BAEBOLO KPUYA MƆƆ BƐBUA
Duzu a maa awie yɛ awovolɛ kpalɛ a?
Asoo ɛkilehile ɛ mra ɛmaa bɛkulo Nyamenle?
Awuke mɔɔ awovolɛ ne mɔ lɛ ɛlɔlɛ nee ɛbulɛ maa bɛ nwo la le ɛleka kɛnlɛma maa ngakula ɛtetelɛ. (Kɔlɔsaema 3:14, 19) Awovolɛ kpalɛ kulo bɛ mra na bɛkanvo bɛ, kɛmɔ Gyihova Nyamenle hanvole ɔ Ra ne la.—Kenga Mateyu 3:17.
Yɛ anwuma Selɛ ne tie ye azonvolɛ, na ɔze kɛzi bɛte nganeɛ la. Ɔle kpalɛ kɛ awovolɛ bɛazukoa ye na bɛadie mɔɔ bɛ mra ka la. (Gyemise 1:19) Ɔwɔ kɛ bɛnwu bɛ mra ne mɔ nganeɛdelɛ nee edwɛkɛ ɛtane mɔɔ bɛka la.—Kenga Ɛdianlɛ 11:11, 15.
Kɛzi bɛtete ngakula bɛmaa bɛyɛ tieyɛ ɛ?
Kɛmɔ ɛle awovolɛ la ati, ɛlɛ adenle ɛdi mɛla. (Ɛfɛsɛsema 6:1) Sukoa Nyamenle neazo ne. Ɔda ɛlɔlɛ ali ɔkile ɔ mra ɔlua mɛla mɔɔ ɔkilehile nu nee mɔɔ saa bɛyɛ anzosesebɛ a ɔbavi nu yeara la anu ɔkile bɛ. (Mɔlebɛbo 3:3) Noko kɛ anrɛɛ ɔbayɛ ye kyengye kɛ menli ɛyɛ tieyɛ la, ɔkilehile bɛ nvasoɛ mɔɔ bɛbanyia bɛavi kpalɛyɛlɛ zo la.—Kenga Ayezaya 48:18, 19.
Fa yɛ wɔ bodane kɛ ɛbahilehile ɛ mra wɔamaa bɛahulo Nyamenle. Bɛbayɛ bɛ debie nrɛlɛbɛ nu wɔ mekɛ bɔbɔ mɔɔ bɛnle ɛ nwo ɛkɛ la. Kɛmɔ Nyamenle fa neazo kilehile yɛ la, ɛdawɔ noko fa wɔ neazo kilehile ɛ mra.—Kenga Mɛla ne 6:5-7; Ɛfɛsɛsema 4:32; 5:1.