August

Yɛ asɔneyɛlɛ a le kɛ menli dɔɔnwo badie kɔkɔbɔlɛ ne na bɛaraboka yɛ nwo wɔ nɔhalɛ ɛzonlenlɛ nu ɛnɛ. Na bɛdabɛ mɔɔ bɛndie kɔkɔbɔlɛ ne kɛkala, mɔɔ yɛ mbusuafoɔ mɔɔ yɛkulo bɛ la boka nwo la noko ɛ? Bie a ɔle Gyihova ɛhulolɛdeɛ kɛ ɔbalie menli mɔɔ bɛnwu Babelɔn Kpole ne ɛzɛkyelɛ ne a bɛbahakyi bɛ subane la. Saa ɔle zɔ a, ɛnee ɔhyia kɛ yɛkɔ zo yɛbɔ menli kɔkɔ ndɛndɛ. Bie a edwɛkɛ mɔɔ yɛbaha yɛahile bɛ ɛnɛ la bamaa bɛahakye debie wɔ zɔhane mekɛ ne. (Fa toto Yizikeɛle 33:33 anwo.) Wɔannea a bɛbadwenledwenle kɔkɔbɔlɛ mɔɔ bɛdele bɛvile yɛ ɛkɛ la anwo na ɔbaha bɛ yeamaa bɛaraboka yɛ nwo wɔ nɔhalɛ ɛzonlenlɛ nu kolaa na yeaha amozi. Kɛ mɔɔ pilizama sinzavolɛ ne mɔɔ ɛnee wɔ Felepae la hakyile ye adwenle wɔ mekɛ mɔɔ “azɛlɛkpusulɛ kpole bie” zile la anzi la, bie a menli mɔɔ bɛndie yɛ edwɛkɛ ne ɛnɛ la bahakyi bɛ adwenle wɔ mekɛ mɔɔ bɛbazɛkye Babelɔn Kpole ne arɛlevilɛ nu la.—Gyi. 16:​25-34. w24.05 17 ¶9-10

Yɛnyia ɛzukoalɛdeɛ bie mɔɔ hyia la wɔ edwɛkɛ mɔɔ ɛzoanvolɛ Pɔɔlo hɛlɛle hɔmaanle Hibulu Kilisienema ne la anu. Bie mɔ andoa zo annyia anyuhɔlɛ wɔ sunsum nu; ɛnee “bɛzia bɛyɛ kɛ menli mɔɔ hyia nyɛfonzule na tɛ [sunsum nu] aleɛ mɔɔ anu yɛ ɛlomboɛ la.” (Hib. 5:12) Bɛanzukoa nɔhalɛ ne anwo ninyɛne fofolɛ mɔɔ ɛnee Gyihova ɛlɛdua asafo ne azo ahilehile bɛ ngyikyingyikyi la na bɛalie bɛado nu. (Mrɛ. 4:18) Kɛ neazo la, ɛnee diedima mɔɔ le Dwuuma la anu dɔɔnwo tɛmaa menli anwosesebɛ kɛ bɛli Mosisi Mɛla ne azo wɔ mekɛ mɔɔ ɛnee Kelaese afɔlebɔlɛ ne ɛva Mɛla ne ɛra awieleɛ wɔ kɛyɛ ɛvolɛ 30 mɔɔ pɛle nu anu la. (Tae. 1:10) Awie biala mɔɔ ɛgenga Pɔɔlo kɛlata ne mɔɔ sunsum ne maanle ɔhɛlɛle ɔhɔmaanle Hibuluma ne la bahola aha ye wienyi kɛ, sunsum nu aleɛ mɔɔ anu yɛ ɛlomboɛ la a wɔ buluku zɔhane anu a. Ɛnee yemɔ a zɔhane Kilisienema ne hyia nwo amaa bɛamia diedi mɔɔ bɛlɛ kɛ, Kilisiene ɛzonlenlɛ nwo ngyehyɛleɛ ne kpogya tɛla Mɛla ne la anu a. Eza ɔbamaa bɛanyia akɛnrasesebɛ bɛahɔ zo bɛaha edwɛkɛ ne.—Hib. 10:​19-23. w24.04 6 ¶15

Ɔvi mekɛ mɔɔ Adam nee Yive hɔbokale Seetan anwo maanle bɛdwazole bɛtiale Gyihova Nyamenle la, alesama mgbe mgbe dɔɔnwo ɛwu. Duzu a bado menli zɔhane mɔ kenle bie a? Bɛbadwazo Kelaese ɛdoavolɛ nɔhavoma ne anu ekyi, mɔɔ bɛ dodo le 144,000 la bɛahɔ anwuma mɔɔ bɛnrɛwu bieko ɛlɛ a. (Yek. 14:1) Yɛɛ bɛbadwazo mrenyia nee mraalɛ nɔhavoma dɔɔnwo mɔɔ ɛnee kulo Gyihova la wɔ mekɛ mɔɔ ‘bɛlɛdwazo tenlenema’ la, na saa bɛkɔ zo bɛbɔ tenlene ɛbɛla wɔ Kelaese Ɛvolɛ Apenle Ko Tumililɛ ne nee sɔnea mɔɔ li awieleɛ la anu a, bɛbadɛnla aze dahuu wɔ azɛlɛ ye azo. (Dan. 12:13; Hib. 12:1) Eza Ɛvolɛ Apenle Ko Tumililɛ ne anu, bɛbamaa “bɛdabɛ mɔɔ bɛnle tenlenema” la nwolɛ adenle kɛ bɛhakyi bɛ ndenle ne mɔ na bɛzonle Gyihova nɔhalɛ nu. Menli mɔɔ bɛanzonle Gyihova ɛlɛ anzɛɛ “bɛdabɛ mɔɔ bɛyɛle ninyɛndane” bɔbɔ la boka nwo. (Dwɔn 5:29; Luku 23:​42, 43) Noko ɛnee alesama bie mɔ le amumuyɛma kpalɛ, ɔti Gyihova ɛbɔ kpɔkɛ kɛ ɔnrɛdwazo bɛ fee.—Luku 12:​4, 5. w24.05 2 ¶3; 5 ¶15; 6 ¶17

Ɔwɔ kɛ awie mɔɔ ɔkulo kɛ Gyihova die ye to nu la yɛ awie mɔɔ “ɔka nɔhalɛ wɔ ye ahonle nu.” (Edw. 15:2) Tɛ mɔɔ ɛhye kile la ala a le kɛ yɛnrɛbɔ adalɛ. Gyihova kulo kɛ yɛdi nɔhalɛ wɔ mɔɔ yɛka nee mɔɔ yɛyɛ la anu. (Hib. 13:18) Ɛhye hyia kpalɛ, “ɔluakɛ Gyihova kyi mɛlɛbɛla sonla, noko Ɔ nee tenlenema nyia agɔnwolɛvalɛ kyengye.” (Mrɛ. 3:32) Bɛdabɛ mɔɔ ‘bɛka nɔhalɛ wɔ bɛ ahonle nu’ la ɛndie Nyamenle wɔ mekɛ mɔɔ awie mɔ wɔ bɛ nwo ɛkɛ ne la na saa ɔka bɛ ngomekye a, bɛayɛ ninyɛndane bɛavea. Bɛmbɔ mɛlɛbɛla ɛbɛla. Bie a awie mɔɔ le mɛlɛbɛla la babɔ ɔ bo anyia adwenle kɛ tɛ mekɛ ne amuala a Gyihova mɛla bie mɔ le kpalɛ a. (Gye. 1:​5-8) Bie a ɔnrɛdie Gyihova wɔ ninyɛne mɔɔ ɔsuzu kɛ nwolɛ ɛngyia kpalɛ la anu. Akee saa ɔzɔho kɛ ɔnnyia ye anzosesebɛ ne anwo anzohwenlɛ biala a, ɔmaa ɔsi ɔ kɛnra ɔyɛ ɛtane dɔɔnwo. Bie a ɔsuzu kɛ ɔlɛsonle Nyamenle noko Gyihova ɛnrɛlie ye ɛzonlenlɛ ne ɛnrɛdo nu. (Nol. 8:11) Noko yɛmɛ yɛkulo kɛ yɛdi nɔhalɛ wɔ debie biala anu. w24.06 10 ¶7-8

Gyihova menli kulo nɔhalɛ ne mɔɔ wɔ Nyamenle Edwɛkɛ ne anu la. Yemɔ a yɛ diedi ne gyi zo a. (Wlo. 10:17) Yɛralie yɛli bɔkɔɔ kɛ Gyihova hyehyɛle Kilisiene asafo ne amaa yeayɛ “nɔhalɛ ne pila nee ye adiabo.” (1 Tim. 3:15) Mɔɔ Seetan kpondɛ la ala a le kɛ yɛnrɛlie mɔɔ Baebolo ne ka anzɛɛ adehilelɛ mɔɔ Nyamenle ahyehyɛdeɛ ne fa maa yɛ la yɛnrɛli. (Ɛfɛ. 4:14) Ɔnrɛhyɛ Abɔnsam balua adalɛ edwɛkɛ mgbole zo yeabɛlɛbɛla maanle maanle dɔɔnwo yeamaa bɛadwazo bɛatia Gyihova. (Yek. 16:​13, 14) Eza yɛ nye bahola ala kɛ Seetan bamia mɔdenle mɔɔ ɔlɛbɔ kɛ ɔbɛlɛbɛla Gyihova menli la anu. (Yek. 12:9) Ɛhye ati a ɔhyia kɛ yɛtete yɛ nwo amaa yɛanwu ngakyile mɔɔ wɔ nɔhalɛ nee adalɛ avinli na yɛadie nɔhalɛ ne la. (Wlo. 6:17; 1 Pita 1:22) Yemɔ a bamaa yɛanyia yɛ ti wɔ anwongyelelɛ kpole ne anu a! w24.07 8 ¶1-3

Mɔɔ Gyihova yɛle Yizilayɛma maanle la, ɔ nee bɛ yɛle ngyekyeleɛ. Ɔbɔle bɛ ɛwɔkɛ kɛ saa bɛdi ye mɛla ne mɔ azo a ɔbabɔ bɛ nwo bane na yeayila bɛ. Noko saa bɛte ɔ nwo atua—kɛ neazo la, saa bɛkpa kɛ bɛbazonle nyamenle gyɛne a—ɔnrɛbɔ bɛ nwo bane bieko na bɛbanwu amaneɛ. Noko yemɔ ɛngile kɛ Nyamenle ɛkpo bɛ bɔkɔɔ. Bɛbahola ‘bɛazia bɛara Gyihova bɛ Nyamenle ne ɛkɛ, na bɛadie ɔ ne.’ (Dit. 30:​1-3, 17-20) Wɔ adenle fofolɛ zo, bɛbahola bɛanlu bɛ nwo. Saa bɛyɛ ye zɔ a, Gyihova babikye bɛ na yeayila bɛ bieko. Gyihova menli ne mɔɔ ɔkpale bɛ la dele ɔ nwo atua fane dɔɔnwo. Ɛhye ati bɛnwunle amaneɛ. Noko Gyihova ando ye adwenle nu wɔ ye menli anzosesebɛma ne anwo. Ɔzoanle ye ngapezoma wɔ bɛ nwo ɛkɛ fane dɔɔnwo kɛ bɛhɔboa bɛ bɛmaa bɛnlu bɛ nwo na bɛzia bɛrɛla ye ɛkɛ.—2 Arl. 17:​13, 14. w24.08 9 ¶4-5

Mɔɔ Gyisɛse wule la anzi, Kilisienema mɔɔ ɛnee wɔ Gyɛlusalɛm nee Dwudiya la yiale ngyegyelɛ kpole. Mɔɔ bɛdele Kilisiene asafo ne la, yeangyɛ biala bɛyiale kpɔdekpɔdeyɛlɛ mɔɔ anu yɛ se la. Akee wɔ kɛyɛ ɛvolɛ 20 anzi, Kelaese ɛdoavolɛma yiale ezukoa nwo ngyegyelɛ, ɔbayɛ kɛ ɛhɔne bie mɔɔ limoale zile la a vale ɛhye rale a. (Gyi. 11:​27-30) Noko wɔ kɛyɛ ɛvolɛ 61 Y.M., Kilisienema anzo nu dwole bɛ ekyi, ɛnee ɔnle kɛ ngyegyelɛ mɔɔ bɛbayia ye kenle bie la. Wɔ mekɛ zɔhane anu, bɛ sa hanle kɛlata bie mɔɔ sunsum ne maanle ɛzoanvolɛ Pɔɔlo hɛlɛle la, na ɛnee kɛlata zɔhane le ye mekɛ nu ɛdeɛ bɔkɔɔ. Kɛlata ne mɔɔ Hibuluma ne asa hanle ye la ɛnee le ye mekɛ nu ɛdeɛ ɔluakɛ ɛnee anzodwolɛ mɔɔ Kilisienema ne lɛ la ɛnrɛhyɛ. Pɔɔlo vale folɛdulɛ kpalɛ mɔɔ ɔbaboa bɛ yeamaa bɛagyinla kpundii wɔ anwongyelelɛ mɔɔ ɔnrɛhyɛ bɛbahɔ nu la anloa la maanle bɛ. w24.09 8 ¶1-2

Saa yɛlɛnwu amaneɛ a, Gyihova dua yɛ mediema mrenyia nee mraalɛ nwo zo ɔmaa yɛnwu kɛ ɔkulo yɛ. Saa yɛlɛtendɛ na bɛtie yɛ edwɛkɛ ne kpalɛ anzɛɛ bɛnyia mekɛ bɛmaa yɛ a, ɔbamaa bɛahola bɛakyekye yɛ rɛle. Bie a bɛbagenga Baebolo ngyɛnu bie mɔɔ maa anwosesebɛ la bɛahile yɛ anzɛɛ bɛ nee yɛ bayɛ asɔne. (Wlo. 15:4) Ɔdwu mekɛ ne bie a adiema nrenyia anzɛɛ raalɛ bie bahola ahakye yɛ kɛzi Gyihova nwu ninyɛne la na ɛhye baboa yɛ yeamaa yɛahɔ zo yɛazie yɛ nwo dii. Eza yɛ mediema diedima bahola aboa yɛ wɔ ndenle bie mɔ azo, bie a bɛbado aleɛ bɛamaa yɛ wɔ mekɛ mɔɔ yɛwɔ ngyegyelɛ nu la. Amaa awie mɔ ahola aboa yɛ la, bie a ɔwɔ kɛ yɛbiza bɛ. (Mrɛ. 17:17) Bie a bɛnze kɛzi yɛte nganeɛ anzɛɛ ninyɛne mɔɔ yɛhyia nwo la. (Mrɛ. 14:10) Ɔti ɛbahola wɔaha kɛzi ɛte nganeɛ la wɔahile ɛ gɔnwo mɔ mɔɔ bɛnyi sunsum nu la. Ka debie mɔɔ ɛhyia nwolɛ la kile bɛ. Ɛbahola wɔaha wɔ edwɛkɛ wɔahile asafo nu kpanyinli ko anzɛɛ mgbanyima nwiɔ mɔɔ ɛnea a ɛkola ɛbikye bɛ la. Mediema mraalɛ bie mɔ ɛnwu kɛ saa bɛka bɛ edwɛkɛ bɛkile mediema mraalɛ gyɛne mɔɔ bɛnyi sunsum nu la a, ɔmaa bɛ rɛle kyekye. w24.10 10 ¶15-16

Menli dɔɔnwo nea bɛ aleɛlilɛ boɛ yɛɛ bɛkpundikpundi bɛ agbɔkɛ nu amaa bɛanyia kpɔkɛdelɛ kpalɛ. Noko bɛ nye ɛnla kɛ bɛbadɛnla aze dahuu. Bie a bɛsuzu kɛ ɛhye ɛnrɛyɛ boɛ ɔlua ngyegyelɛ mɔɔ kpanyinliyɛlɛ fa ba la ati. Noko Gyisɛse hanle ye wɔ Dwɔn 3:16 yɛɛ 5:24 kɛ yɛbahola yɛanyia “dahuu ngoane.” Kenle ko bie, Gyisɛse luale nwanwane adenle zo maanle menli apenle dɔɔnwo bie paano nee fɛlɛ. Ɛnee ɛhye yɛ nwanwane, noko edwɛkɛ mɔɔ ɔhanle wɔ ye alehyenlɛ nu la akee yɛ nwanwane kpalɛ. Menli dɔɔnwo ne lile ɔ nzi hɔle Kapɛnayɛm mɔɔ bikye Galeli ɛnweazo la, ɛkɛ ne a ɔhanle ɔhilele bɛ kɛ ɔbahola yeadwazo menli na yeamaa bɛanyia dahuu ngoane a. (Dwɔn 6:​39, 40) Gyisɛse edwɛkɛ ne kile kɛ ɔbahola yeadwazo menli dɔɔnwo mɔɔ bɛwu la na ɛ nee wɔ alɔvolɛ bahola anyia dahuu ngoane. w24.12 8 ¶1-2

Ewiade Amuala Kpɔkɛdelɛ Fane ne hanle ye kenlensa ye kɛ, kunlima dɔɔnwo bo bɛ ye mɔ, bɛka edwɛkɛ mɔɔ yɛ nyane la bɛkile bɛ anzɛɛ bɛdua ndenle gyɛne zo bɛkile bɛ nyane. Bie a kunli mɔɔ yɛ ɛhye la nee ɔ ye wɔ menli nu a ɔdi ye eni, noko saa bɛwɔ sua nu a, ɔyɛ ye basabasa. Duzu a kola maa kunli bie yɛ ɔ ye basabasa a? Bie a selɛ mɔɔ yɛ basabasa la a tetele bɛ a, ɔti ɔmaa bɛnyia adwenle kɛ nvonleɛ biala ɛnle awie mɔɔ bɛyɛ ye basabasa la anwo. Bie mɔ noko amaamuo maa bɛnyia adwenle mɔɔ ɛndenrɛ la kɛ, saa “amgba ɛle nrenyia a,” ɔwɔ kɛ ɛtinlitinli ɛ ye anwo zo ɛfa ɛkile kɛ ɛdawɔ a ɛlɛ tumi wɔ sua nu ɛkɛ a. Bɛangile mrenyia bie mɔ noko kɛzi ɔwɔ kɛ bɛkomo bɛ nganeɛdelɛ, le kɛ ɛyavalɛ zo la. Mrenyia bie mɔ ta nea nlanwonvoninli na ɛhye kola maa bɛnyia mraalɛ nee nla nwo adwenle mɔɔ ɛndenrɛ. Eza amaneɛbɔlɛ kile kɛ COVID-19 ewulenzane ne ɛmaa ngyegyelɛ ɛhye mɔ ɛhɔ ɔ nyunlu kpalɛ. Noko ninyɛne ɛhye mɔ biala ɛngile kɛ ɔwɔ kɛ kunli yɛ ɔ ye basabasa. w25.01 8 ¶2-3

“Fa wɔ ahonle muala nee wɔ ɛkɛla muala nee wɔ anwosesebɛ muala nee wɔ adwenle muala kulo Gyihova wɔ Nyamenle ne.” (Luku 10:27) Gyisɛse maanle ɔlale ali wienyi kɛ ɛhye a le mɛla mɔɔ anwo hyia kpalɛ wɔ Mosisi Mɛla ne anu a. Yɛ ye nzonlɛ kɛ yɛ ahonle, mɔɔ kile yɛ atiakunluwɔzo nee yɛ nganeɛdelɛ la a yɛfa yɛkulo Gyihova a. Eza ɔwɔ kɛ yɛfa yɛ ɛkɛla muala nee yɛ anwosesebɛ noko yɛsonle ye. Noko akee, eza yɛfa yɛ adwenle, mɔɔ kile kɛzi yɛdwenle ninyɛne nwo la yɛkulo Gyihova. Nɔhalɛ nu, yɛnrɛhola yɛnrɛde kɛzi Gyihova dwenle ninyɛne kɔsɔɔti anwo la abo bɔkɔɔ. Noko saa yɛsukoa “Kelaese adwenle” ne anwo debie a, yɛbahola yɛade kɛzi Nyamenle dwenle ninyɛne nwo la abo kpalɛ ɔluakɛ Gyisɛse lale kɛzi ɔ Ze dwenle ninyɛne nwo la ali pɛpɛɛpɛ.—1 Kɔl. 2:16. w25.03 8 ¶1

Kɛmɔ Gyisɛse di munli la ati, kolaa na nrenyia mɔɔ limoa, Adam ayɛ ɛtane la, ɛnee ɔ nee ye sɛ. (1 Kɔl. 15:45) Ɔti Gyisɛse luale ye ewule ne azo kpɔdale Adam ɛtane ne, mɔɔ kile kɛ ɔvale ye ɛdeɛ ne ɔziele mɔɔ vile Adam asa la abo zo. (Wlo. 5:19) Ɔti Gyisɛse rayɛle “Adam ne mɔɔ li amozi la.” Ɔngyia kɛ awie bieko mɔɔ ɔdi munli la ba na ɔbatua mɔɔ vile Adam asa la. Gyisɛse wule “kokye.” (Hib. 7:27; 10:12) Ɛnee akee ngakyile boni a wɔ mgbɔdalɛ ngyehyɛleɛ ne nee ɛkpɔnedeɛ ne anu a? Mgbɔdalɛ ngyehyɛleɛ ne a le mɔɔ Nyamenle yɛle amaa yealua zo yeava alesama ɛtane yeahyɛ bɛ na ɔ nee yɛ anyia agɔnwolɛvalɛ kpalɛ bieko la. Noko amaa ngyehyɛleɛ ɛhye ayɛ gyima la, ɔwɔ kɛ bɛtua ɛkpɔnedeɛ. Ɛkpɔnedeɛ ne a le debie mɔɔ ɔvale ɔmaanle amaa bɛahola bɛakpɔda alesama ɛtane ne la. Na mɔɔ Gyisɛse hwinle ye mogya ne mɔɔ sonle bolɛ la guale maanle yɛ la, yɛɛ ɔduale ɛkpɔnedeɛ ɛhye a.—Hib. 9:14. w25.02 5 ¶12-13

Saa yɛnwu Gyihova kɛ ɔle Awie mɔɔ de aze a, ɔbaboa yɛ yeamaa yɛanyia yɛ sɔnea ne mɔ anwo adwenle kpalɛ. Adenle boni azo? Ɔmaa yɛnwu yɛ sɔnea ne mɔ kɛ ɔboka edwɛkɛ kpole mɔɔ la Gyihova nee Seetan avinli la anwo. Abɔnsam se saa yɛyia ngyegyelɛ a yɛbakpo Gyihova. (Dwobu 1:​10, 11; Mrɛ. 27:11) Noko saa yɛdi nɔhalɛ yɛmaa Gyihova wɔ yɛ sɔnea ne mɔ anu a, ɔmaa yɛda ye ali kɛ yɛkulo ye na yɛmaa Seetan yɛ adalɛ. Arane ne ɛlɛdwazo atia wɔ, ɛlɛyia ezukoa nwo ngyegyelɛ, ɛkɔ daselɛlilɛ a bɛndie wɔ anzɛɛ ɛlɛyia sɔnea gyɛne ɔ? Saa ɔle zɔ a, kakye kɛ wɔ tɛnlabelɛ ne bamaa wɔanyia nwolɛ adenle wɔamaa Gyihova ahonle ali fɛlɛko. Eza kakye kɛ ɔnrɛmaa bɛnrɛzɔ wɔ bɛnrɛnlea mɔɔ ɛnrɛhola ɔ nloa gyinla a. Ɔbamaa wɔ anwosesebɛ yeamaa wɔagyinla ɔ nloa. w24.06 22 ¶9

Asoo ɛze ninyɛne bie mɔ mɔɔ ɔngyɛ na bɛazɔ wɔ bɛanlea la ɔ? Esiane wɔ nu kɛ yɛbabu yɛ nye yɛagua yɛ sinlidɔlɛ ne mɔ azo anzɛɛ yɛbanyia adwenle kɛ yɛ nwo yɛ se ɔti yɛnrɛyɛ ɛtane. (1 Dwɔn 1:8) Ɔluakɛ Pɔɔlo hanle kɛ saa “bɛdabɛ mɔɔ bɛnyi sunsum nu” bɔbɔ la ammaa bɛ nye anla ɛkɛ a, bɛbahola bɛadɔ sɔnea nu. (Gal. 6:1) Ɔwɔ kɛ yɛdi nɔhalɛ yɛmaa yɛ nwo na yɛdie yɛto nu kɛ ninyɛne bie mɔ wɔ ɛkɛ mɔɔ yɛmbɔ mɔdenle wɔ nu a. (2 Kɔl. 13:5) Saa yɛnwu ninyɛne mɔɔ bɛsɔ yɛ bɛnea kpalɛ la a, duzu a ɔwɔ kɛ yɛyɛ a? Mia mɔdenle mɔɔ ɛlɛbɔ kɛ ɛbaho wɔatia sɔnea zɔhane mɔ la anu kpalɛ! Kɛ neazo la, wɔ tete ne, ɛnee suakpole bie bane ne ɛleka mɔɔ ye agbɔvolɛ kola dua teta suakpole ne la a le ye nlenkɛ mgbole ne mɔ. Ɔti ɛnee yemɔ a bɛsinza ye kpalɛ a. Zɔhane ala a ɔwɔ kɛ yɛmaa yɛ adwenle kɔ debie biala mɔɔ yɛze kɛ ɔsɔ yɛ ɔnea ndɛndɛ la azo a.—1 Kɔl. 9:27. w24.07 15 ¶5-7

Gyima kpalɛ mɔɔ bɛha nwolɛ edwɛkɛ wɔ ɛnɛ tɛkese ne anu la bie a le edwɛkpa ne nolobɔlɛ. Ɔti saa yɛkenga Nyamenle Edwɛkɛ ne na yɛdwenledwenle nwo a, diedi mɔɔ yɛlɛ wɔ Gyihova anu la yɛ kpole na yɛte kɛzi ɔhyia kɛ yɛbɔ Belemgbunlililɛ edwɛkɛ ne nolo la abo kpalɛ. Amaa yɛanyia Nyamenle Edwɛkɛ ne azo nvasoɛ kpalɛ la, ɔnle kɛ yɛlɛkenga, yɛlɛsukoa anzɛɛ yɛlɛdwenledwenle nwo a, yɛfa yɛnriandi anzɛɛ yɛpele yɛ nwo. To ɛ rɛle aze. Saa ɛnwu tɛkese bie mɔɔ ɔyɛ se kɛ ɛbade ɔ bo a, mmawulu zo ɛkɔ. Emomu, dua Watch Tower Publications Index anzɛɛ Gyihova Alasevolɛ Neɛnleanu Buluku ne azo kpondɛ mɔɔ ɔkile la. Saa ɛtɔ alagye ɛsukoa a, ɛbamia anwodozo mɔɔ ɛlɛ kɛ Nyamenle Edwɛkɛ ne le nɔhalɛ la anu. (1 Tɛs. 5:21) Saa ɛnyia anwodozo kpole zɛhae a, ɔbamaa ɛ nye alie nwo kpalɛ kɛ ɛbaha mɔɔ wɔzukoa la anwo edwɛkɛ wɔahile awie mɔ. w24.04 15 ¶4-5

Devidi hanle kɛ, ‘ɔle kpalɛ yɛɛ ɔlɛ ɛhulolɛ kɛ ɔbava ɛtane yeahyɛ.’ (Edw. 86:5) Maeka hɛlɛle kɛ: ‘Nwane a le Nyamenle kɛ ɛdawɔ, mɔɔ ɔfa nvonleɛ ɔkyɛ na ɔbu ɔ nye ɔgua mɛladonlɛ zo a?’ (Maeka 7:18) Yɛɛ Ayezaya hanle kɛ: “Maa amumuyɛnli ɛvi ye adenle ne azo na ɛtanevolɛ ɛhakyi ye adwenle; maa ɔzia ɔrɛla Gyihova ɛkɛ, na ɔbaze ye anwunvɔne, maa ɔrɛla yɛ Nyamenle ne ɛkɛ, na ɔbava ye ɛtane yeahyɛ ye bɔkɔɔ.” (Aye. 55:7) Amaa Kɔlente asafo ne azukoa Gyihova la, bɛhanle bɛhilele bɛ kɛ bɛlie nrenyia ne mɔɔ ɛnlu ɔ nwo la bieko na bɛmaa ɔnwu kɛ bɛkulo ye. Kɛmɔ asafo ne lile zɔhane adehilelɛ ne azo la ati, bɛhilele kɛ “bɛyɛ tieyɛ wɔ ninyɛne kɔsɔɔti anu.” Nɔhalɛ nu, mɔɔ bɛyele nrenyia ne bɛvile asafo ne anu la ɛnee aziane ekyii bie ala a ɛpɛ nu a, noko ndeanlɛ ne maanle ɔnlunle ɔ nwo kpalɛ. Ɔti ɛnee nwolɛ ɛngyia kɛ bɛbahyɛ ye ɛlielɛ ne anwo. w24.08 17-18 ¶12-13

Yɛde mekɛ mɔɔ ninyɛne mgbole ɛlɛsisi la anu! Ɔnrɛhyɛ Gyisɛse babua awie biala mɔɔ de aze la ndɛne. Gyisɛse hilehilele “sɛkɛlɛneɛ” mɔɔ bazi amaa ye ɛdoavolɛma anwu kɛ ye ndɛnebualɛ ne ɛdwu na “mekɛ ɛhye ɛlɛkɔ awieleɛ” la anu hilele bɛ. (Mat. 24:3) Bɛhɛlɛ ngapezo ɛhye mɔ wɔ Mateyu tile 24 nee 25 yɛɛ ɛbanwu bie noko wɔ Maake tile 13 nee Luku tile 21. Gyisɛse luale ndonwo nsa ɛhye azo vale kɔkɔbɔlɛ mɔɔ baboa yɛ la maanle. Bɛmɛ a le mboane nee mbɔnkye, mbɛlɛra badwema nee ahoasea ne mɔ nee talɛnte nwo ndonwo ne mɔ. Ndonwo ɛhye mɔ anu ko biala baboa yɛ yeamaa yɛanwu kɛ awie subane a bɛbagyinla zo babua ye ndɛne a. w24.09 20 ¶1-2

Debie mɔɔ hanle Gyisɛse Kelaese, awie mɔɔ yɛ neazo kɛnlɛma kpalɛ maa yɛ la, a le ɛlɔlɛ—ɛlɔlɛ mɔɔ ɔlɛ ɔmaa ɔ Ze nee ɛlɔlɛ mɔɔ ɔlɛ ɔmaa menli la. Ɛlɔlɛ zɔhane a hanle ye maanle ɔyɛle gyima ɛsesebɛ nee gyima mɔɔ ba aze la ɔboale awie mɔ a. (Mat. 20:28; Dwɔn 13:​5, 14, 15) Mediema mrenyia, saa ɛlɔlɛ mɔɔ bɛlɛ la ati a bɛkulo kɛ bɛyɛ asafo nu azonvolɛ a, Gyihova bayila bɛ na yeaboa bɛ yeamaa bɛadwu bɛ bodane ne anwo. (1 Pita 5:5) Wɔ ewiade ye anu, menli nye ta die menli mɔɔ bɛbɔ bɛ ɛbɛla kɛ bɛ nwo hyia tɛla awie biala la anwo. Noko ɔnle zɔ wɔ Gyihova ahyehyɛdeɛ ne anu. Adiema nrenyia mɔɔ lɛ awie mɔ anwo ɛlɔlɛ kɛ Gyisɛse la, ɛngulo kɛ ɔdi awie mɔ anwo zo tumi anzɛɛ bɛbabu ye kɛ ɔ nwo hyia. Saa awie lɛ subane ɛhye mɔ bie na bɛkpa ye kɛ sonvolɛ wɔ asafo ne anu a, bie a bɛmaa ye gyima mɔɔ ba aze la kɛ ɔyɛ ɔboa Gyihova mboane ne mɔɔ bɛsonle bolɛ la a, ɔnrɛyɛ. Bie a ɔbade nganeɛ kɛ gyima zɛhae mɔ ɛnfɛta ye.—Dwɔn 10:12. w24.11 15 ¶6-7

Yɛhyia mediema mrenyia dɔɔnwo mɔɔ bɛbazonle asafo ne mɔ “kɛ ahyɛlɛdeɛ” la anwo wɔ ewiade amuala. (Ɛfɛ. 4:8) Saa ɛle adiema nrenyia mɔɔ bɛzɔne wɔ a, “ɛlɛ tumi ɛkola ɛboa” ɔ? (Mrɛ. 3:27) Ɛlɛ ɛhulolɛ kɛ ɛbabɔ mɔdenle amaa wɔahola wɔayɛ asafo nu sonvolɛ ɔ? Saa ɛle asafo nu sonvolɛ a, ɛlɛbɔ mɔdenle kɛ ɛbafɛta kɛ asafo nu kpanyinli ɔ? Ɛbahola wɔayɛ nzenzaleɛ wɔ wɔ ɛbɛlabɔlɛ nu amaa wɔahola wɔahɔ Belemgbunlililɛ Edwɛkpakavolɛma Sukulu ne bie ɔ? Sukulu zɔhane batete wɔ kpalɛ amaa Gyisɛse ava wɔ ali gyima kpalɛ. Saa ɛte nganeɛ kɛ ɛnrɛhola ɛnrɛyɛ ninyɛne ɛhye mɔ bie a, ka kile Gyihova wɔ asɔneyɛlɛ nu. Sɛlɛ ye kɛ ɔva ye sunsum nwuanzanwuanza ne ɔboa wɔ ɔmaa ɛhola ɛyɛ gyimalilɛ biala mɔɔ bɛbava bɛamaa wɔ la kpalɛ. (Luku 11:13) Mediema mrenyia mɔɔ Gyisɛse ɛva bɛ ‘ɛmaa kɛ ahyɛlɛdeɛ’ la di daselɛ kɛ ɔlɛkile yɛ adenle wɔ awieleɛ mekɛ ɛhye anu. (Mat. 28:20) Asoo ɔnyɛ wɔ fɛ kɛ yɛlɛ Belemgbunli mɔɔ lɛ ɛlɔlɛ, ɔyɛ nyele na ɔ nye wɔ yɛ nwo na eza ɔmaa yɛ mediema mrenyia mɔɔ fɛta la ɔmaa bɛnea yɛ la ɔ? w24.10 23 ¶16-17

Na ninyɛne kɔsɔɔti mɔɔ ɛmaa Nyamenle menli ɛnwu amaneɛ na bɛli nyane la noko ɛ? Awieleɛ bɔkɔɔ ne, “bɛ rɛle bavi” ninyɛne zɔhane mɔ yɛɛ “bɛbaye bɛ bɛavi [Nyamenle] anye zo.” (Aye. 65:16) Gyihova baye yɛ ngyegyelɛ ne mɔ avi ɛkɛ, na yɛ rɛle bavi kɛzi ngyegyelɛ ɛhye mɔ maanle yɛlile nyane la bɔkɔɔ. Kɛkala bɔbɔ, saa yɛkɔ debiezukoalɛ a, ɔmaa yɛ ahonle tɔ yɛ azule nu na yɛ adwenle gyinla, na ɔmmaa yɛnva yɛ adwenle yɛnzie ewiade ɛtane ɛhye anu ninyɛne mɔɔ ye adwenleadwenle to yɛ nwo la azo. Saa yɛda ɛlɔlɛ, anyelielɛ, anzodwolɛ, atiakunlukɛnlɛma nee mɛlɛbɛnwoaze, mɔɔ boka Nyamenle sunsum ne ma ne anwo la ali a, yɛbaboa yɛ mediema mɔɔ wɔ sunsum nu paladaese ne anu la yɛamaa bɛahola bɛazie bɛ nwo dii. (Gal. 5:​22, 23) Ɔle nyilalɛ kpole kɛ yɛboka Nyamenle ahyehyɛdeɛ ne anwo la! Menli mɔɔ bahɔ zo adɛnla sunsum nu paladaese ne anu la banwu kɛzi “anwuma fofolɛ nee azɛlɛ fofolɛ” ne anwo ɛwɔkɛ mɔɔ Nyamenle bɔle la bara nu bɔkɔɔ la. w24.04 22 ¶9-10

Saa menli nwiɔ ɛlɛtu a, ɔkola ɔyɛ anyelielɛ kpalɛ, noko ɔwɔ kɛ bɛsuzu nwolɛ kpalɛ ɔluakɛ ɔkola ɔkɔwie agyalɛ nu. Wɔ atɔfolɛlielɛ kenle ne, agyalɛma ne ka ndane wɔ Gyihova anyunlu kɛ bɛbala ɛlɔlɛ nee ɛbulɛ ali bɛahile bɛ nwo wɔ mekɛ ala mɔɔ bɛ mu nwiɔ bɛde aze la. Kolaa na yɛaha ndane bie la, ɔwɔ kɛ yɛsuzu edwɛkɛ ne anwo kpalɛ. Zɔhane ala a agyalɛ ndanehanlɛ ne noko de a. Saa bɛdimoa bɛtu a, ɔmaa bɛnwu bɛ nwo kpalɛ na bɛsi kpɔkɛ kpalɛ. Bie a bɛbazi kpɔkɛ kɛ bɛbagya anzɛɛ bɛbapɛ zo. Saa bɛpɛ zolɛ a, yemɔ ɛngile kɛ ninyɛne angɔ boɛ ammaa bɛ. Emomu, bɛ ɛdulɛ ne boale—ɔboale bɛ ɔmaanle bɛzile kpɔkɛ kpalɛ. Ɔhyia kɛ menli mɔɔ bɛtɛgyale la kakye kɛ, menli nwiɔ bie tu amaa bɛanwu ye saa bɛkulo kɛ bɛgya bɛ nwo a. Saa menli mɔɔ bɛtɛgyale la nyia adwenle kpalɛ zɛhae a, ɔnrɛmaa bɛ nee awie mɔɔ ɔnle bɛ adwenle nu kɛ bɛbagya ye la ɛnrɛdu. w24.05 26-27 ¶3-4

Ɔyɛ a ɔbahola yeayɛ se yeamaa Kilisiene ngakula kɛ bɛbahilehile bɛ diedi ne anu. Saa bɛkɔ sukulu na bɛka kɛ bɛhilehile deɛmɔti bɛnlie ngakyihakyililɛ ne bɛnli la anu a, bie a ɛzulolɛ baha bɛ. Duzu ati ɔ? Bie a bɛ kilehilevolɛma ne baha kɛ ngakyihakyililɛ ngilehilelɛ ne le nɔhalɛ. Saa ɛle awovolɛ a, kɛ ɔkɛyɛ na wɔaboa ɛ ra wɔamaa yeazɔ ye diedi ne anu kpundii ɛ? Maa ɛnwu kɛ ɔnle kɛ ɔse nyiane kɛ ɔdie ɔdi kɛ bɛbɔle ninyɛne la. Duzu ati ɔ? Nɔhalɛ ne a le kɛ abɔdeɛ nwo nrɛlɛbɛvolɛma dɔɔnwo noko die di kɛ abɔdeɛ amba mgbane. Bɛnwu daselɛ mɔɔ kile kɛ awie mɔɔ ze nrɛlɛbɛ kpalɛ la a bɔle anyewɔzo abɔdeɛ mɔɔ le kpomgbondee la a. Ɛhye ati, bɛnlie ngakyihakyililɛ ngilehilelɛ ne bɛnli. Debie ko mɔɔ bahola aboa ɛ ra yeamaa yeanyia diedi nee akɛnrasesebɛ kpole la a le kɛ ɔbazuzu mɔɔ boale mediema bie mɔ ɔmaanle bɛliele bɛlile kɛ bɛbɔle ninyɛne la anwo. w24.12 18 ¶14-15

Gyisɛse nyianle edwɛkɛhanlɛ gyima ne anwo adwenle kpalɛ. Ɛhye boale ye maanle ɔvale anyelielɛ nee mɔdenlebɔlɛ ɔyɛle edwɛkɛhanlɛ gyima ne dahuu. Kɛ neazo la, mɔɔ ɛvolɛ 30 Y.M. ɛlɛkɔ ye awieleɛ la, Gyisɛse nwunle kɛ ɛnee menli dɔɔnwo kulo kɛ bɛtie edwɛkpa ne, na ɔvale bɛ ɔtotole ɛya nu nzoleɛ mɔɔ ɛbolo mɔɔ ɔwɔ kɛ bɛte la anwo. (Dwɔn 4:35) Kɛyɛ ɛvolɛ ko anzi, ɔhanle ɔhilele ye ɛdoavolɛma ne kɛ: “Ma ɛdelɛ gyima ne le kpole.” (Mat. 9:​37, 38) Yɛɛ nzinlii eza ɔzile zolɛ kɛ: “Ma ɛdelɛ gyima ne le kpole . . . Yemɔti bɛzɛlɛ ma ɛdelɛ gyima ne Amenle kɛ ɔmaa gyimayɛvoma ɛrɛla ye ma ɛdelɛ gyima ne anu.” (Luku 10:2) Gyisɛse maanle ɔdɛnlanle ye adwenle nu dahuu kɛ menli bie mɔ badie edwɛkpa ne, na ɔ nye liele wɔ mekɛ mɔɔ bɛdiele la. Gyisɛse hilehilele ye ɛdoavolɛma ne kɛ bɛnyia bɛ edwɛkɛhanlɛ gyima ne anwo adwenle kpalɛ, yemɔ bamaa bɛ anwosesebɛ yeamaa bahɔ zo bɛava mɔdenlebɔlɛ bɛayɛ. w25.03 18-19 ¶15-16

Gyihova le ɛvealeka. Kɛ mɔɔ ahumu kpole bie ɛlɛtu a awie kola kɔfea bodane kpole bo la, zɔhane ala a Gyihova noko bɔ yɛ nwo bane wɔ mekɛ mɔɔ yɛbayia tɛnlabelɛ mɔɔ anu yɛ se la. Ɔbɔ yɛ nwo bane na ɔnrɛmaa yɛnrɛnwu amaneɛ dahuu. Yebɔ yɛ ɛwɔkɛ dɔɔnwo bɔbɔ kɛ: Awieleɛ bɔkɔɔ ne ɔbaye debie biala mɔɔ ɔmmaa yɛ nzo nu ɛndwo yɛ na ɔmaa yɛnwu amaneɛ la yeavi ɛkɛ. (Yiz. 34:​25, 26) Adenle ko mɔɔ yɛbahola yɛalua zo yɛava Gyihova yɛayɛ yɛ Ɛvealeka la a le kɛ yɛbayɛ asɔne. Saa yɛyɛ asɔne a, Gyihova bava “Nyamenle anzodwolɛ ne” mɔɔ bɔ yɛ ahonle nee yɛ adwenle nwo bane la amaa yɛ. (Fel. 4:​6, 7) Gyihova wɔ ɛkɛ ne maa yɛ dahuu. Yɛbahola yɛava yɛ nwo yɛado ɔ nwo zo ɔluakɛ ɔdaye a ɔle “dahuu Bodane ne a.” (Aye. 26:​3, 4) Ɔde aze dahuu, ɔti ɔbahɔ zo yeali ye ɛwɔkɛ ne mɔ azo, yeadie yɛ asɔneyɛlɛ na yeava moalɛ mɔɔ yɛhyia nwo la yeamaa yɛ. Eza yɛbahola yɛava yɛ nwo yɛado Gyihova anwo zo ɔluakɛ ɔdi nɔhalɛ ɔmaa bɛdabɛ mɔɔ bɛsonle ye la. (2 Sa. 22:26) Ɔ rɛle ɛnrɛvi mɔɔ yɛyɛ la ɛlɛ na ɔbamaa yɛ nwolɛ ahatualɛ dahuu.—Hib. 6:10; 11:6. w24.06 27 ¶4-6

Anyelielɛ ninyɛne mɔɔ nwolɛ ɛnde la bahola amaa yɛ ahonle ne anu ahyɛ nwiɔ. Zɔhane ala a agɔnwolɛ ɛtane nee nwonane afoa nu ninyɛne nwo adwenleadwenle noko bahola ayɛ a. Saa yɛnwu kɛ debie ɛlɛbɔ ɔ bo amaa Gyihova anwo ɛlɔlɛ mɔɔ yɛlɛ la aha aze a, ɔwɔ kɛ yɛyɛ nwolɛ debie ndɛndɛ yɛye yɛfi ɛkɛ. (Mat. 5:​29, 30) Ɔnle kɛ yɛmaa yɛ ahonle ne anu kyɛ nwiɔ. Yɛbahola yɛabɛlɛbɛla yɛ nwo kɛ mekɛ ala mɔɔ yɛlɛyɛ dɔɔnwo wɔ Gyihova ɛzonlenlɛ nu la, ninyɛne mɔɔ ɔtwehwe yɛ kɛ yɛyɛ ɛtane la ɛnrɛhola ɛnrɛyɛ yɛ ɛhwee. Ndonwo bie ɛne, fa ye kɛ ɛnee ɛwɔ alienwo na ezule kpole bie ɛlɛtɔ yɛɛ ɛyɛyɛlɛ wɔ nu kpalɛ. Mɔɔ ɛrawolole wɔ sua ne anu la, ɛvale ɛdanlɛ ɛguale ɛ nwo. Noko saa wɔantoto anlenkɛ ne nee nvɛnzɛlɛ ne mɔ anu a, duzu a bazi a? Ezule ne babɔ nyɛlɛ ahɔ sua ne anu yɛɛ ɛyɛyɛlɛ noko bahu wɔ bieko. Boni a yɛkile a? Tɛ sunsum nu aleɛ mɔɔ ɔbamaa yɛabikye Gyihova kpalɛ la ala a ɔwɔ kɛ yɛdi a. Eza ɔwɔ kɛ yɛsi debie ɛtane biala mɔɔ ɔbahola yeanyia yɛ nwo zo tumi la adenle amaa ewiade ɛhye anu “anwoma” yɔlɔkɔkɔ ne anzɛɛ subane ɛtane ne anwolo yɛ ahonle nu na yeangyɛ nuhua nwiɔ.—Ɛfɛ. 2:2. w24.07 21 ¶6-7

Bie a mɔɔ ba yɛ adwenle nu la ala a le kɛzi Gyisɛse lile nyane nee kɛzi bɛbɔle ye anyiemgba na bɛbuale ye mgbɔvodɛne la. Noko yeammaa nzisi mɔɔ ɔyiale la anli ɔ nwo zo konim. Kɛ anrɛɛ ɔbawa sogyama ne mɔɔ bɔle ye baka nu la amonle la, yeanyɛ zɔ, emomu ɔyɛle asɔne kɛ: “Egya, fa kyɛ bɛ ɔluakɛ bɛnze mɔɔ bɛlɛyɛ a.” (Luku 23:34) Saa yɛyɛ asɔne yɛmaa bɛdabɛ mɔɔ bɛyɛ yɛ basabasa la a, ɔbamaa yɛazie yɛ nwo dii; ɔnrɛmaa yɛnrɛva bɛ nwo ɛya na bɔbɔ yɛahakyi adwenle mɔɔ yɛlɛ wɔ bɛ nwo la. Yɛnze nzisi mɔɔ yɛbayia kolaa na ewiade ngyehyɛleɛ ɛhye ara ye awieleɛ la. Noko ɔnva nwo biala mɔɔ yɛbayia la, bɛmmamaa yɛgyakyi kɛ yɛbayɛ asɔne na yɛakpondɛ moalɛ yɛavi Gyihova ɛkɛ. Eza bɛmaa yɛzukoa kɛzi Gyisɛse gyinlanle nzisi nloa la na yɛhɔ zo yɛva Baebolo ngyinlazo yɛli gyima. Saa yɛyɛ ye zɔ a, yɛbahola yɛanyia anwodozo kɛ Gyihova bayila yɛ.—1 Pita 3:​8, 9. w24.11 6 ¶16; 7 ¶17, 19

Gyihova ɛnle Nyamenle mɔɔ ɔdie ɛbɛla biala ɔto nu a; ɔkyi ɛtane. (Edw. 5:​4-6) Ɔkpondɛ kɛ yɛdi ye ngyinlazo ne mɔ mɔɔ yela ye ali wɔ ye Edwɛkɛ ne anu la azo. Nɔhalɛ nu, Gyihova anye ɛnla kɛ alesama mɔɔ bɛnli munli la bali ye mɛla ne mɔ azo pɛpɛɛpɛ. (Edw. 130:​3, 4) Noko akee ɔnlie ‘amumuyɛma mɔɔ bɛkakyi ye ɛlolɛ kpole ne bɛfa bɛyɛ nyelebɛnloa bɛbɔ anyiemgba ɛbɛla’ la ɔndo nu. (Dwu. 4) Nɔhalɛ nu, Baebolo ne ka kɛ bɛbazɛkye “amumuyɛma” wɔ Nyamenle konle ne, mɔɔ yemɔ a le Amagɛdɔn la anu. (2 Pita 3:7; Yek. 16:16) Noko Gyihova ɛngulo kɛ bɛsɛkye awie biala. Baebolo ne ka ye wienyi kɛ “ɔkulo kɛ menli kɔsɔɔti nu bɛ nwo.” (2 Pita 3:9) Asafo nu mgbanyima sukoa Gyihova neazo ne na bɛsi abotane bɛbɔ mɔdenle kɛ bɛboa bɛdabɛ mɔɔ bɛyɛ ɛtane kpole la bɛamaa bɛahakyi bɛ subane na bɛanyia Gyihova anyunlu ɛlolɛ bieko. w24.08 26 ¶1-2

Kɛ mɔɔ Gyihova yɛ la, ɔwɔ kɛ ɛlɔlɛ mɔɔ yɛlɛ yɛmaa awie mɔ la ka yɛ maa yɛfa mɔɔ bɛhyia nwo la yɛmaa bɛ. Kɛ neazo la, ɛze adiema bie mɔɔ ɔhyia aleɛ anzɛɛ adɛladeɛ ɔ? Gyihova bahola alua ɛ nwo zo yeamaa wɔamaa ye debie amaa yeaboa ye wɔ ngyianlɛ zɔhane anu. Bɛze Gyihova menli kpalɛ kɛ bɛyɛ nyele wɔ mekɛ mɔɔ esiane bie bazi la. Kɛ neazo la, wɔ COVID-19 ewulenzane ne anu, mediema vale bɛ aleɛ, adɛladeɛ nee ninyɛne gyɛne mɔɔ bɛlɛ la bie maanle bɛdabɛ mɔɔ ɛnee bɛhyia bie la. Mediema dɔɔnwo noko ye ndoboa boa ewiade amuala gyima ne. Yemɔ boa maa bɛtua moalɛ mɔɔ bɛfa bɛmaa yɛ mediema mɔɔ wɔ ewiade amuala wɔ esiane mekɛ nu la anwo kakɛ. Bɛfi bɛ ahonle nu bɛdi edwɛkɛ mɔɔ wɔ Hibuluma 13:16 la azo, ɔse: “Bɛmmamaa bɛ rɛle fi kɛ bɛkɛyɛ kpalɛ na bɛ nee awie mɔ kɛhyɛ mɔɔ bɛlɛ la, ɔluakɛ afɔlebɔlɛ zɛhae mɔ sɔ Nyamenle anye kpalɛ.” w24.09 27 ¶6-7

Maa yɛyɛ neazo bie. Fa ye kɛ ɛlɛkpondɛ gyima mɔɔ ɛbayɛ wɔanlea wɔ abusua ne la. Wɔnyia gyima ngakyile nwiɔ. Wɔzuzu gyima ne anwo ninyɛne dɔɔnwo le kɛ gyima holɛ, mekɛ mɔɔ ɛbava wɔayɛ gyima ne, adenle mɔɔ ɛbapɛ wɔahɔ nee mɔɔ bokɛboka nwo la anwo. Ngɛlɛlera ne ɛndendɛ ɛntia gyima nwiɔ ne anu biala. Bie a ɛ nye die ko anwo ɔlua kɛzi gyima ne de anzɛɛ ɔluakɛ ahatualɛ ne le kpole. Noko ninyɛne gyɛne wɔ ɛkɛ mɔɔ ɔwɔ kɛ ɛsuzu nwo kolaa na wɔazi kpɔkɛ a. Kɛ neazo la, asoo gyima ne anu biala baha mekɛ mɔɔ ɛfa ɛkɔ debiezukoalɛ la ɔ? Gyima ne anu biala baha mekɛ mɔɔ ɛbanyia wɔamaa wɔ abusua ne nee mekɛ mɔɔ bɛbava bɛayɛ sunsum nu ninyɛne la ɔ? Ɛbiza ɛ nwo kpuya ɛhye mɔ a ɔbaboa wɔ yeamaa wɔava “ninyɛne mɔɔ hyia kpalɛ la”—wɔ ɛzonlenlɛ nee wɔ abusua ne ngyianlɛ—wɔalimoa ezukoa nyunlu. Ɛhye bamaa wɔazi kpɔkɛ mɔɔ Gyihova bayila zo la. w25.01 17 ¶11-13

Saa awie mɔ nee wɔ anli ye boɛ bɔbɔ a, ɛbahola wɔanyia anwodozo kɛ Gyihova kulo wɔ yɛɛ ɔnwu wɔ kɛ ɛsonle bolɛ. Saa ‘ɛ sa nu ɛdo’ a, kakye kɛ Gyihova nwunle ninyɛne mgbalɛ wɔ wɔ ahonle nu yɛɛ ɔdaye mumua ne a ɔhwenle wɔ ɔbikyele ɔ nwo a. (Dwɔn 6:44) Yeziezie ɔ nwo dahuu kɛ ɔboa wɔ ɔluakɛ ɛsonle bolɛ ɛmaa ye. Saa yɛsuzu Gyisɛse neazo ne anwo a, ɔbamaa yɛanwu kɛzi Gyihova te nganeɛ la. Mɔɔ Gyisɛse ɛlɛyɛ ye ɛzonlenlɛ gyima ne wɔ azɛlɛ ye azo la, ɔmaanle ye adwenle hɔle bɛdabɛ mɔɔ menli ɛmbu bɛ la anwo zo na ɔlale ahunluyelɛyelalɛ ali ɔhilele bɛ. (Mat. 9:​9-12) Mɔɔ raalɛ bie mɔɔ ɛnee ɛlɛkpondɛ ye ewule ɛzulolɛ bie anwo ayileyɛlɛ la razɔle Gyisɛse tɛladeɛ ne anu la, Gyisɛse kyekyele ɔ rɛle na ɔhanvole ye wɔ ye diedi ne anwo. (Maake 5:​25-34) Gyisɛse lale ɔ Ze subane ne bie ali pɛpɛɛpɛ. (Dwɔn 14:9) Ɔti ɛbahola wɔanyia anwodozo kɛ ɛsonle bolɛ ɛmaa Gyihova na ɔnwu wɔ subane mgbalɛ ne mɔ, mɔɔ bie a le wɔ diedi nee ɛlɔlɛ mɔɔ ɛlɛ ɛmaa ye la. w24.10 7 ¶4-5

Ɛnee ɔwɔ kɛ Devidi gyinla tɛnlabelɛ ngakyile mɔɔ anu yɛ se na ɔmaa ɔsu la anloa wɔ ye asetɛnla nu. Awie mɔ hilele ye ateetee yɛɛ bɛdabɛ mɔɔ ɔdie bɛ ɔdi la bie mɔ yele ye maanle. (1 Sa. 19:​10, 11; 2 Sa. 15:​10-14, 30) Ɔdwule mekɛ bie la, ɔhɛlɛle kɛ: “Me ɛkponlenlɛ ɛmaa mevɛ; me nye monle doa me ɛkpa tɔfɔɔ aledwolɛ biala; me ɛzunlɛ maa me ɛkpa doa.” (Edw. 6:6) Ɔnva nwo ngyegyelɛ ngakyile mɔɔ Devidi hɔle nu la, ɛnee ɔlɛ anwodozo kɛ Gyihova kulo ye. Ɔhɛlɛle kɛ: “Gyihova bade me ɛzunlɛ.” (Edw. 6:8) Yɛ alehyenlɛ ne anu tɛkese ne anu edwɛkɛ ne maa yɛnwu ye wienyi kɛ Gyihova kulo yɛ kpalɛ yɛɛ ɔdwenle kɛzi yɛte nganeɛ la anwo. Devidi dele nganeɛ kɛ asɛɛ Gyihova ɛlɛboɔboa ye monle ne anloa agua toba nu anzɛɛ ɔlɛkɛlɛ ye wɔ buluku nu. Ɛnee Devidi die di bɔkɔɔ kɛ Gyihova nwu ye nyanelilɛ ne yɛɛ ɔbahakye. Ɛnee Devidi lɛ anwodozo bɔkɔɔ kɛ, tɛ kɛ ye anwuma Selɛ ne mɔɔ lɛ ɛlɔlɛ la ze mɔɔ yeva nu la ala, emomu eza ɔze kɛzi ɔmaanle ɔdele nganeɛ la. w24.12 22 ¶11-12