2 Nwane A Ɔwɔ Kɛ Yɛyɛ Yɛkile Ye A?

ASOO Nyamenle tie asɔneyɛlɛ kɔsɔɔti ɔnva nwo ahenle mɔɔ bɛlɛyɛ asɔne ne bɛahile ye la ɔ? Wɔ ɛnɛ ewiade ɛhye anu, menli dɔɔnwo die nzuzulɛ ɛhye to nu. Menli mɔɔ die diedi afonlafonla to nu la te nganeɛ kɛ ɛzonlenlɛ kɔsɔɔti le kpalɛ ɔnva nwo ngakyile mɔɔ wɔ bɛ nu la. Asoo nzuzulɛ ɛhye le nɔhalɛ?

Baebolo ne kilehile kɛ menli dɔɔnwo ɛnyɛ asɔne ɛngile ahenle mɔɔ ɔfɛta kɛ bɛyɛ asɔne bɛkile ye la. Wɔ mekɛ mɔɔ bɛhɛlɛle Baebolo ne la, ɛnee menli dɔɔnwo yɛ asɔne kile ananze ngakyile. Noko Nyamenle bɔle bɛ kɔkɔ fane dɔɔnwo wɔ nyɛleɛ ɛhye anwo. Kɛ neazo la, Edwɛne 115:4-6 ka ye wɔ ananze ne mɔ anwo kɛ: “Bɛlɛ ɛnzolɛ, noko bɛnde edwɛkɛ.” Edwɛkɛ ne anu la ɛkɛ. Nvasoɛ ɛnle zo kɛ yɛbayɛ asɔne yeahile nyamenle mɔɔ ɔnde edwɛkɛ la.

Baebolo nu edwɛkɛ bie kilehile edwɛkɛ ɛhye anu kpalɛ. Nɔhalɛ ngapezonli Yilaegya nee Beeyale ngapezoma ne ziele ye zo na ɔzele bɛ kɛ bɛyɛ asɔne bɛhile bɛ nyamenle ne na bɛwie a, ɔdaye noko ɔbayɛ asɔne yeahile ye Nyamenle ne. Yilaegya zele bɛ kɛ nɔhalɛ Nyamenle ne babua noko adalɛ nyamenle ne ɛnrɛbua. Beeyale ngapezoma ne liele dole nu na bɛvale mekɛ tendenle bɛyɛle asɔne bɛdeɛdeanle nu kpalɛ, noko ɛnee nzule lua bolɛ nwo! Kɛlɛtokɛ ne ka kɛ: “Awie biala ambua bɛ; ɛnee awie biala ɛndie bɛ.” (1 Arelemgbunli 18:29) Mɔɔ Yilaegya yɛle asɔne la, duzu a zile a?

Nyamenle buale Yilaegya ɛkɛ ne ala na ɔmaanle senle vile anwuma rayelale Yilaegya afɔlebɔlɛ ne mɔɔ yɛhyehyɛ la. Ngakyile boni a wɔ nu a? Debie ko mɔɔ nwolɛ hyia kpalɛ la da ali wɔ Yilaegya asɔneyɛlɛ ne mɔɔ bɛyɛ nwolɛ kɛlɛtokɛ wɔ 1 Arelemgbunli 18:36, 37 la anu. Ɔle asɔneyɛlɛ sikalɛ mɔɔ edwɛkɛ agbɔkɛ kɛyɛ 30 ala a finde nu wɔ Hibulu aneɛ mɔɔ bɛlimoale bɛvale bɛhɛlɛle Baebolo ne la anu a. Noko wɔ asɔneyɛlɛ ɛhye anu, Yilaegya vale Nyamenle duma Gyihova ne lile gyima fane nsa.

Beeyale mɔɔ kile “menlenlɛ” la le Keenama bozonle duma, noko ɛnee bɛlɛ bozonle ɛhye ɛsaso dɔɔnwo wɔ ɛkɛ. Noko akee, duma Gyihova ne le ngakyile kolaa, na bɛfa bɛfɛlɛ sonla kokye ala wɔ aleɛabo amuala. Nyamenle ɛhye a zele ye menli ne kɛ: “Medame a mele Gyihova a. Me duma ɛne; Menva me anyunlunyia memmaa awie biala.”​—Ayezaya 42:8.

Asoo Yilaegya asɔneyɛlɛ ne nee Beeyale ngapezoma ne asɔneyɛlɛ ne hɔle ɛleka ko ɔ? Ɛnee Beeyale ɛzonlenlɛ maa menli bɔ tuutuu ɛbɛla na bɛku sonla bɛbɔ afɔle. Noko akee, Gyihova hilehilele ye menli Yizilayɛma maanle bɛzonlenle ye wɔ adenle mɔɔ enililɛ wɔ nu la azo, ɔti bɛanva bɛ nwo bɛanwulowula nyɛleɛ evinli ɛhye mɔ anu. Akee dwenle nwolɛ nea: Saa ɛkɛlɛ ɛ gɔnwo bie mɔɔ ɛdi ye eni kpalɛ la kɛlata a, asoo ɛ nye balie nwo kɛ bɛbava bɛahɔmaa awie gyɛne mɔɔ ye ɛbɛlabɔlɛ ɛzɛkye na ɔnlɛ subane kpalɛ biala la ɔ? Menlie menli!

Saa ɛyɛ asɔne ɛkile Gyihova a, ɛnee ɛlɛtendɛ wɔahile alesama kɔsɔɔti bɛ Ze ne mɔɔ yemɔ a le Bɔvolɛ ne la.a Ngapezonli Ayezaya hanle ye wɔ asɔneyɛlɛ nu kɛ: “Wɔmɔ Gyihova a ɛle yɛ Ze a.” (Ayezaya 63:16) Sonla ɛhye a Gyisɛse Kelaese hanle ɔ nwo edwɛkɛ hilele ye ɛdoavolɛma ne kɛ: “Melɛkɔ me Ze nee bɛ Ze, me Nyamenle nee bɛ Nyamenle ne anwo lɔ.” (Dwɔn 20:17) Gyisɛse ɛ papa a le Gyihova. Yemɔ a le Nyamenle ne mɔɔ Gyisɛse yɛle asɔne hilele ye na ɔhilele ye ɛdoavolɛma ne kɛ bɛyɛ asɔne bɛhile ye la.​—Mateyu 6:9.

Asoo Baebolo ne kilehile kɛ yɛyɛ asɔne yɛhile Gyisɛse, Mɛle, anwodelɛma ne anzɛɛ anwumabɔvolɛma ɔ? Kyɛkyɛ, ɔka kɛ yɛyɛ yɛhile Gyihova ala. Suzu ninyɛne nwiɔ mɔɔ ɔti ɔle zɔ la anwo. Mɔɔ limoa, asɔneyɛlɛ le ɛzonlenlɛ, na Baebolo ne ka kɛ ɔwɔ kɛ yɛsonle Gyihova angomekye ala. (Ɛzɛdɔso 20:5) Mɔɔ tɔ zo nwiɔ, Baebolo ne ka kɛ Nyamenle le “asɔneyɛlɛ Tievolɛ.” (Edwɛne 65:2) Gyihova fa gyimalilɛ dɔɔnwo maa menli ɛdeɛ, noko ɔtɛfale nwolɛ adenle ɛhye ɔtɛmaanle awie biala. Yebɔ ɛwɔkɛ kɛ ɔdaye mumua ne ɔbadie yɛ asɔneyɛlɛ.

Ɔti saa ɛkulo kɛ Nyamenle tie wɔ asɔneyɛlɛ a, ɛnee kakye Baebolo nu folɛdulɛ ɛhye: “Awie biala mɔɔ kɛbɔ Gyihova duma la, bɛbalie ye ngoane.” (Gyima ne 2:21) Noko, asoo Gyihova tie asɔneyɛlɛ kɔsɔɔti? Anzɛɛ debie bieko wɔ ɛkɛ mɔɔ ɔwɔ kɛ yɛyɛ amaa Gyihova adie yɛ asɔneyɛlɛ ɔ?