Pita Nee Ananayase Bɔle Adalɛ​—Duzu A Yɛsukoa Yɛfi Nu A?

Kɛmɔ ɛze la, adalɛ a le edwɛkɛ mɔɔ ɛze kɛ ɔnle nɔhalɛ na ɛka la. Wɔbɔ adalɛ ɛlɛ ɔ?—a Mgbanyinli bɔbɔ mɔɔ kulo Nyamenle la bie mɔ bɔle adalɛ. Bie a ɛze awie wɔ Baebolo ne anu mɔɔ yɛle zɔ la. Ye duma a le Pita, mɔɔ ɛnee le Gyisɛse ɛzoanvolɛma 12 ne anu ko la. Maa yɛnlea deɛmɔti ɔbɔle adalɛ la.

Mekɛ mɔɔ bɛhyele Gyisɛse la, bɛvale ye bɛhɔle ɛsɔfo kpanyinli ne sua nu. Ɛnee nɔɔzo bulu nee nwiɔ ɛkpa nwo. Pita hɔle ɛsɔfo ne sua nu ɛkɛ mɔɔ bɛannwu ye a. Bɛde senle ne anwo la, ɛsɔfo kpanyinli ne sonvolɛ raalɛ ne mɔɔ manle Pita wolole la nwunle ye. Ɔhanle kɛ, “Ɛdawɔ noko ɛ nee Gyisɛse a lua a.” Ɛzulolɛ ti, Pita hanle kɛ ɔnle zɔ.

Baebolo ne ka kɛ amozii “bɛlɛra ko noko nwunle ye.” Ɔhanle kɛ: “Nrenya ɛhye nee Gyisɛse a lua a.” Pita kpole ye bieko. Ɔ nzi angyɛ biala, menli mɔɔ gyigyi ɛkɛ ne la rale Pita anwo ɛkɛ ne razele ye kɛ, “Ɔle nɔhalɛ bɔkɔɔ kɛ ɛboka bɛ.”

Ɛzulolɛ hanle Pita. Yemɔti ɔbɔle adalɛ fane nsa na ɔhanle kɛ: “Menze nrenya ne!” Akɔlɛ bɔle. Gyisɛse nleanle Pita, na Pita hakyele edwɛkɛ ne mɔɔ Gyisɛse hanle hilele ye wɔ dɔnehwele ekyi mɔɔ ɛze ɛhɔ la anu kɛ: “Mɔɔ akɔlɛ kabɔ la, ɛnee wɔha ye fane nsa kɛ ɛnze me.” Pita angola ɔ nwo sɔ na ɔzunle. Ɔlile nyane kpole!

Debie zɛhae bie bahola ado wɔ ɔ?— Bie a ɛnee wɔhɔ sukulu, na sukoavoma ne mɔ ɛbɔ ɔ bo ɛlɛka Gyihova Alasevolɛ anwo edwɛkɛ. Ko ka kɛ, “Bɛmbiza fɛlɛnra ne ahye.” Ko noko ka kɛ, “Bɛngo bɛmmaa bɛ maanle.” Gyɛne noko kile kɛ, “Bɛnle Keleseɛnema kpalɛ, ɔluakɛ bɛnli Bolonyia.” Akee ko kakyi ɔ nwo na ɔbiza wɔ kɛ, “Na wɔmɔ ɛnle Gyihova Dasevolɛ ɔ?” Duzu a ɛbaha a?—

Ɔwɔ kɛ ɛsiezie ɛ nwo kɛ ɛbanyia mualɛ kpalɛ kolaa na debie zɛhae bie ado wɔ. Ɛnee Pita ɛtɛsieziele ɔ nwo. Mekɛ mɔɔ ɔ nwo hyelele ye la, ɔbɔle adalɛ! Noko, ɔlile nyane wɔ mɔɔ ɔyɛle la anwo, na Nyamenle vale hyɛle ye.

Gyisɛse ɛdoavolɛma mɔɔ lumua bieko mɔɔ bɔle adalɛ la a le Ananayase. Noko, Nyamenle anva ye ɛtane nee ɔ ye Safaela ɛdeɛ angyɛ bɛ. Ɔ nee ɔ hu yɛle adwenle ko kɛ bɛbɔ adalɛ. Maa yɛnlea deɛmɔti Nyamenle anva Ananayase nee Safaela ɛtane angyɛ bɛ la.

Mekɛ mɔɔ Gyisɛse gyakyile ɛzoanvolɛma ne na ɔhɔle Nyamenle anwo lɔ wɔ anwuma la, ye kenle bulu anzi, bɛzɔnenle menli kɛyɛ 3,000 wɔ Gyɛlusalɛm. Ɛnee menli dɔɔnwo vi moamoa ɛra kɛ bɛbali Pɛntekɔso Ɛvoyia ne, na mekɛ mɔɔ bɛrayɛle Gyisɛse ɛdoavolɛma la, ɛnee bɛkulo kɛ bɛkyɛ ekyii amaa bɛazukoa bɛ diedi fofolɛ ne anwo debie dɔɔnwo. Yemɔti, Gyisɛse ɛdoavolɛma bie mɔ vale bɛ ezukoa nleanle bɛ.

Ananayase nee ɔ ye dɔnenle bɛ agyapadeɛ amaa bɛanyia ezukoa bɛaboa menli mɔɔ bɛzɔne bɛ fofolɛ la. Mekɛ mɔɔ Ananayase vale ezukoa ne rɛlɛle ɛzoanvolɛma ne la, ɔhanle kɛ mɔɔ ɔnyianle la amuala ɛne. Noko, ɛnee ɔnle zɔ! Ɔvale ezukoa ne bie ɔziele! Nyamenle manle Pita nwunle ɛhye, yemɔti Pita zele Ananayase kɛ: “Adalɛ ɛhye wɔambɔ wɔangile sonla; wɔbɔ wɔhile Nyamenle.” Ɛhye ati, Ananayase pɛle finle na ɔwule! Nzinlii, kɛyɛ dɔnehwele nsa anzi, ɔ ye noko rale. Ɛnee ɔtɛtele mɔɔ ɛzi ɔ hu anwo zo la fee, ɔdaye noko ɔbɔle adalɛ, ɔpɛle ɔfinle na ɔwule.

Ɛzukoalɛdeɛ kpole boni ɛne: Ɔhyia kɛ yɛka nɔhalɛ! Ɛhɛe, ɔwɔ kɛ yɛ muala yɛsukoa debie yɛfi nu! Noko, yɛ muala yɛfo, titile wɔ yɛ ngakula nu. Asoo ɛ nye ɛnlie kɛ Gyihova kulo wɔ na ɔbava wɔ ɛtane yeahyɛ wɔ kɛmɔ ɔvale ɔhyɛle Pita la?— Noko kakye kɛ, ɔwɔ kɛ yɛka nɔhalɛ. Saa mekɛ bie yɛfo na yɛbɔ adalɛ a, ɔwɔ kɛ yɛsɛlɛ, ɛhɛe, yɛbodo Nyamenle kɛ ɔva ɔhyɛ yɛ. Bie a mɔɔ Pita yɛle la ɛne, na bɛvale bɛhyɛle ye. Saa yɛbɔ mɔdenle kɛ yɛnrɛbɔ adalɛ bieko a, Nyamenle bava yɛ ɛtane noko ahyɛ yɛ!