Asetɛnla Mɔɔ Gyi Bodane Zo Ɛnɛ Nee Mekɛ Mɔɔ Ɛnlɛ Awieleɛ

ƐNƐ bɔbɔ ɛbahola wɔanyia asetɛnla mɔɔ gyi bodane kpalɛ zo. Wɔ adenle boni azo? Ɔlua ngyinlazo mɔɔ nrɛlɛbɛ wɔ nu mɔɔ wɔ Nyamenle Edwɛkɛ Baebolo ne anu mɔɔ ɛbali zo la azo. Maa yɛzuzu nuhua ekyi anwo.

BAEBOLO NGYINLAZO: Belemgbunli Sɔlɔmɔn hɛlɛle kɛ, “Debie kpalɛ biala ɛnle ɛkɛ ɛmmaa sonla ɛndɛla kɛ ɔkɛli na ɔkɛnlo, na ɔkɛlielie ɔ nye wɔ ye ɛvɛlɛ nwo.”—NOLOBƆVO NE 2:24.

Bɛbɔle yɛ mɔɔ kyesɛ yɛnyia gyima mɔɔ nvasoɛ wɔ zo la yɛyɛ kolaa na yɛ kunlu adwo yɛ nwo. Wɔ anwongyelelɛ kpole nu bɔbɔ a, yɛ nye bahola alie ɔlua gyima ɛsesebɛ mɔɔ yɛbava nɔhalɛlilɛ yɛayɛ la azo.

BAEBOLO NGYINLAZO: “Nyilalɛ dɔɔnwo wɔ ɛmanlɛ nu tɛla ɛlielɛ.”—GYIMA NE 20:35.

Menli dɔɔnwo ɛnwu kɛ saa bɛyɛ ninyɛne bɛmaa awie mɔ—kɛ neazo la, saa bɛfa bɛ mekɛ nee bɛ anwosesebɛ bɛboa awie mɔ wɔ anwongyelelɛ mekɛ nu a, ɔmaa bɛnyia nyilalɛ na bɛ asetɛnla di munli kpalɛ. Sɔlɔmɔn hɛlɛle kɛ, “Saa ɛyɛ na ɔkɛyɛ boɛ a, yɛ menli mɔɔ ɔwɔ kɛ ɛyɛ bɛ boɛ la boɛ.”—Mrɛlɛbulɛ 3:27.

Fa Ralph kɛ neazo. Mekɛ mɔɔ kpanyinliyɛlɛ manle ɔkpɔnenle gyima la, ɔbokale ɔ ye wɔ Keleseɛnema dahuu ɛzonlenlɛ gyima ne anu. Bɛ nuhua ko biala fa dɔnehwele dɔɔnwo yɛ ɛzonlenlɛ gyima ne siane biala, bɛtu bɛ nwo bɛmaa bɛkilehile awie mɔ Baebolo ne. Ralph ka kɛ, “Saa yɛkɔ sua nu nɔsolɛ nu a, tɛ mgbanyinli mɔɔ yɛyɛ la a maa yɛte kɛ yɛvɛ a, emomu, yɛte ɛvɛlɛ nganeɛ ɔluakɛ yɛfi yɛ ahonle nu yɛyɛ yɛ Ze ne mɔɔ wɔ anwuma la gyima ne kpalɛ. Ɔle gyima kpalɛ ɛyɛlɛ nwo ɛvɛlɛ!” Ɔ nee ɔ ye bɛ nye die ɔluakɛ bɛ asetɛnla gyi ɛmanlɛ zo.

BAEBOLO NGYINLAZO: “Agɔnwolɛma lɛ ɛhulolɛ mekɛ biala, yɛɛ anwongyelelɛ ti a bɛwo adiema nrenya a.”—MRƐLƐBULƐ 17:17.

Saa yɛka yɛ ngyegyelɛ yɛkile yɛ nwo a ɔmmaa ɔnyɛ se kɛ yɛbagyinla ɔ nloa. Francis Bacon, Nrelenza maanle nu nrɛlɛbɛvolɛ bie hɛlɛle kɛ, wɔ bɛdabɛ mɔɔ bɛnlɛ agɔnwolɛ mɔɔ di nɔhalɛ afoa nu, “ewiade ne le kɛ fienemgbole.” Saa yɛlɛ agɔnwolɛma mɔɔ bɛdi nɔhalɛ la—na yɛyɛ yɛ nwo agɔnwolɛ kpalɛ a—ɔbamaa asetɛnla ado; ɔbahola yeayɛ kɛnlɛma mɔɔ anyelielɛ wɔ nu.

BAEBOLO NGYINLAZO: “Anyelielɛ a le bɛdabɛ mɔɔ bɛze bɛ sunsum nu ngyianlɛ la.”—MATEYU 5:3, NW.

Yemɔti, Gyisɛse hilele yɛ debie mɔɔ anwo hyia la saa yɛkpondɛ kɛ yɛnyia Nyamenle ɛwɔkɛ ne a—kɛ yɛbanwu yɛ “sunsum nu ngyianlɛ” na yɛali nwolɛ gyima. Yɛnle kɛ nane ne mɔ la, ɔhyia kɛ yɛnwu mɔɔ asetɛnla kile nee ye bodane. Gyihova Nyamenle angome a bahola ali zɛhae ngyianlɛ ne anwo gyima amaa yɛ a, yɛɛ ɔdua ye Edwɛkɛ Baebolo ne azo ɔyɛ ɛhye. Kɛmɔ yɛnwunle ye wɔ edwɛkɛ mɔɔ li ɛhye anyunlu anu la, Baebolo ne maa yɛnwu Nyamenle bodane mɔɔ ɔlɛ ɔmaa azɛlɛ ne la. Ɔka deɛmɔti mɔɔ yɛwɔ ɛke, deɛmɔti amaneɛnwunlɛ dɔɔnwo wɔ ɛkɛ, nee mɔɔ Nyamenle kpondɛ avi yɛ ɛkɛ la ɔkile yɛ. Ngɛlɛlera ne anu nɔhalɛ edwɛkɛ ɛhye mɔ mɔɔ yɛbade ɔ bo la anwo hyia na yɛanyia asetɛnla mɔɔ gyi bodane kpalɛ zo na anyelielɛ wɔ nu. Bɛdabɛ mɔɔ bɛnyia mekɛ bɛsukoa Baebolo ne na bɛfa mɔɔ bɛsukoa bɛdi gyima la anye die. Duzu ati ɔ? Ɔluakɛ ɔmaa bɛ nee yɛ Bɔvolɛ ne, anyelielɛ Nyamenle Gyihova nyia agɔnwolɛvalɛ kpalɛ.—1 Temɔte 1:11.

BAEBOLO NGYINLAZO: “Bɛhakye bɛ Bɔvolɛ ne kolaa na munzule mekɛ ne . . . adwu, na bɛaha kɛ, ‘Me nye ɛnlie ɛbɛla nu.’”—NOLOBƆVO NE 12:1.

Belemgbunli Sɔlɔmɔn folɛ mɔɔ ɔdule ngakula mɔ ɔdwu mekɛ ne bie a bɛnnwu esiane mɔɔ kola ba bɛ ɛbɛlabɔlɛ nu la anwo hyia yɛ muala. Maa wɔ Bɔvolɛ ne ɛlumua wɔ wɔ ɛbɛlabɔlɛ nu. Ɛhye a bamaa wɔanyia asetɛnla mɔɔ gyi bodane kpalɛ zo a. Koati subane ɛhye: “Bɛmaa yɛli na yɛnlo, ɔluakɛ ɛhyema ɛnee yɛwu.” (1 Kɔlentema 15:32) Nolobɔvo ne 8:12 ka kɛ saa ɛfa Nyamenle ɛdumua a “ɔbayɛ boɛ yeamaa” wɔ.

Bɛlɛra bie mɔɔ bɛfɛlɛ ye Wendi la nwunle kɛ ɛhye le nɔhalɛ. Mekɛ mɔɔ ɔle kakula la ɔ nee ɔ diema raalɛ zukoale Spanish amaa bɛahola bɛadu bɛahɔ Dominican Republic, ɛleka mɔɔ bɛhyia menli dɔɔnwo mɔɔ babɔ Baebolo ne anu edwɛkpa ne nolo la. “Yɛbɔle afɔle dɔɔnwo yɛhɔzonlenle ɛleka mɔɔ moalɛ nwo hyia la, noko yɛ nye liele kpalɛ. Debie biala ɛnle ɛkɛ mɔɔ le kpalɛ tɛla ɛhye mɔɔ anrɛɛ mebayɛ ye wɔ siane nsia ɛhye anu a! Nyilalɛ mɔɔ yɛnyianle la le kpole tɛla afɔle ne mɔɔ yɛbɔle la.”

Nɔhalɛ Mɔɔ Yɛdi Yɛmaa Nyamenle La Maa Asetɛnla Di Munli

Agɔnwolɛvalɛ kpalɛ mɔɔ ɛ nee Gyihova banyia la bamaa wɔ asetɛnla ali munli wɔ adenle titile bie azo. Kɛzi? Seetan manle Adam nee Yive dele Nyamenle tumililɛ ne anwo atua na eza ɔhanle kɛ awie biala ɛnrɛhola ɛnrɛli nɔhalɛ ɛnrɛmaa Nyamenle wɔ sɔnea mekɛ nu. (Dwobu 1:9-11; 2:4) Ɛbahola wɔaboa wɔamaa Seetan ayɛ adalɛ! Wɔ adenle boni azo? Ɔlua nɔhalɛ mɔɔ ɛbali wɔamaa Nyamenle, ye ngyinlazo ne mɔ mɔɔ ɛbali zo, nee kɛzi ɛbamaa yeala ali kɛ ɛdie adenle mɔɔ Gyihova lɛ ɔkile yɛ mɔɔ le kpalɛ nee ɛtane ɛto nu la azo.—Yekile 4:11.

Saa yɛkpondɛ kɛ yɛyɛ mɔɔ tenrɛ la a, bie a yɛbayia ngyegyelɛ. Asoo zɛhae ngyegyelɛ ne bamaa yɛaminli bodane mɔɔ yɛlɛ ye wɔ asetɛnla nu la? Fa ye kɛ kpɔvolɛ bie ɛlɛsɛkye yɛ gɔnwo anzɛɛ yɛ busuanli bie duma. Saa yɛkpondɛ kɛ yɛte yɛ gɔnwo ne duma nwo a, asoo yɛbamaa amaneɛ mɔɔ yɛbanwu ye wɔ yɛ kpɔvolɛma asa nu la azi yɛ adenle wɔ yɛ bodane ne anwo? Kyɛkyɛ! Yɛbava anyelielɛ yɛagyinla amaneɛnwunlɛ zɛhae anloa. Zɔhane ala a nɔhalɛ mɔɔ yɛbali yɛamaa Nyamenle la de a. Nɔhalɛ mɔɔ yɛdi ye wɔ gyinlabelɛ ɛtane ɛhye mɔɔ yɛwɔ nu ɛnɛ anu la maa Nyamenle anye die.—Mrɛlɛbulɛ 27:11.

Asetɛnla Mɔɔ Gyi Bodane Kpalɛ Zo

Fa sie ɛ nye zo kɛ ɛbazukoa Nyamenle nee ye bodane ne mɔ anwo ninyɛne dɔɔnwo. Gyisɛse Kelaese mumua ne hanle kɛ: “Ngoane mɔɔ ɛnlɛ awieleɛ la a le kɛ bɛkɛnwu kɛ wɔmɔ a ɛle nɔhalɛ Nyamenle kokye ne a, na bɛkɛnwu Gyisɛse Kelaese, mɔɔ wɔzoa ye la.” (Dwɔn 17:3) Saa Nyamenle di ye mɔlebɛbo bodane mɔɔ ɔlɛ ɔmaa azɛlɛ ne la anwo gyima wie a, alesama mɔɔ di nɔhalɛ la banyia mɔɔ mɔlebɛbo ne ɛnee Gyihova kpondɛ kɛ bɛnyia la—“Ngoane mɔɔ ɛnlɛ awieleɛ” wɔ paladaese azɛlɛ zo. Akee asetɛnla bayɛ mɔɔ ɔgyi bodane kpalɛ zo na anyelielɛ wɔ nu amgba a.—Edwɛndolɛ 145:16.

Nienwu a ɛbanwu nrɛlɛbɛ ne mɔɔ Gyisɛse hanle nwolɛ edwɛkɛ la a? Ɔwɔ Nyamenle Edwɛkɛ Baebolo ne anu. Saa ɛbahyia moalɛ wɔ ɛhye ɛyɛlɛ nu a, kɛlɛ menli mɔɔ yɛle magazine ɛhye la. Bɛbava anyelielɛ bɛayɛ ngyehyɛleɛ bamaa awie aboa wɔ amaa wɔanwu mɔɔ Baebolo ne kilehile amgba la.