EDWƐKƐ TITILE: EWIADE MƆƆ ADWENLETANE ƐNLE NU—KENLENZU?

Adwenletane—Ɔwɔ Ewiade Amuala

JONATHAN, le Koreanli mɔɔ bɛwole ye wɔ America. Ye ngakula nu, ɛnee menli lɛ ɔ nwo adwenletane. Mekɛ mɔɔ ɔnyinle la ɔhɔdɛnlanle ɛleka mɔɔ menli ɛnrɛnyia ɔ nwo adwenletane la. Ɔyɛle dɔketa wɔ sua ekyi bie mɔɔ wɔ Alaska sɔlɔ wɔ U.S.A. la. Ɛkɛ ne ɛnee menli dɔɔnwo mɔɔ ɔyɛ bɛ ayile la anwo nane le kɛ ye ɛdeɛ ne la. Ɛnee ɛyɛlɛ ne anloa yɛ se wɔ ɛkɛ, noko ɛnee ɔle kpalɛ ɔtɛla ɔ nwo adwenletane, na ɔnyianle adwenle kɛ akee ɔ nwo ɛdɔ ye wɔ adwenletane nwo.

Mekɛ bie mɔɔ ɔyɛle raalɛ bie mɔɔ ɛli ɛvolɛ 25 ayile la, mɔɔ zile la manle ɔnwunle ye kɛ ye ngyegyelɛ ne abo ɛtɛpɛle. Ɛnee raalɛ ne ɛdɔ mumule na mekɛ mɔɔ ɔ nye rale zo la ɔnleanle Jonathan anyunlu na ɔdendɛle ɔtiale ye ɔvale ɔhilele kɛ ɔngulo Koreama edwɛkɛ fee. Edwɛkɛ ne yɛle Jonathan nyane na ɔmanle ɔnwunle kɛ mɔdenle biala mɔɔ yebɔ kɛ ɔtu yeahɔ ɛleka mɔɔ menli ɛnrɛnyia ɔ nwo adwenletane la ɛyɛ mgbane.

Mɔɔ dole Jonathan la maa yɛnwu alɔbɔlɛ edwɛkɛ mɔɔ ɛlɛkɔ zo la. Adwenletane wɔ ewiade amuala, kyesɛ ɛleka mɔɔ menli ɛnle ɛkɛ la.

Adwenletane ɛbu zolɛ ɛdeɛ, noko menli dɔɔnwo anye ɛnlie nwolɛ. Edwɛkɛ ɛhye yɛ nwanwane kpalɛ. Kɛzi debie mɔɔ menli dɔɔnwo anye ɛnlie nwolɛ la kola bu zo ɛ? Ɔda ali kɛ menli dɔɔnwo mɔɔ ɛngulo adwenletane la ɛnnwu ye kɛ bie wɔ bɛ nwo. Ɔle zɔ wɔ wɔ afoa nu ɔ? Kɛzi ɛbabua zɔhane kpuyia ne ɛ?

ƆWƆ AWIE BIALA ANWO

Yɛze o yɛnze o, ɔyɛ se kɛ yɛbanwu kɛ adwenletane wɔ yɛ ahonle nu. Baebolo ne kile deɛmɔti ɔle zɔ la ɔhanle kɛ: “Ahonle le mɛlɛbɛla tɛla debie biala” (Gyɛlɛmaya 17:9, Holman Christian Standard Bible) Ɛhye ati, yɛbahola yɛabɛlɛbɛla yɛ nwo na yɛazuzu kɛ yɛdie menli kɔsɔɔti yɛto nu. Bie a yɛbahola yɛava edwɛkɛ yɛaye yɛ nloa kɛ ɔfɛta kɛ yɛnyia menli ekpunli bie anwo adwenletane.

Saa ɛnwu debie zɛhae a boni a ɛyɛ ye wɔ nwolɛ a?

Amaa wɔanwu kɛzi ɔyɛ se kɛ ɛbanwu kɛ ɛlɛ adwenletane vea wɔ nu la, nea edwɛkɛ ɛhye: Fa ye kɛ ɛlua adenle bie mɔɔ awozinli wɔ zo la azo wɔ nɔsolɛ nu. Mgbavolɛ nwiɔ mɔɔ ɛnze bɛ la ɛlɛbikye wɔ. Bɛ nwo yɛ se, na ɔzɔho kɛ bɛ nuhua ko lɛ debie wɔ ɔ sa nu.

Ɛbaha kɛ mgbavolɛ ne mɔ ɛmaa wɔ ahonle ɛdu ɔ? Nɔhalɛ nu, anwubielɛ bie mɔɔ wɔnyia la bamaa wɔanlea ɛ nwo boɛ ɛdeɛ, noko asoo zɔhane anwubielɛ ne maa wɔ edwɛkɛ ne yɛ nɔhalɛ kɛ mgbavolɛ nwiɔ ɛhye anwo yɛ ɛzulolɛ ɔ? Kpuyia mɔɔ yɛbava yɛayɛ neɛnleanu kpalɛ la bayɛ, menli ekpunli anzɛɛ aneɛ boni a ɛfa ɛsuzu bɛ a? Wɔ mualɛ ne bamaa mɔɔ wɔ wɔ ahonle nu la ala ali. Ɔbahola yeahile ye bɔkɔɔ kɛ, ɛzo adwenletane ɛlua.

Saa yɛbaha nɔhalɛ a, ɔwɔ kɛ yɛdie yɛto nu kɛ adwenletane wɔ yɛ kɔsɔɔti yɛ nwo. Baebolo ne bɔbɔ die to nu kɛ adwenletane wɔ ɛkɛ wɔ mekɛ mɔɔ ɔka kɛ: “Menli gyinla kɛzi awie mɔ de la azo bua bɛ ndɛne” la. (1 Samoɛle 16:7, Contemporary English Version) Kɛmɔ subane ɛhye wɔ yɛ kɔsɔɔti yɛ nwo—na ɔta ɔfa esiane ɔba la—asoo anyelazo bie wɔ ɛkɛ kɛ yɛbahola yɛahomo adwenletane zo anzɛɛ yɛaye yɛavi yɛ ɛbɛlabɔlɛ nu? Asoo mekɛ bie bara mɔɔ adwenletane bavi ewiade amuala?

ADWENLETANE KƆ ZO WƆ EWIADE AMUALA

Canada: “Ɔnva nwo kɛ maanle ne ɛlie menli ngakyile ɛdo nu na bɛyɛ nwolɛ mɛla ngakyile kɛ bɛfa bɛabɔ ekpunli ngakyile nwo bane la, nyeyenu ɛhɔ zo ɛyɛ sonla adenlenyianlɛ nwo ngyegyelɛ.”—Amnesty International edwɛkɛ sikalɛ maa Canada, 2012.

Europe: “Menli mɔɔ wɔ Europe la ɛya ko ngyɛnu 48 die di kɛ bɛnyɛ ɛhwee wɔ nyeyenu mɔɔ kɔ zo wɔ bɛ maanle ne anu la anwo.”—Intolerance, Prejudice and Discrimination: (Kyengyeyɛlɛ, Adwenletane Nee Nyeyenu) A European Report, 2011.

Africa: “Basabasayɛlɛ nee nyeyenu mɔɔ tia mraalɛ la ɛbu zo wɔ maanle dɔɔnwo anu.”—Amnesty International Report 2012.

Nepal: “Dalits (“menli mɔɔ bɛmbu bɛ”) nwu nyeyenu wɔ bɛ maanle nu, titile ezukoa, menli avinli nee amaamuo edwɛkɛ nu.”—Human Rights Watch World Report, 2012.

Europe Aduduleɛ: “Bɛngulo bɛ edwɛkɛ wɔ maanɔne yɛɛ bɛlɛ bɛ nwo adwenletane wɔ bɛ sua zo, Roma menli mɔɔ wɔ Europe aduduleɛ la ngyegyelɛ ne, maanyɛlɛnli biala ɛmkpondɛ ye sɔbelɛ.”