Yɛyɛ Dahuu Ɛzonlenlɛ Gyima Ne Ɛvolɛ 50 Wɔ Arctic Circle Ne Anwo

BƐWOLE yɛ bɛdole abusua bie mɔɔ bɛle ɛyazonlɛma mɔɔ ngakula bulu a wɔ nu na bɛwɔ Ostrobothnia Sɔlɔ wɔ Finland la anu. Ewiade Konle II hanle yɛ kpalɛ wɔ yɛ ngakula nu. Ɔwɔ nuhua kɛ ɛnee yɛmbikye ɛleka mɔɔ bɛhonle kpole la kpalɛ ɛdeɛ, noko konle ne manle ɛzulolɛ kpole hanle yɛ. Mekɛ mɔɔ bɛdole bɔmbo wɔ azuamgbole Oulu nee Kalajoki mɔɔ bɛbikye yɛ azo la, yɛnwunle esike kɔkɔlɛ ne mɔɔ vole hɔle anwomanyunlu la. Saa yɛnwu kɛ konle anwumalɛne luolua anwomanyunlu a, yɛ awovolɛ ka kile yɛdayɛ mɔɔ yɛle ngakula la kɛ yɛhɔvea. Ɛhye ati, mekɛ mɔɔ yɛ diema nrenya kpanyunli Tauno hanle paladaese bie mɔɔ ɔbara azɛlɛ ye azo mɔɔ nzisi ɛnle nu anwo edwɛkɛ hilele yɛ la, yɛ nye liele nwo.

Tauno zukoale Baebolo ne anu nɔhalɛ ne vile Baebolo Sukoavoma ne ɛkɛ. Na ɛnee yeli ɛvolɛ 14. Mekɛ mɔɔ Ewiade Konle II bɔle ɔ bo la, yeamkponle kɛ ɔbahɔ sogya ɔlua Baebolo ne mɔɔ yeva yetete ye adwenle la ati, yemɔti bɛvale ye bɛdole efiade. Bɛanva ɔ nwo bɛangyɛ ye fee. Ɛhye manle kpɔkɛ mɔɔ yezi kɛ ɔsonle Gyihova la anu yɛle se emomu, na mekɛ mɔɔ bɛyele ye bɛvile efiade ne la, ɔvale wuluwuluyɛlɛ ɔhanle edwɛkɛ ne. Yɛ diema nrenya ne neazo ne hanle yɛ manle yɛhɔle Alasevolɛ ne mɔ debiezukoalɛ ne mɔɔ ɛnee bɛyɛ ye wɔ namule ne mɔɔ ɔbikye yɛ azo la bie. Eza yɛhɔle maangyeba nyianu, ɔnva nwo kɛ ɛnee ɔwɔ kɛ yɛmia yɛ nwo na yɛanyia ezukoa yɛahɔ la. Yɛkpomgbale ninyɛne yɛmanle yɛ kpalɛzoamra, yɛluale anweɛ, na yɛsesale bakama. Kɛmɔ ɛnee yɛlɛ gyima dɔɔnwo yɛyɛ ye wɔ yɛ ɛya nu la ati, ɛnee yɛnda yɛmbɔ nu yɛngɔ nyianu.

Gyihova nee ye bodane ne mɔ anwo nɔhalɛ ne mɔɔ yɛnwunle ye la manle ɛlɔlɛ mɔɔ ɛnee yɛlɛ yɛmaa ye la yɛle kpole, yemɔti yɛzile kpɔkɛ yɛyilale yɛ nwo zo yɛmanle ye. Yɛ mu nwiɔ yɛvale nzule nu ɛzɔnenlɛ yɛyɛle yɛ nwo zo mɔɔ yɛyila yɛmaa ye la anwo sɛkɛlɛneɛ wɔ ɛvolɛ 1947 ne anu—ɛnee Annikki ɛli ɛvolɛ 15 na Aili ɛli ɛvolɛ 17. Bɛzɔnenle yɛ diema raalɛ Saimi noko wɔ ɛvolɛ ko ne ala anu. Yɛ nee yɛ diema raalɛ Linnea mɔɔ ɛnee ɛgya la zukoale Baebolo ne. Ɔ nee ye abusua ne noko rayɛle Gyihova Alasevolɛ. Mɔɔ yɛzɔnenle la, yɛvale yɛziele yɛ nye zo kɛ yɛbayɛ adekpakyelɛ, yɛyɛle mekɛ ezinra nu anzɛɛ adekpakyelɛ boavolɛ ɔvi mekɛ mɔɔ kɔ mekɛ la.

YƐBƆLE DAHUU ƐZONLENLƐ GYIMA NE ABO

Wɔ ɛvolɛ 1955 ne anu, yɛdule yɛhɔle Kemi, suakpole bie mɔɔ wɔ sɔlɔ kpalɛ la azo. Ɔwɔ nuhua kɛ ɛnee yɛ mu nwiɔ yɛyɛ gyima ɛdeɛ, noko ɛnee yɛsulo kɛ saa yɛyɛ adekpakyelɛ a yɛnrɛhola yɛ nwo nea. Yɛnyianle adwenle kɛ ɔwɔ kɛ yɛdumua yɛkpondɛ ezukoa bie yɛsie. Zɔhane mekɛ ne a yɛ nee adiema raalɛ adekpakyelɛnli ne lile adwelie ne mɔɔ wɔ anwuma ɛkɛ la a. Ɔboale ɔmanle yɛnwunle kɛ saa yɛbava yɛ mekɛ kɔsɔɔti yɛazonle Gyihova a ɔngyi ninyɛne mɔɔ yɛlɛ anzɛɛ yɛ abusua ne bava amaa yɛ la angome azo. Debie mɔɔ nwolɛ hyia kpalɛ la a le kɛ yɛbava yɛ nwo yɛado yɛ anwuma Selɛ ne anwo zo.

Wɔ zɔhane mekɛ ne, ɛnee yɛzie ezukoa mɔɔ ɔbaza yɛ siane nwiɔ la. Yemɔti wɔ May 1957 ne anu yɛbizale kɛ bɛmaa yɛhɔyɛ adekpakyelɛ siane nwiɔ wɔ Pello mɔɔ wɔ Lapland maanzinli ne anu wɔ Arctic Circle ne anwuma la. Siane nwiɔ ne dwule la, ɛnee yɛtɛfale yɛ sa yɛtɛkanle yɛ ezukoa ne yemɔti yɛbizale kɛ yɛbayɛ adekpakyelɛ siane nwiɔ bieko. Siane nwiɔ bieko anzi, ɛnee yɛ ezukoa ne kɔsɔɔti tɛbɔ ɛkɛ. Akee yɛnwunle kɛ Gyihova banlea yɛ. Yɛva ɛvolɛ 50 yɛyɛ adekpakyelɛ noko yɛ ezukoa ne tɛbɔ ɛkɛ! Saa yɛto yɛ nye yɛ nzi a, ɔle kɛ Gyihova lɛ yɛ sa na ɔlɛka yeahile yɛ kɛ: “Bɛmmasulo na mebaboa bɛ.”—Aye. 41:13.

Wɔ ɛvolɛ 1958 ne anu, yɛ maanzinli zo neavolɛ ne hanle kɛ yɛhɔyɛ adekpakyelɛ titile wɔ Sodankylä, Lapland. Zɔhane mekɛ ne ɛnee adiema raalɛ ko ala a le Dasevolɛ wɔ ɛkɛ a. Adenle mɔɔ ɔluale zo ɔnwunle nɔhalɛ ne la yɛ anyelielɛ. Ɛnee ɔ ra nrenya ne nee ye sukuluma ɛlɛkɔ ahɔnleɛnlea Helsinki mɔɔ le Finland suakpole kpalɛ la azo. Mekɛ mɔɔ ekpunli ne ɛlɛwolo suakpole ne azo la, raalɛ kpanyinli bie vale Ɛzinzalɛ Arane ko manle kakula nrenya ne, ɛnee ɔdaye a ɔli bɛ nzi kpalɛ a, na ɔzele ye kɛ ɔva ɔmaa ye mame. Kakula nrenya ne yɛle ye zɔ, na yeangyɛ ye mame nwunle nɔhalɛ ne.

Yɛhayele sua ekpumgbunli ko wɔ sua bie mɔɔ bɛti ninyɛne wɔ nu la anwuma. Ɛnee yɛyɛ debiezukoalɛ wɔ ɛkɛ. Mɔlebɛbo ne ɛnee yɛ mu nwiɔ yɛɛ adiema raalɛ ne nee ɔ ra raalɛ ko yɛɛ yɛkɔ debiezukoalɛ ne a. Ɛnee yɛbɔ nu yɛkenga deɛ ne mɔɔ yɛbazukoa la. Nzinlii, nrenya bie mɔɔ ɔ nee Alasevolɛ ne mɔ zukoale Baebolo ne la, rayɛle gyima wɔ ɛleka mɔɔ bɛti ninyɛne ne la. Ɔ nee ye abusua ne rabokale yɛ ekpunli ne anwo. Mekɛ ekyi guale nu la, ɔ nee ɔ ye zɔnenle. Adiema nrenya ɛhye a ɛnee akee nea yɛ debiezukoalɛ ne azo a. Bieko, mrenya mɔɔ ɛnee yɛ gyima wɔ ɛleka mɔɔ bɛti ninyɛne ne la bie mɔ rale debiezukoalɛ na bɛliele Baebolo ne anu nɔhalɛ edwɛkɛ ne bɛlile. Ɛvolɛ ekyi pɛle nu la, yɛ ekpunli ne rayɛle asafo.

NGYEGYELƐ MƆƆ YƐHƆLE NU

Kɛmɔ ɛnee yɛpɛ adenle tendenle na yɛahɔ daselɛlilɛ la ati, ɔmanle yɛyiale ngyegyelɛ dɔɔnwo. Saa ɔdwu wawa nu a, bie a yɛtia, yɛka bɛsekɛ, anzɛɛ ɛlɛne bɔbɔ na yɛahola yɛahɔ menli mɔɔ wɔ yɛ azɛlɛsinli ne anu la ɛkɛ. Yɛ basekɛ ne mɔ a boale yɛ kpalɛ a. Saa yɛlɛkɔ nyianu anzɛɛ yɛ awovolɛ mɔɔ ɛnee bɛmbikye yɛ la ɛkɛ noko a yɛfa yɛkɔ. Wɔ fɔsɛlɛ nu, yɛfa bɔɔso nwonlomɔ maangye ne ala yɛkɔ namule mɔɔ yɛkulo kɛ yɛkɔ zo la azo na yɛtia yɛkɔ azua nu. Saa yɛyɛ namule ko azo gyima yɛwie a, yɛtia yɛkɔ fofolɛ zo. Ɛnee ezukɔtweaba ne tɔ kpalɛ, yɛɛ tɛ mekɛ ne amuala a maanle nu te kpalɛ a. Mekɛ dɔɔnwo ne ala, yɛdua ehwili mɔɔ mgbɔnwɔ twe la agyakɛ abo zo ne mɔ anu wɔ ezukɔtweaba ne azo. Ɔdwu mekɛ ne bie a, ezukɔtweaba ne keda adenduvoma mɔɔ bɛlumua la agyakɛ abo zo ne mɔ azo, na nyenyesuo mekɛ nu ezukɔtweaba ne kolo yɛ teteletele noko ɔwɔ kɛ yɛfa zo.

Ɛyɛyɛlɛ mekɛ dwu a, yɛwula adɛladeɛ mɔɔ tu ɛyɛyɛlɛ la. Yɛwula adɛladeɛ mɔɔ bɛva nane nwoma bɛyɛ nee sɔkese nwiɔ anzɛɛ nsa nee mgbɔlaboa ndendenle. Noko akee, fane dɔɔnwo ne ala yɛ mgbɔlaboa ne mɔ azo yɛ ezukɔtweaba ngome. Saa yɛdwu sua nyunlu a, yɛye yɛ mgbɔlaboa ne na yɛkpolokpolo ezukɔtweaba ne yɛgua. Bieko, saa yɛlua ezukɔtweaba ne anu a, yɛ ɛyɛyɛlɛ adɛladeɛ ne mɔ anloa doa. Na saa ɛyɛyɛlɛ ne ba kpalɛ a, yɛ adɛladeɛ ne mɔ anloa yɛ ketee zɛhae. Yelɛ bie hanle kɛ: “Bɛlɛ diedi kpalɛ, anrɛɛ kɛzi maanle nu ɛyɛ la bɛnrɛra ɛke.” Ɛnee yɛdia adenle mɔɔ ɔbo mayelɛ nsuu (km 11) a yɛhɔ sua nu ɛkɛ a.

Ɔluakɛ ɛnee ndenle ne wowale la ati, ɛnee yɛta yɛda menli mɔɔ bɛwɔ ɛkɛ la bie mɔ anwo. Saa aleɛ ɛlɛdwo a, yɛbɔ ɔ bo yɛkpondɛ ɛleka mɔɔ yɛbala la. Azua ne mɔ anu ɛnle ngɛnlɛma kpalɛ noko menli ne te bɛ nyunlu, bɛ nye die nyɛvolɛ nwo, tɛ dabelɛ ala a bɛfa bɛmaa yɛ a, bɛmaa yɛ aleɛ noko. Ɛnee bɛta bɛfa nane le kɛ weɛlɛ anzɛɛ ezizile bɔbɔ nwoma bɛsɛ yɛ ɛkpa zo. Ɔdwu mekɛ ne bie a, yɛnyia ninyɛne kpalɛ ekyi. Kɛ neazo la, raalɛ bie mɔɔ ɛnee de sua kpole bie anu la, vale yɛ vole anwuma hɔle nyɛvolɛ sua bie mɔɔ bɛziezie nu kɛnlɛma na bɛva ɛkpa zo ɛdanlɛ fufule bɛzɛ ɛkpa ne azo la anu. Mekɛ dɔɔnwo ne ala, yɛ nee suamenle ne suzu Baebolo ne anwo yɛmaa aleɛ dwo kpalɛ. Wɔ ɛleka ko, agyalɛma ne mɔɔ vale sua ne manle yɛ la lale sua ne foa ko na yɛdayɛ noko yɛlale ye foa ko. Yɛ nee bɛ sukoa Baebolo ne dedee asɛɛ aleɛ kye. Ɛnee nrenya ne nee ɔ ye tɛkɔ zo tɛbiza kpuyia.

GYIMA MƆƆ NVASOƐ WƆ ZO

Lapland le maanle mɔɔ bɛnlɛ bie noko ɛkɛ ne le kɛnlɛma, yɛɛ ɛlobɔ biala maa ɛkɛ ne kɛnlɛma ne kakyi. Noko, yɛmɛ menli mɔɔ sulo Gyihova la yɛɛ bɛ nwo yɛ yɛ fɛ kpalɛ a. Ahonlekpalɛma mɔɔ yɛdi bɛ daselɛ la bie mɔ a le menli mɔɔ bu mbaka mɔɔ bɛrayɛ bɛ azokoɛleɛ wɔ Lapland la. Ɔdwu mekɛ ne bie a, yɛ ngakula mraalɛ nwiɔ ye ala kɔto mrenya dɔɔnwo wɔ namule ko azo. Mrenya mgbole ɛhye mɔ tie Baebolo nu edwɛkɛ ne na bɛfa anyelielɛ bɛdie mbuluku.

Yɛlɛ anwubielɛ mɔɔ yɛ anyelielɛ la dɔɔnwo. Kenle ko bie ɛnee wate ne mɔɔ wɔ bɔɔso agyinlanleɛ ne la kɔ ndɛ mitini nnu yemɔti yɛ bɔɔso ne dule gyakyile yɛ. Yɛzile kpɔkɛ yɛvale bɔɔso fofolɛ yɛhɔle namule gyɛne zo. Ɛnee yɛtɛkɔle ɛkɛ ne ɛlɛ. Yɛdwule awuke ne mɔɔ lumua la anu ala la bɛlɛra bie hanle kɛ, “Melɛkendɛ bɛ yɛɛ bɛra la.” Ɛnee yɛ nee ɔ diema raalɛ kpanyinli sukoa Baebolo ne. Ɛnee bɛlɛra ne ɛha ɛhile ɔ diema ne kɛ ɔha ɔhile yɛ na yɛrɛla ye ɛkɛ kenle zɔhane. Noko, yeande nrɛlaleɛ ne. Yɛ nee ye nee ye mbusuafoɔ mɔɔ bɛde awuke bie mɔɔ bikye bɛ anu la zukoale Baebolo ne. Yeangyɛ, yɛvale debiezukoalɛ mɔɔ yɛyɛ ye ɛkɛ ne la kɔsɔɔti yɛbɔle nu na ɛnee bɛle menli kɛyɛ bulu ne nwiɔ. Ɔvi zɔhane mekɛ ne, menli dɔɔnwo ɛvi abusua ɛhye anu ɛrayɛ Gyihova Alasevolɛ.

Wɔ 1965 ne anu, eza bɛyele yɛ bɛhɔle asafo mɔɔ yɛtɛbɔ nu kɛkala la anu wɔ Kuusamo wɔ Arctic Circle ne abo. Wɔ zɔhane mekɛ ne ɛnee nolobɔlɛma ekyi bie ala a wɔ asafo ne anu a. Mɔlebɛbo ne ɛnee yɛ azɛlɛsinli ne anu yɛ se ekyii. Ɛnee menli ne anye die bɛ ɛzonlenlɛ nwo na bɛ nye ɛnlie yɛ nwo. Noko ɛnee bɛ nuhua dɔɔnwo anye die Baebolo ne anwo, yemɔti yɛgyinlanle zo yɛbɔle adwelielilɛ bo. Ngyikyi ngyikyi yɛbɔle mɔdenle yɛnwunle kɛzi menli ne de la na wɔ ɛvolɛ nwiɔ anzi ɛnee ɔnyɛ se kɛ yɛbabɔ Baebolo ɛzukoalɛ bo.

YƐTƐYƐ ƐZONLENLƐ GYIMA NE

Ɛnɛ, yɛnlɛ anwosesebɛ kɛ dɛba ne la, noko asɛɛ yɛkɔ daselɛlilɛ alehyenlɛ biala. Mekɛ mɔɔ ɛnee Aili ɛli ɛvolɛ 56 wɔ 1987 anu la, yɛ diema nrenya ne ara ne manle Aili zukoale kale ɛhanlɛ na ɔliele kale ɛhanlɛ nwo tumi kɛlata, ɛhye ɛboa yɛ kpalɛ wɔ edwɛkɛ ne mɔɔ yɛka ye wɔ yɛ azɛlɛsinli kpole ne anu la anu. Yɛnyianle moalɛ bieko ɔvi mekɛ mɔɔ bɛzile Belemgbunlililɛ Asalo fofolɛ na yɛdule yɛhɔle sua ne mɔɔ bɛzile bɛbetanle ye anu la.

Anyuhɔlɛ mɔɔ yɛnwu ye la maa yɛ nye die kpalɛ. Mekɛ mɔɔ yɛbɔle dahuu ɛzonlenlɛ gyima ne abo wɔ Finland sɔlɔ la, ɛnee nolobɔlɛma ekyi bie ala a wɔ ɛleka kpole ɛhye a. Kɛkala asafo dɔɔnwo mɔɔ ka bɔ nu yɛ maanzinli ko la a wɔ ɛkɛ a. Menli ta biza yɛ wɔ maanzinli nee maangyeba nyianu bo saa yɛkakye bɛ a. Bie mɔ, yɛ nee awie mɔ zukoale Baebolo ne wɔ bɛ awuke nu wɔ mekɛ mɔɔ ɛnee bɛle ngakula la. Ma mɔɔ yɛluale ye wɔ ɛvolɛ dɔɔnwo anu bɔbɔ la ɛzo!—1 Kɔl. 3:6.

Yɛnyianle ɛvolɛ 50 wɔ adekpakyelɛ titile gyima ne anu wɔ ɛvolɛ 2008. Yɛda Gyihova ase kɛ yɛhola yɛboa yɛ nwo na yɛdɛnla ye gyima ne mɔɔ nwolɛ hyia la anu la. Yɛanva ninyɛne dɔɔnwo ɛkpondɛlɛ yɛanzie yɛ nye zo noko yeangyia yɛ ɛlɛ. (Edw. 23:1) Nwolɛ ɛngyia fee kɛ yɛhwenlehwenlenle yɛ bo aze wɔ mɔlebɛbo ne la! Ɔyɛ yɛ fɛ kɛ, wɔ ɛvolɛ ɛhye mɔ kɔsɔɔti anu Gyihova ɛboa yɛ yemaa ɔ nee ye ɛwɔkɛ ne mɔɔ wɔ Ayezaya 41:10 ɛyɛ ko la: “Mebamaa bɛ anwosesebɛ, mebaboa bɛ, mebava me konimlilɛ tumi ɛsalɛ ne meazɔ bɛ.”