛnwu Gyihova kpalɛ. Ye pɛlepɛlelilɛ nwo ngyinlazo ne mɔɔ kpogya la ɛmmaa alesama mɔɔ ɛnli munli la ɛngola ɛnlie bɛ nwo ngoane. Noko, ye ɛlɔlɛ nee ye anwunvɔnezelɛ ne manle ɔminlinle debie kpole ɔvale ɔlile ɔdaye ye ngyinlazo zo​—ɔ Ra ne mɔɔ ɔvale ɔmanle kɛ mgbɔdalɛdeɛ la.​—Wulomuma 5:6-8.

Bɛdwazole Gyisɛse bɛvile ewule nu na bɛbadwazo menli gyɛne noko

‘Nɔhalɛ ne a le kɛ Nyamenle ɛdwazo Kelaese ɛvi ewule nu, kɛ bɛdabɛ mɔɔ bɛla wɔ ewule nu la anu ma mɔɔ lumua. Ɔluakɛ kɛmɔ ewule luale sonla ko anwo zo a rale la, zɔhane ala yɛɛ ewudwazo ne lua sonla ko anwo zo ɛra a. Kɛmɔ menli kɔsɔɔti dua Adam anwo zo wu la, zɔhane ala yɛɛ Nyamenle balua Kelaese anwo zo adwazo bɛ muala ara ngoane nu a.’​—1 Kɔlentema 15:20-22.

Ɔda ali wienyi kɛ Gyisɛse dɛnlanle aze na ɔwule, noko daselɛ boni a kile kɛ bɛdwazole ye bɛvile ewule nu a? Mɔɔ di daselɛ kpole kɛ bɛdwazole Gyisɛse la a le kɛ ɔyele ɔ nwo ɔhilele menli dɔɔnwo wɔ mekɛ nee ɛleka ngakyile. Kenle ko bie, ɔyele ɔ nwo ɔhilele menli mɔɔ bo 500 la. Ɛzoanvolɛ Pɔɔlo hɛlɛle kɛlata hɔmanle Kɔlentema na ɔzile zolɛ kɛ bɛdabɛ mɔɔ bɛdi nwolɛ daselɛ la bie mɔ tɛte aze, kile kɛ bɛkola bɛdi mɔɔ bɛnwunle ye nee mɔɔ bɛdele la anwo daselɛ.​—1 Kɔlentema 15:3-8.

Mɔɔ hyia titile la, mekɛ mɔɔ Pɔɔlo hɛlɛle kɛ Kelaese le ‘ma mɔɔ lumua’ mɔɔ bɛdwazo ye la, ɛnee ɔlɛkile kɛ bɛbadwazo menli gyɛne noko amozi! Gyisɛse mumua ne hanle kɛ mekɛ ɛlɛba mɔɔ ‘bɛdabɛ mɔɔ bɛwɔ ngakyelɛ nla nu la amuala vi bɛ nla ne mɔ anu bavinde.’​—Dwɔn 5:28, 29.

Ɔwɔ kɛ yɛdie Gyisɛse yɛdi amaa yɛadɛnla aze dahuu

“Nyamenle hulole ewiade amra kpole kpalɛ la ati yɛɛ ɔvale Ɔ Ra kokye ne ɔmanle a, amaa awie biala mɔɔ kɛlie ye kɛli la anwu na yeanyia ngoane mɔɔ ɛnlɛ awieleɛ.”​—Dwɔn 3:16.

Baebolo ne mukelɛ mɔɔ lumua la ka mekɛ mɔɔ ewule rale na Paladaese minlinle la anwo edwɛkɛ. Mukelɛ ne mɔɔ li awieleɛ la ka mekɛ mɔɔ bɛbaye ewule bɛavi ɛkɛ na Nyamenle ava Paladaese ara azɛlɛ ye azo bieko la anwo edwɛkɛ. Akee menli anye balie na bɛakpazi wɔ ɛbɛlabɔlɛ nu dahuu. Yekile 21:4 se: “Ewule ɛnle ɛkɛ bieko .” Ngyɛnu 5 ne si ɛwɔkɛ ɛhye azo kɛ: “Edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ.” Gyihova kola maa ye ɛwɔkɛ biala ba nu.

Ɛdie ɛdi kɛ “edwɛkɛ ɛhye mɔ le nɔhalɛ yɛɛ bɛfa bɛ rɛle bɛto zolɛ a ɔyɛ boɛ” ɔ? Akee sukoa Gyisɛse Kelaese anwo edwɛkɛ dɔɔnwo na nyia ye nu diedi. Saa ɛyɛ ye zɔ a, ɛbanyia Gyihova anyunlu ɛlolɛ. Ɛbanyia nyilalɛ kɛkala na eza wɔanyia dahuu ngoane wɔ azɛlɛ ye azo Paladaese ne anu, mɔɔ ewule ɛnle ɛkɛ bieko, “nyane ɛnle ɛkɛ, ɛzunlɛ ɛnle ɛkɛ ne bieko.”