Ɛbalie Ɛzonlenlɛ Wɔali Wɔ Ezukoa Nwo Ɔ?

Ɛnee Estellea nee ɔ mra ngakula dɔɔnwo kɔ asɔne dahuu. Ɔka kɛ, “Menganle mengilele ɛsɔfo ne kɛ mekulo kɛ mesukoa Baebolo ne.” Noko yeangile ye debie ɛlɛ. Awieleɛ kolaa ne, ɔgyakyile asɔnehɔlɛ. Ɔdoale zo kɛ: “Asɔne mgbanyima ne mɔ hɛlɛle me na bɛhanle kɛ saa menrɛhola ba a, menva ezukoa menwa bɛ. Mendwenlenle nwolɛ kɛ, ‘Saa meangɔ a ɔnvale bɛ nwo; me ezukoa ne ala a bɛkpondɛ a.’”

Angelina, mɔɔ kɔ asɔne dahuu la ka kɛ: “Wɔ me asɔne ne anu, ɛzonlenlɛ ko biala mɔɔ bɛkɛyɛ la bɛfa kyɛnze bɛfa yɛ nyunlu fane nsa, na bɛ nye la kɛ mekɛ biala yɛbado debie nu. Dahuu bɛdie ezukoa. Menzuzule nwolɛ kɛ, ‘Nyamenle sunsum ne ɛnle bɛ nwo zo.’”

Ɛzonlenlɛ mɔɔ wɔ ɛleka mɔɔ ɛwɔ la, sɛlɛ anzɛɛ piepia menli maa bɛye ezukoa ɔ? Asoo ɛhye nee Baebolo ne yia?

DUZU A BAEBOLO NE KILEHILE A?

Gyisɛse mɔɔ vale Keleseɛnezonlenlɛ ziele ɛkɛ la hanle kɛ: ‘Bɛnyianle ye mgbane, bɛva bɛmaa mgbane.’ (Mateyu 10:8) Bɛndɔne Baebolo ne anu edwɛkɛ ne mɔɔ sonle bolɛ la yɛɛ ɔwɔ kɛ awie biala mɔɔ kulo la te bie.

Kɛzi alumua Keleseɛnema duale asafo ne anwo kakɛ ɛ?

“Awie biala ɛva mɔɔ yezuzu nwo wɔ ye ahonle nu la ɛmaa. Ɔmmatwenlehwenle ɔ bo aze anzɛɛ ɔyɛ ye kɛ asɛɛ yemia la ati ɔ, ɔluakɛ Nyamenle kulo sonla mɔɔ te ɔ nyunlu kyɛ debie la.” (2 Kɔlentema 9:7) Ɛzoanvolɛ Pɔɔlo hanle kɛ: “Yɛyɛle gyima nɔɔzo nee ewiazo, amaa yɛanyɛ kpomgbolo yɛamkpolo bɛ kɔme wɔ mekɛ mɔɔ yɛka Edwɛkpa ne mɔɔ vi Nyamenle ɛkɛ ne la yɛahile bɛ la.” (1 Tɛsalonaekama 2:9) Pɔɔlo yɛle ɛdanlɛ sua nwo gyima vale boale ye ɛzonlenlɛ gyima ne.​—Gyima ne 18:2, 3.

KƐZI GYIHOVA ALASEVOLƐ YƐ BƐ ƐDEƐ NE Ɛ?

Gyihova Alasevolɛ ta yia wɔ azua sikalɛ mɔɔ bɛfɛlɛ ye Belemgbunlililɛ Asalo la anu. Kɛzi bɛtua kakɛ mɔɔ bɛbɔ la ɛ? Bɛnva kyɛnze bɛnva awie mɔ anyunlu bɛnlielie ezukoa, yɛɛ bɛmmaa bɛ ɛnvulopu bɛnva bɛnzɛlɛ ezukoa. Emomu, awie biala mɔɔ anye die sunsum nu gyimalilɛ nwo la fi nrɛlɛbɛ nu ye ezukoa to ndoboa ɛlɛka mɔɔ gyi Belemgbunlililɛ Asalo ɛkɛ la anu.

Ɔda ali kɛ ɔhyia ezukoa na bɛayɛ magazine ɛhye bɛava bɛanwa. Noko akee, ɛnrɛnwu kɛ bɛlɛbɔ nwolɛ nolo anzɛɛ bɛlɛsɛlɛ kɛ bɛboa bɛ wɔ ezukoa afoa nu. Baebolo nu nɔhalɛ ne mɔɔ bɛmaa menli anwu ye la a hyia bɛ titile a.

Kɛzi ɛdwenle nwo ɛ: Asoo kɛzi bɛtua kakɛ mɔɔ bɛbɔ la nee Gyisɛse edwɛkɛ ne yɛɛ alumua Keleseɛnema neazo ne le ko?