BAEBOLO KPUYIA MƆƆ BƐBUA
Kɛ ɔkɛyɛ na ngakula azukoa na bɛahulo Nyamenle ɛ?
Fa abɔdeɛ kilehile ɛ mra maa bɛnwu Nyamenle na bɛhulo ye
Saa ɛ mra bahola azukoa na bɛahulo Nyamenle a kyesɛ bɛnwu daselɛ mɔɔ kile kɛ ɔwɔ ɛkɛ na ɔkulo bɛ la. Saa bɛbahulo Nyamenle a, ɔwɔ kɛ bɛnwu ye. (1 Dwɔn 4:8) Kɛ neazo la, ɔwɔ kɛ bɛnwu ɛhye: Bodane boni ati a Nyamenle bɔle sonla a? Kɛmɔti a Nyamenle maa amaneɛnwunlɛ nwo adenle ɛ? Duzu a Nyamenle bayɛ amaa alesama kenlebie a?—Bɛgenga Felepaema 1:9.
Amaa wɔaboa ɛ mra na bɛahulo Nyamenle la, ɔwɔ kɛ ɛmaa bɛnwu ye kɛ ɛkulo ye. Saa bɛnwu ye zɔ a, ɔda ali kɛ bɛbali wɔ neazo ne anzi.—Bɛgenga Mɛla ne 6:5-7; Mrɛlɛbulɛ 22:6.
Kɛ ɔkɛyɛ na wɔamaa yeaha ɛ mra ahonle ɛ?
Nyamenle Edwɛkɛ ne lɛ tumi. (Hibuluma 4:12) Yemɔti boa ɛ mra maa bɛzukoa ye ngilehilelɛ mɔɔ hyia la. Amaa Gyisɛse edwɛkɛ aha menli ahonle la, ɔbizale kpuyia, ɔdiele bɛ, na ɔhilehilele Ngɛlɛlera ne anu. Ɛbahola wɔazukoa kɛzi Gyisɛse hilehilele la, amaa wɔ edwɛkɛ aha ɛ mra ahonle.—Bɛgenga Luku 24:15-19, 27, 32.
Bieko, Baebolo ne anu edwɛkɛ mɔɔ kile kɛzi Nyamenle nee menli luale la kola boa ngakula maa bɛnwu Nyamenle na bɛkulo ye. Mbuluku mɔɔ di bodane ɛhye anwo gyima la wɔ www.jw.org/nzi.—Bɛgenga 2 Temɔte 3:16.