3 Kɛzi Ɔwɔ Kɛ Bɛyɛ Ye La?

ƆBA ye wɔ asɔneyɛlɛ nwo a, ɛzonlenlɛ dɔɔnwo twe adwenle kɔ kɛzi ɔwɔ kɛ bɛgyinla, edwɛkɛ agbɔkɛ nee nyɛleɛ mɔɔ ɔwɔ kɛ bɛyɛ ye wɔ asɔneyɛlɛ nu la azo titili. Noko akee, tɛ ninyɛne ɛhye mɔ a Baebolo ne twe adwenle kɔ zo a. Ɔba ye wɔ “kɛzi ɔwɔ kɛ yɛyɛ asɔne la” anwo a, ɔmaa yɛnwu ninyɛne mɔɔ ɔhyia kpalɛ mɔɔ ɔwɔ kɛ yɛyɛ la.

Baebolo ne ka gyinlabelɛ ngakyile nee ɛleka ngakyile mɔɔ Nyamenle nɔhalɛ azonvolɛ luale zo yɛle asɔne la anwo edwɛkɛ. Bie mɔ yɛle asɔne wɔ bɛ ti anu yɛɛ bie mɔ noko bukele bɛ nloa yɛle, kɛ mɔɔ bɛ tɛnlabelɛ ne de la. Bie mɔ nleanle anwuma yɛle asɔne yɛɛ bie mɔ zile bɛ ti aze yɛle. Kɛ anrɛɛ bɛbalua nvoninli, avile, asɔneyɛlɛ mbuluku zo bɛayɛ asɔne la, bɛvile bɛ ahonle nu bɛvale bɛ edwɛkɛ bɛyɛle asɔne. Duzu a maanle Nyamenle diele bɛ asɔneyɛlɛ ne a?

Kɛ mɔɔ yɛnwunle ye wɔ edwɛkɛ mɔɔ li ɛhye anyunlu anu la, bɛyɛle asɔne bɛhilele Gyihova Nyamenle angomekye ala. Debie bieko wɔ ɛkɛ mɔɔ nwolɛ hyia kpalɛ a. Yɛkenga ye wɔ 1 Dwɔn 5:14 kɛ: “Na anwodozo mɔɔ yɛlɛ wɔ ye nu la a le kɛ, debie biala mɔɔ yɛkɛbiza ye wɔ ye ɛhulolɛ zo la, ɔtie yɛ.” Ɔti ɔwɔ kɛ yɛ asɔneyɛlɛ nee Nyamenle ɛhulolɛdeɛ yia. Duzu a ɛhye kile a?

Ɔhyia kɛ yɛnwu Nyamenle ɛhulolɛdeɛ amaa yɛayɛ asɔne yɛamaa ɔ nee ye ayia. Ɛhye kile kɛ Baebolo ne mɔɔ yɛbazukoa la anwo hyia kpalɛ. Noko asoo ɛhye kile kɛ ɔwɔ kɛ yɛyɛ Baebolo nwo mbɔlɔba mɔɔ yɛbe kpalɛ la amaa Nyamenle adie yɛ asɔneyɛlɛ ɔ? Kyɛkyɛ, Nyamenle kulo kɛ yɛsukoa ye ɛhulolɛdeɛ, yɛte ɔ bo na yɛfa yɛyɛ gyima. (Mateyu 7:​21-​23) Ɔwɔ kɛ yɛmaa yɛ asɔneyɛlɛ nee ninyɛne mɔɔ yɛsukoa la yɛ ko.

Mɔɔ yɛlɛsukoa Gyihova nee ye ɛhulolɛdeɛ nwo ninyɛne dɔɔnwo la, ɛnee yɛlɛnyia diedi kpole, debie bieko mɔɔ anwo hyia wɔ asɔneyɛlɛ nu la. Gyisɛse hanle kɛ: “Debie biala mɔɔ bɛkɛbiza wɔ asɔneyɛlɛ nu la, saa bɛlɛ diedi a, bɛ sa kɛha ye.” (Mateyu 21:22) Diedi ɛngile kɛ yɛdie debie biala yeali ala. Emomu ɔkile kɛ yɛnyia anwodozo wɔ debie mɔɔ yɛnva yɛ nye yɛnwu ye noko nwolɛ daselɛ kpalɛ wɔ ɛkɛ la anu. (Hibuluma 11:1) Yɛnva yɛ nye yɛnwu Gyihova ɛdeɛ, noko Baebolo ne boa yɛ maa yɛnwu kɛ ɔwɔ ɛkɛ ne amgba. Yɛkola yɛfa yɛ nwo yɛto ɔ nwo zo, na ɔlɛ ɛhulolɛ kɛ ɔbabua bɛdabɛ mɔɔ bɛfa diedi bɛyɛ asɔne bɛkile ye la asɔneyɛlɛ. Eza yɛbahola yɛazɛlɛ Nyamenle kɛ ɔmaa yɛ diedi ɛyɛ kpole, ɔluakɛ ɔlɛ ɛhulolɛ kɛ ɔbava mɔɔ yɛhyia nwo la yeamaa yɛ.​—Luku 17:5; Gyemise 1:17.

Kɛzi ɔwɔ kɛ yɛyɛ asɔne la anwo ndelebɛbo bieko wɔ ɛkɛ. Gyisɛse hanle kɛ: “Awie biala ɛmba Selɛ ne ɛkɛ kyesɛ ɔdua me nwo zo.” (Dwɔn 14:6) Ɔti yɛdua Gyisɛse anwo zo a yɛkɔ Gyihova yɛ Ze ne ɛkɛ a. Ɛhye ati a Gyisɛse zele ye ɛdoavolɛma ne kɛ bɛyɛ asɔne wɔ ye duma nu la. (Dwɔn 14:13; 15:16) Ɛhye ɛngile kɛ ɔwɔ kɛ yɛyɛ asɔne yɛkile Gyisɛse. Mɔɔ ɔkile la a le kɛ, ɔwɔ kɛ yɛdua Gyisɛse duma nu amaa yɛ asɔneyɛlɛ ne adwu yɛ Ze ne mɔɔ le nwuanzanwuanza la ɛkɛ.

Mekɛ bie, Gyisɛse ɛdoavolɛma ne zele ye kɛ: “Awulae, kile yɛ kɛzi bɛyɛ asɔne” la. (Luku 11:1) Ɔda ali wienyi kɛ tɛ ninyɛne mɔɔ bɛha nwolɛ edwɛkɛ wɔ ɛke la a ɛnee bɛlɛbiza nwolɛ edwɛkɛ a. Ɛnee bɛkulo kɛ bɛnwu ninyɛne mɔɔ bɛkola bɛka nwolɛ edwɛkɛ wɔ bɛ asɔneyɛlɛ nu la. Wɔ adenle bie azo, ɛnee ɔle kɛ asɛɛ bɛlɛbiza ye kɛ, ‘Duzu a ɔwɔ kɛ yɛka nwolɛ edwɛkɛ wɔ yɛ asɔneyɛlɛ nu a?’