Bɛbɛlɛbɛla Wɔ Ɛlɛ Ɔ?

SAA awie mɔɔ ɛdie ye ɛdi la bɛlɛbɛla wɔ a ɔyɛ nyane kpalɛ. Bie a ɛbava ɛya, ɛbade nganeɛ kɛ yeambu wɔ, anzɛɛ yeye wɔ yemaa. Adalɛ sɛkye agɔnwolɛ nee agyalɛ; yemaa bɛli menli ndunlumi bɛli bɛ ezukoa dɔɔnwo.

Akee dwenle nwo nea, saa ɛnwu kɛ awie ɛbɔ Nyamenle anwo adalɛ ɛhile wɔ a, duzu nganeɛ a ɛbade a? Saa wɔdu ɛ nwo wɔmaa wɔ ɛzonlenlɛ ne a, ɔbagyegye wɔ kpalɛ, kɛmɔ ɔgyegyele asɔnema ɛhye mɔ la:

● “Mendele nganeɛ kɛ asɔne ne ɛye me ɛmaa.”—DEANNE.

● “Menvale ɛya. Mendele nganeɛ kɛ bɛdo me agyiba—me anyelazo nee me bodane kɔsɔɔti yɛle gyɛne.”—LUIS.

Bie a ɛnrɛlie ɛnrɛli kɛ bɛbɔ Nyamenle anwo adalɛ bɛhile wɔ. Bie a mɔɔ ɛze la vi awie mɔɔ ɛdie ye ɛdi na ɛze kɛ ɔ nye fuu ɔnrɛbɛlɛbɛla wɔ la. Ɔbahola yeayɛ wɔ awovolɛ, sɛlɛvolɛ bie, ɛsɔfo bie, anzɛɛ ɛ gɔnwo kpalɛ kpalɛ. Bie a wɔlie ngilehilelɛ bie wɔli wɔ wɔ ngoane mekɛ kɔsɔɔti anu. Noko, asoo ɛnlie ɛnli kɛ edwɛkɛ bie mɔɔ menli dɔɔnwo die di la kola yɛ adalɛ ɔ? U.S. Maanle Kpanyinli dɛba Franklin D. Roosevelt liele ɛhye dole nu, ɔhanle kɛ: “Edwɛkɛ mɔɔ bɛka bɛti nu la ɛngola ɛmmaa adalɛ ɛngakyi nɔhalɛ.”

Saa bɛbɛlɛbɛla wɔ a, kɛ ɔkɛyɛ na wɔanwu ye ɛ? Kenle ko bie Gyisɛse hanle hilele Nyamenle wɔ asɔneyɛlɛ nu kɛ: “Wɔ edwɛkɛ ne . . . le nɔhalɛ.” (Dwɔn 17:17) Ɛhɛe, yɛbahola yɛalua Nyamenle Edwɛkɛ Baebolo ne azo yɛanwu edwɛkɛ mɔɔ le nɔhalɛ nee mɔɔ le adalɛ la.

Akee maa Baebolo ne ɛhile wɔ Nyamenle anwo adalɛ nnu mɔɔ menli ɛbɔ la. Ɛbanwu kɛzi nɔhalɛ ne bahola ahakyi wɔ ɛbɛlabɔlɛ la.