Kpuya Mɔɔ Vi Kengavolɛma Ɛkɛ

Nwane mɔ a Pɔɔlo hanle bɛ nwo edwɛkɛ wɔ 2 Kɔlentema 6:14 kɛ “menli mɔɔ ɛnle diedima” la a?

Yɛkenga ye wɔ 2 Kɔlentema 6:14 kɛ: “Bɛ nee menli mɔɔ ɛnle diedima la mmatu.” Saa yɛnea edwɛkɛ mɔɔ boka nwo la a, yɛnwu ye wienyi kɛ Pɔɔlo ɛlɛka menli mɔɔ ɛmboka Kilisiene asafo ne anwo la anwo edwɛkɛ. Baebolo ne anu ɛleka gyɛne mɔɔ Pɔɔlo vale edwɛkɛ “menli mɔɔ ɛnle diedima” anzɛɛ “bɛdabɛ mɔɔ bɛnlie bɛnli” la lile gyima la foa edwɛkɛ ɛhye azo.

Kɛ neazo la, Pɔɔlo hwile Kilisienema anyunlu kɛ bɛfa bɛ edwɛkɛ bɛkɔ kɔɔto wɔ “menli mɔɔ bɛnle diedima la anyunlu.” (1 Kɔlentema 6:6) Wɔ ɛke, menli mɔɔ bɛnle diedima la a le ndɛnebuavolɛma mɔɔ ɛnee wɔ Kɔlente kɔɔto ɛkɛ la. Pɔɔlo hanle ye wɔ ye kɛlata ne mɔɔ tɔ zo nwiɔ la anu kɛ Seetan “ɛzi bɛdabɛ mɔɔ bɛnlie bɛnli la adwenle ne anye.” ‘Bɛheda’ menli zɛhae mɔ anyunlu yemɔti edwɛkpa ne ɛnda bɛ nwo zo. Menli mɔɔ bɛnle diedima la ɛmbɔ mɔdenle kɛ bɛsonle Gyihova ɔluakɛ Pɔɔlo hilehilele nuhua kɛ: “Saa awie kakyi ba Gyihova ɛkɛ a, ɛnee bɛye mɔɔ heda ɔ nyunlu la.”​—2 Kɔlentema 3:16; 4:4.

Menli mɔɔ ɛnle diedima la bie mɔ bulu mɛla ne azo yɛɛ bɛsonle awozonle. (2 Kɔlentema 6:15, 16) Noko tɛ bɛ muala a bɛdwazo bɛtia Nyamenle azonvolɛ a. Bie mɔ anye die nɔhalɛ ne anwo. Bɛ nuhua dɔɔnwo gya menli mɔɔ le Kilisienema la na bɛkulo kɛ bɛ nee bɛ kɔ zo tɛnla. (1 Kɔlentema 7:12-14; 10:27; 14:22-25; 1 Pita 3:1, 2) Noko Pɔɔlo vale edwɛkɛ “menli mɔɔ bɛnle diedima” la lile gyima fane dɔɔnwo hanle bɛdabɛ mɔɔ bɛmboka ‘menli mɔɔ die Awulae di,’ anzɛɛ Kilisiene asafo ne anwo la anwo edwɛkɛ.​—Gyima ne 2:41; 5:14; 8:12, 13.

Ngyinlazo mɔɔ wɔ 2 Kɔlentema 6:14 la kola boa Kilisienema kpalɛ wɔ tɛnlabelɛ dɔɔnwo anu. Bɛta bɛfa zɔhane edwɛkɛ ne bɛtu Kilisienenli mɔɔ ɛlɛkpondɛ awie agya ye la folɛ. (Mateyu 19:4-6) Kilisienenli mɔɔ ɛyila ɔ nwo zo na bɛzɔne ye la ɛmbɔ mɔdenle kɛ ɔbagya awie mɔɔ ɔnle diedinli la. Ɔluakɛ awie mɔɔ ɛnle diedinli la ɛbɛlabɔlɛ nwo ngyinlazo, ye bodane nee ye diedi le ngakyile kolaa fi nɔhalɛ Kilisienenli ɛdeɛ nwo.

Na bɛdabɛ mɔɔ bɛsukoa Baebolo ne na bɛkɔ Kilisienema ayia ne bie la ɛ? Yɛɛ nolobɔlɛma mɔɔ bɛtɛsɔnenle bɛ la noko ɛ? Bɛnle diedima ɔ? Bɛle diedima. Ɔnle kɛ yɛbu menli mɔɔ bɛtie edwɛkpa ne na bɛlɛbɔ mɔdenle bɛabikye ɛzɔnenlɛ la kɛ bɛnle diedima. (Wulomuma 10:10; 2 Kɔlentema 4:13) Kolaa na bɛazɔne Kɔnileɛse la bɛvɛlɛle ye kɛ awie mɔɔ “ɔsulo Nyamenle yɛɛ . . . [ɔsonle] Nyamenle.”​—Gyima ne 10:2.

Asoo nrɛlɛbɛ wɔ nu kɛ Kilisienenli mɔɔ ɛyila ɔ nwo zo la nee nolobɔlɛnli mɔɔ bɛtɛsɔnenle ye la bayɛ agyalɛ ngyehyɛleɛ, ɔluakɛ saa yɛka ye kpalɛ a Pɔɔlo folɛdulɛ ne mɔɔ wɔ 2 Kɔlentema 6:14 la ɛnvale ahenle zɛhae anwo la ati? Kyɛkyɛ, nrɛlɛbɛ ɛnle nu. Duzu ati ɔ? Ɔlua folɛ mɔɔ Pɔɔlo dule ahunlanvolɛ la ati. Pɔɔlo hɛlɛle kɛ: “Ɔlɛ adenle kɛ ɔgya awie biala mɔɔ ɔkulo la, noko kyesɛ Awulae anu ala.” (1 Kɔlentema 7:39) Ɔlua edwɛkɛ zɔhane ati, bɛtu Kilisienema folɛ kɛ bɛgya “Awulae anu” ala.

Duzu a edwɛkɛ “Awulae anu” anzɛɛ “Kelaese anu” kile a? Pɔɔlo hanle menli bie mɔ anwo edwɛkɛ kɛ bɛwɔ “Kelaese anu” anzɛɛ “Awulae anu” wɔ Wulomuma 16:8-10 yɛɛ Kɔlɔsaema 4:7. Saa ɛkenga ngyehyɛnu zɔhane mɔ a ɛbanwu kɛ ɔvale edwɛkɛ “yɛ gɔnwo gyimayɛvolɛ,” “mɔɔ bɛlie ye bɛdo nu,” “me diema kulovolɛ,” “sonvolɛ nɔhavo” yɛɛ “me gɔnwo akɛlɛ” a ɔhanle bɛ nwo edwɛkɛ a.

Mekɛ boni a awie bayɛ “akɛlɛ wɔ Awulae anu” a? Kyesɛ ahenle fi ye ɛhulolɛ nu yɛ mɔɔ ɔwɔ kɛ akɛlɛ yɛ la na ɔkpo ɔ nwo. Gyisɛse hilehilele nuhua kɛ: “Saa awie kulo kɛ ɔtoa me a, maa ɔkpo ɔ nwo na ɔva ye amaneɛnwunlɛ baka ne na ɔhɔ zo ɔdoa me.” (Mateyu 16:24) Ahenle bɔ ɔ bo toa Kelaese na ɔtu ɔ nwo amuala ɔmaa Nyamenle ɛhulolɛdeɛ ɛyɛlɛ wɔ mekɛ mɔɔ ɔbayila ɔ nwo zo yeamaa Nyamenle la. Yemɔ anzi akee ɔmaa bɛsɔne ye kɛ sonvolɛ mɔɔ bɛkpa ye mɔɔ ɔlɛ gyinlabelɛ kpalɛ wɔ Gyihova Nyamenle anyunlu la.a Ɔti, awie gya wɔ “Awulae anu” a ɔkile kɛ yegya awie mɔɔ yehile kɛ amgba ɔle diedinli mɔɔ yeyila ɔ nwo zo kɛ “Nyamenle nee Awulae Gyisɛse Kelaese akɛlɛ” la.​—Gyemise 1:1.

Ɔwɔ kɛ yɛkanvo awie mɔɔ ɔ nee Gyihova Alasevolɛ ɛlɛsukoa Baebolo ne na ɔlɛnyia anyuhɔlɛ la. Noko akee, ɔtɛyilale ɔ nwo zo ɔtɛmaanle Gyihova kɛ ɔfa ye ngoane mekɛ yeabɔ afɔle yeazonle Ye. Ɔgua zo ɔlɛyɛ nzenzaleɛ. Ɔwɔ kɛ ɔyɛ nzenzaleɛ kpole ɔyila ɔ nwo zo na ɔsɔne kɛ Kilisienenli kolaa na yeabɔ nzenzaleɛ kpole bieko mɔɔ le kɛ agyalɛ la abo.

Asoo nrɛlɛbɛ wɔ nu kɛ Kilisienenli nee awie mɔɔ ɛlɛnyia anyuhɔlɛ wɔ Baebolo ne ɛzukoalɛ nu la bayɛ agyalɛ ngyehyɛleɛ na yeanyia adwenle kɛ ɔkendɛ na ɔsɔne a yeagya ye ɔ? Kyɛkyɛ. Saa Baebolo sukoavo bie ze kɛ Kilisienenli bie mɔɔ ɛyila ɔ nwo zo la ɛlɛkendɛ ye yeamaa yeazɔne na yeagya ye a, ɔbahola yeaha adwenle mɔɔ ɔlɛ kɛ ɔsɔne la.

Fane dɔɔnwo ne ala awie yɛ nolobɔlɛnli mɔɔ bɛtɛsɔnenle ye la a ɔngyɛ na yeazɔne. Yemɔti nrɛlɛbɛ wɔ folɛ ne mɔɔ ɔse bɛgya wɔ Awulae anu ala la anu. Na saa bɛtetele awie wɔ Kilisiene abusua nu, yedwu agyalɛ zo, ɔkɔ debiezukoalɛ dahuu noko ɔtɛde nolobɔlɛnli mɔɔ bɛtɛsɔnenle ye la ɛ? Saa zɔhane ɔde a, ɛnee duzu ati a ɔtɛyilale ɔ nwo zo ɔtɛmaanle Gyihova ɛ? Duzu a si ye adenle a? Ye adwenle nu yɛ ye kesee ɔ? Ɔle diedinli noko yɛnrɛhola yɛnrɛha kɛ ɔwɔ “Awulae anu.”

Yɛ boɛyɛlɛ ti a Pɔɔlo dule agyalɛ nwo folɛ zɔhane a. (Ayezaya 48:17) Saa menli nwiɔ ne ɛyila bɛ nwo zo ɛmaa Gyihova a, ɔmaa bɛ agyalɛ ne nyia sunsum nu adiabo kpalɛ na ɔmaa bɛdie bɛ nwo bɛdi. Bɛ bodane nee bɛ ngyinlazo le ko. Ɛhye maa bɛ nye die kpalɛ wɔ agyalɛ ne anu. Bieko, saa awie ‘gya wɔ Awulae anu a’ ɔkile kɛ ɔdi nɔhalɛ ɔmaa Gyihova na yemɔ maa ɔnyia nyilalɛ dɔɔnwo ɔluakɛ ‘mɔɔ le nɔhavo la Gyihova di nɔhalɛ maa ye.’​—Edwɛne 18:25.

[Ɔbodwɛkɛ]

[Nvoninli]

‘Mɔɔ le nɔhavo la Gyihova di nɔhalɛ maa ye’