Duzu Ati A Gyihova Alasevolɛ Ka Edwɛkɛ Ne Wɔ Azua Nu Ɛ?

▪ Mɛla ɛhye mɔɔ Gyisɛse vale manle ye ɛdoavolɛma ne la wɔ Baebolo ne anu: “Yemɔti bɛhɔ maanle ti nee maanle bo, bɛmaa menli ɛrayɛ me ɛdoavolɛma; . . . na bɛhilehile bɛ.” (Mateyu 28:19, 20) Ɔwɔ kɛ Keleseɛnema kɔsɔɔti di edwɛkɛ ɛhye azo ɔ? Gyisɛse ɛdoavolɛma mɔɔ lumua la dele ɔ bo zɔ. Kɛ neazo la, ɛzoanvolɛ Pita hanle kɛ: “Na [Gyisɛse zele] yɛ kɛ yɛha ɔ nwo Edwɛkpa ne yɛhile menli kɔsɔɔti, na yɛli ɔ nwo daselɛ.” (Gyima ne 10:42) Ɛzoanvolɛ Pɔɔlo noko hɛlɛle kɛ: “Ɔle me gyima mɔɔ ɔwɔ kɛ meyɛ a. Saa meambɔ Edwɛkpa ne nolo a, me gyakɔ!”—1 Kɔlentema 9:16.

Tɛ Pɔɔlo nee Pita angome a lile Gyisɛse mɛla ɛhye azo a. Ɛvoya ne mɔɔ lumua la anu Keleseɛnema kɔsɔɔti noko lile zo. Ɛnee bɛ gyima titile a le edwɛkɛhanlɛ ne. (Gyima ne 5:28-32, 41, 42) Ɛnɛ, Gyihova Alasevolɛ noko bɔ mɔdenle yɛ zɔ. Bɛbɔ “Anwuma Belemgbunlililɛ ne” nolo kɛmɔ Gyisɛse yɛle la.—Mateyu 10:7.

Nwane mɔ a ɔwɔ kɛ bɛka Belemgbunlililɛ ne anwo edwɛkɛ ne bɛkile bɛ a? Gyisɛse hanle kɛ ɔwɔ kɛ bɛka bɛkile menli mɔɔ wɔ ewiade amuala la. Ɔzele ye ɛdoavolɛ ne mɔ kɛ: ‘Bɛbali me nwo daselɛ bɛahɔdwu aleɛabo ɛleka biala.’ (Gyima ne 1:8) Ɔhanle bɔbɔ kɛ kolaa na awieleɛ ne ara la, “bɛbabɔ Edwɛkpa ɛhye mɔɔ fane Anwuma Belemgbunlililɛ ne anwo la nolo wɔ aleɛabo amuala, amaa yeayɛ daselɛlilɛ.” (Mateyu 24:14) Yemɔti ɛvoya ne mɔɔ lumua la anu Keleseɛnema bɔle mɔdenle hanle edwɛkɛ ne hilele menli kɔsɔɔti, tɛ menli mɔɔ ɛnee bɛze bɛ anzɛɛ bɛnle ɛzonlenlɛ nu la angome. (Kɔlɔsaema 1:23; 1 Temɔte 2:3, 4) Ɛnɛ noko, Gyihova Alasevolɛ bɔ mɔdenle kɛ bɛbaha edwɛkɛ ne bɛahile awie biala.a

Adenle mɔɔ le kpalɛ tɛla biala mɔɔ bɛdua zo bɛbɔ Belemgbunlililɛ edwɛkɛ ne nolo la a le boni? Gyisɛse mɔɔ ɛnee ze adenle mɔɔ bɛdua zo a bɛbanyia menli dɔɔnwo la zoanle ye ɛdoavolɛ ne mɔ wɔ azuamgbole, namunamu, nee menli awuke nu. (Mateyu 10:7, 11, 12) Wɔ Gyisɛse ewudwazo ne anzi, ye ɛdoavolɛ ne mɔ hɔle zo hanle edwɛkɛ ne wɔ “azua nu.” (Gyima ne 5:42) Bɛlile daselɛ wɔ mekɛ mɔɔ ɛnee bɛnle daselɛlilɛ nu la yɛɛ wɔ gua zo kɛmɔ Gyisɛse yɛle la. (Dwɔn 4:7-26; 18:20; Gyima ne 17:17) Ɛnɛ noko, Gyihova Alasevolɛ dua adenle ko ne ala azo ka edwɛkɛ ne kile menli kɔsɔɔti.

Gyisɛse hanle kɛ tɛ awie biala a badie edwɛkɛ ne a. (Mateyu 10:14; 24:37-39) Asoo ɔwɔ kɛ ɛhye si Keleseɛnema adenle wɔ edwɛkɛ ne ɛhanlɛ nwo? Suzu ndonwo ɛhye anwo nea: Fa ye kɛ azɛlɛkpusulɛ bie ɛzi na ɛboka menli mɔɔ bɛlɛkpondɛ menli mɔɔ ɛtɛwule la anwo, asoo ɛbagyakyi menli ne ɛkpondɛlɛ ɔluakɛ menli ekyii bie a bɛnwu bɛ kɛ bɛtɛwule la ati ɔ? Kyɛkyɛ, ɛbahɔ zo wɔakpondɛ. Gyisɛse dule ye ɛdoavolɛ ne mɔ folɛ kɛ bɛhɔ zo bɛha ɔluakɛ bɛbanyia awie bamaa yeadie Nyamenle Belemgbunlililɛ ne anwo edwɛkpa ne. (Mateyu 10:23; 1 Temɔte 4:16) Gyihova Alasevolɛ dua menli ɛhye mɔ mɔɔ bɛkɔkpondɛ bɛ wɔ bɛ azua nu la azo bɛda ɛlɔlɛ mɔɔ bɛlɛ bɛmaa Nyamenle nee bɛ gɔnwo mɔ la ali. Ɔluakɛ ngoane mɔɔ bɛbanyia la gyi Belemgbunlililɛ ne anwo edwɛkɛ mɔɔ bɛbadie na bɛali zo la azo.—Mateyu 22:37-39; 2 Tɛsalonaekama 1:8.

Baebolo ne anu edwɛkɛ zɔhane wɔ magazine ɛhye mɔɔ ɛlɛkenga la anu. Saa ɛkpondɛ nwolɛ edwɛkɛ dɔɔnwo a, mekɛ bieko mɔɔ ɛbayia Gyihova Alasevolɛ la ɛbahola wɔaha nwolɛ edwɛkɛ wɔahile bɛ, anzɛɛ kɛlɛ menli mɔɔ yɛ magazine ɛhye la.

[Ɔ bo ɛkɛ ne edwɛkɛ]