Asoo Awie Wɔ Ɛkɛ Mɔɔ Ɔtie Nzɛlɛlɛ A?

“Ɛnee menlie menli kɛ Nyamenle wɔ ɛkɛ. Noko akee, ɛnee ɔdwu mekɛ ne bie a meyɛ nzɛlɛlɛ. Ɛnee mengola mennwu ye saa awie tie bɔbɔ a, noko ɛnee melɛ anyelazo kɛ awie tie. Ɛnee me nye ɛnlie yɛɛ menlɛ bodane wɔ ɛbɛlabɔlɛ nu. Ɛnee mesulo kɛ mebalie Nyamenle meali ɔluakɛ ɛnee melɛ adwenle kɛ menli mɔɔ anwo ɛnyɛ ɛse la angome a die Nyamenle di a.”—PATRICIA,a IRELAND.

WƆDE nganeɛ kɛ Patricia la ɛlɛ ɔ? Ɔyɛ a ɛyɛ nzɛlɛlɛ ɔnva nwo kɛ ɛngola ɛnnwu ye saa Nyamenle wɔ ɛkɛ la ɔ? Tɛ ɛ ngome a ɛte nganeɛ zɔhane a. Suzu ɛhye mɔ anwo.

◼ Britainma 2,200 mɔɔ bɛbizebizale bɛ edwɛkɛ la anu ɛya ngyɛnu 22 pɛ a hanle kɛ Nyamenle bie mɔɔ bɔle ewiade la wɔ ɛkɛ na ɔtie nzɛlɛlɛ a. Noko ɔdwu mekɛ ne bie a, menli ɛhye mɔ anu ɛya ngyɛnu 55 yɛ nzɛlɛlɛ.

◼ Neɛnleanu bie mɔɔ bɛyɛ ye wɔ maanle dɔɔnwo anu la ɛmaa yela ali kɛ menli kɛyɛ 10,000 mɔɔ ɛnlie Nyamenle ɛnli la anu ɛya ngyɛnu 30 yɛ nzɛlɛlɛ.

Duzu Ati A Bɛnlie Nyamenle Bɛnli Ɛ?

Nrenya bie mɔɔ vi England mɔɔ bɛfɛlɛ ye Allan la hanle kɛ: “Ɛnee meta meka kɛ menlie Nyamenle menli ɔluakɛ ɛnee melɛ adwenle kɛ menli te asɔne amaa bɛalua zo bɛazie menli yɛɛ bɛfa bɛkpondɛ bɛ ezukoa. Bieko, ɛnee melɛ adwenle kɛ saa Nyamenle wɔ ɛkɛ a, anrɛɛ nzisi dɔɔnwo ɛnle ɛkɛ. Noko akee, ɔdwu mekɛ ne bie a metɛnla aze koonwu metendɛ mekile ‘debie.’ Ɛnee eza mebiza me nwo kɛ, ‘Kɛ ɔyɛle mɔɔ membale ewiade ɛ?’”

Menli mɔɔ bɛngola bɛnnwu ye saa awie tie yɛ nzɛlɛlɛ la ze deɛmɔti bɛte nganeɛ zɔhane la. Fane dɔɔnwo ne ala, kpuyia ɛhye mɔ anwo mualɛ kpalɛ mɔɔ bɛnnyia ye la ati ɔ:

◼ Bɔvolɛ bie wɔ ɛkɛ ɔ?

◼ Kɛmɔti a ɛzonlenlɛ maa bɛdi ɛtane zɛhae ɛ?

◼ Duzu ati a Nyamenle maa amaneɛnwunlɛ nwo adenle a?

Saa ɛbahola wɔanyia kpuyia ɛhye mɔ anwo mualɛ a, anrɛɛ ɛbanyia anwodozo wɔayɛ nzɛlɛlɛ ɔ?

[Ɔ bo ɛkɛ ne edwɛkɛ]