Yɛdie Nyamenle Mɔɔ Bie A Yɛnze Ye Kpalɛ La Yɛdi
WƆ GERMANY, saa ɛye menli nsa ɛsie ahane a, bɛ nuhua nwiɔ die Nyamenle di. Noko, mɔɔ bɛbizebizale menli mɔɔ bo apenle la kɛ bɛha Nyamenle ne mɔɔ bɛdie ye bɛdi anwo edwɛkɛ la, asɛɛ bɛ nuhua ko biala vale mualɛ ngakyile maanle. Adwelielilɛ kɛlata mɔɔ bɛfɛlɛ ye FOCUS la ka kɛ, “Kɛ mɔɔ menli ngakyile a wɔ Germany la ati, bɛ nuhua biala lɛ adwenle ngakyile wɔ Nyamenle anwo. Ɔle kpalɛ kɛ yɛbalie Nyamenle yɛali, noko asoo ɔnyɛ nyiane kɛ yɛbalie ye yɛali wɔ mekɛ mɔɔ yɛnze kɛzi ɔde la ɔ?
Tɛ Germany ala a menli lɛ adwenle ngakyile wɔ Nyamenle anwo a; ɔwɔ Europe ɛleka ngakyile noko. Bɛbizebizale menli mɔɔ wɔ Austria, Britain yɛɛ Netherlands Nyamenle anwo edwɛkɛ la, bɛ nuhua dɔɔnwo hanle kɛ ɔle “tumi kpole bie anzɛɛ fealera nu debie mɔɔ ɛngola ɛngilehile nu a.” Wɔ ngakula bɔbɔ mɔɔ bɛdie Nyamenle bɛdi la afoa nu, ɔle debie mɔɔ ɔ bo ɛdelɛ yɛ se.
Asoo Ɛze Nyamenle Kpalɛ?
Ngakyile kpole wɔ awie mɔɔ ɛze ye ala nee awie mɔɔ ɛze ye kpalɛ la avinli. Saa ɛze awie ala—le kɛ belemgbunli bie, awie mɔɔ ɛlie duma wɔ nwɔhoalilɛ nu anzɛɛ awie mɔɔ ɔyɛ vidio la a, ɔkile kɛ ɛze kɛ ɔwɔ ɛkɛ. Noko saa ɛze awie kpalɛ a, ɔkile kɛ ɛze ɔ nwo edwɛkɛ dɔɔnwo. Ɛze ahenle subane, ye nganeɛdelɛ, mɔɔ ɔkulo nee mɔɔ ɔngulo yɛɛ mɔɔ ɔbayɛ ye kenle bie la kpalɛ. Saa ɛze awie kpalɛ a, ɔkola ɔmaa ɛ nee ye nyia agɔnwolɛvalɛ kpalɛ.
Menli apenle dɔɔnwo die to nu kɛ saa ɛnwu Nyamenle anwo debie ekyi bie ala a, ɛnee ɔtɛwiele. Bɛkpondɛ Nyamenle anwo edwɛkɛ dɔɔnwo amaa bɛanwu ye kpalɛ. Asoo bɛnyia nvasoɛ wɔ zolɛ ɔ? Nrenyia bie mɔɔ bɛfɛlɛ ye Paul mɔɔ ɔwɔ northern Germany na ɛnee ɔze Nyamenle anwo edwɛkɛ ekyi bie ala la, zile kpɔkɛ kɛ ɔbanwu Nyamenle kpalɛ. Paul hilehilele nuhua kɛ: “Ɔdie mekɛ nee mɔdenlebɔlɛ amaa wɔanwu Nyamenle kpalɛ noko nvasoɛ kpole wɔ zolɛ. Saa ɛ nee Bɔvolɛ ne nyia agɔnwolɛvalɛ kpalɛ a, ɔmaa ɛbɛlabɔlɛ yɛ anyelielɛ.”
Asoo nvasoɛ wɔ mekɛ mɔɔ ɛbanyia nee mɔdenle mɔɔ ɛbabɔ amaa wɔanwu Nyamenle kpalɛ la azo ɔ? Yɛsɛlɛ wɔ kenga edwɛkɛ mɔɔ doa zo la.
[Edwɛkɛ mɔɔ bɛkpa wɔ mukelɛ 3]
Ngakyile kpole wɔ awie mɔɔ ɛze ye ala nee awie mɔɔ ɛze ye kpalɛ la avinli