ƐZUKOALƐDEƐ 54
Gyima Mɔɔ “Akɛlɛ Nɔhavo Nee Badwema Ne” Yɛ La
Gyisɛse a le Kilisiene asafo ne Ati a. (Ɛfɛsɛsema 5:23) Ɛnɛ Gyisɛse wɔ anwuma, noko ɔlɛdua “akɛlɛ nɔhavo nee badwema ne” anwo zo yeahile ye ɛdoavolɛma mɔɔ wɔ azɛlɛ ye azo la adenle. (Kenga Mateyu 24:45.) Gyisɛse mumua ne a ɛkpa “akɛlɛ” ne a yemɔti yemaa ye tumi ekyi, noko ɔbahɔ zo yeayɛ Kelaese akɛlɛ na yeayɛ gyima yeaboa Kelaese amediema ne mɔ. Akɛlɛ zɔhane a le nwane? Kɛzi akɛlɛ ne nea yɛ ɛ?
1. Nwane a le “akɛlɛ nɔhavo nee badwema ne”?
Gyihova dua nrenyia anzɛɛ mrenyia ekpunli ekyi nwo zo maa ye menli adehilelɛ dahuu. (Malakae 2:7; Hibuluma 1:1) Mɔɔ Gyisɛse wule la anzi, ɛzoanvolɛma nee mgbanyima mɔɔ wɔ Gyɛlusalɛm la maanle menli ne adehilelɛ. (Gyima ne 15:2) Zɔhane ala a ɛnɛ mgbanyima ekpunli ekyi bie—Gyihova Alasevolɛ Neazo Eku ne—maa yɛ sunsum nu aleɛ na bɛkile edwɛkɛhanlɛ gyima ne adenle a. Ekpunli ɛhye a le “akɛlɛ nɔhavo nee badwema ne mɔɔ [Gyisɛse] ɛkpa ye” la. (Mateyu 24:45a) Neazo Eku ne anu amra amuala le Kilisienema mɔɔ bɛva sunsum ne bɛkpokpa bɛ, na bɛ nye la kɛ bɛwu a bɛbahɔboka Kelaese anwo bɛali tumi wɔ ye anwuma Belemgbunlililɛ ne anu.
2. Sunsum nu aleɛ boni a akɛlɛ nɔhavo ne fa maa yɛ a?
Gyisɛse hanle kɛ akɛlɛ nɔhavo ne bamaa “[bɛ mediema Kilisienema] aleɛ wɔ mekɛ kpalɛ nu.” (Mateyu 24:45b) Kɛ mɔɔ aleɛ mɔɔ yɛdi la maa yɛnyia anwosesebɛ na yɛte kpɔkɛ la, zɔhane ala a sunsum nu aleɛ—ngilehilelɛ mɔɔ gyi Nyamenle Edwɛkɛ ne azo la—maa yɛnyia anwosesebɛ mɔɔ yɛhyia amaa yɛahɔ zo yɛali nɔhalɛ yɛamaa Gyihova na yɛayɛ gyima mɔɔ Gyisɛse ɛva ɛwula yɛ sa kɛ yɛyɛ la a. (1 Timote 4:6) Yɛ sa ka sunsum nu aleɛ ɛhye wɔ debiezukoalɛ nee nyianu ngakyile bo yɛɛ mbuluku nee vidio dɔɔnwo mɔɔ bɛdua Baebolo ne azo bɛyɛ mɔɔ boa yɛ ɔmaa yɛnwu mɔɔ Nyamenle kulo na ɔmaa agɔnwolɛvalɛ mɔɔ yɛ nee ye lɛ la anu mia la.
SUKOA DƆƆNWO
Nea deɛmɔti yɛhyia “akɛlɛ nɔhavo nee badwema ne”—Neazo Eku ne anwo la.
Neazo Eku ne fa sunsum nu aleɛ, adehilelɛ nee moalɛ maa Gyihova Alasevolɛ mɔɔ wɔ ewiade amuala la
3. Ɔwɔ kɛ Gyihova menli fa ngyehyɛleɛ yɛ gyima
Neazo Eku ne dua adehilelɛ mɔɔ bɛnyia bɛfi Gyisɛse ɛkɛ ne la azo yɛ Gyihova Alasevolɛ gyima ne anwo ngyehyɛleɛ. Alimoa Kilisienema vale ngyehyɛleɛ ko ne ala bie lile gyima. Ye VIDIO ne.
Kenga 1 Kɔlentema 14:33, 40, na akee bɛzuzu kpuya ɛhye anwo:
Kɛzi tɛkese ɛhye mɔ kile kɛ Gyihova kpondɛ kɛ bɛyɛ ngyehyɛleɛ bɛmaa ye Alasevolɛ ɛ?
4. Akɛlɛ nɔhavo ne yɛ edwɛkɛhanlɛ gyima ne anwo ngyehyɛleɛ
Edwɛkɛhanlɛ ne a le gyima mɔɔ hyia kpalɛ mɔɔ alimoa Kilisienema yɛle a. Kenga Gyima ne 8:14, 25, na akee bɛzuzu kpuya ɛhye mɔ anwo:
Nwane mɔ a vale edwɛkɛhanlɛ gyima ne anwo adehilelɛ maanle alimoa Kilisienema a?
Duzu a Pita nee Dwɔn yɛle ye wɔ adehilelɛ mɔɔ bɛ gɔnwo mɔ ɛzoanvolɛma vale maanle la anwo a?
Edwɛkɛhanlɛ ne a le gyima mɔɔ hyia kpalɛ mɔɔ Neazo Eku ne yɛ nwolɛ ngyehyɛleɛ a. Ye VIDIO ne.
Gyisɛse zile kɛzi edwɛkɛhanlɛ gyima ne anwo hyia la azo. Kenga Maake 13:10, na akee bɛzuzu kpuya ɛhye mɔ anwo:
Duzu ati a edwɛkɛhanlɛ gyima ne anwo hyia Neazo Eku ne a?
Duzu ati a ɔhyia kɛ “akɛlɛ nɔhavo nee badwema ne” yɛ ewiade amuala gyima ɛhye anwo ngyehyɛleɛ a?
5. Akɛlɛ nɔhavo ne maa yɛ adehilelɛ
Neazo Eku ne maa Kilisienema mɔɔ wɔ ewiade amuala la adehilelɛ. Kɛzi ɔsi adehilelɛ mɔɔ ɔfa ɔmaa la anwo kpɔkɛ ɛ? Nea kɛzi alimoa Kilisienema neazo eku ne zile kpɔkɛ bie la. Kenga Gyima ne 15:1, 2, na akee bɛzuzu kpuya ɛhye mɔ anwo:
Edwɛkɛ boni a vale akɛsakɛsa rale alimoa Kilisienema bie mɔ avinli a?
Nwane mɔ a Pɔɔlo, Baanabase yɛɛ awie mɔ gyɛne hɔnwunle bɛ maanle bɛzieziele edwɛkɛ ne a?
Kenga Gyima ne 15:12-18, 23-29, na akee bɛzuzu kpuya ɛhye anwo:
Mekɛ mɔɔ alimoa neazo eku ne ɛlɛkpondɛ adehilelɛ avi Nyamenle ɛkɛ wɔ edwɛkɛ ne anwo la, duzu a bɛzuzule nwolɛ kolaa na bɛazi kpɔkɛ a?—Nea ngyehyɛnu 12, 15 yɛɛ 28.
Kenga Gyima ne 15:30, 31 yɛɛ 16:4, 5, na akee bɛzuzu kpuya ɛhye mɔ anwo:
Duzu a alimoa Kilisienema yɛle ye wɔ adehilelɛ mɔɔ neazo eku ne vale maanle bɛ la anwo a?
Kɛzi Gyihova yilale bɛ tieyɛ ne azo ɛ?
Kenga 2 Timote 3:16 yɛɛ Gyemise 1:5, na akee bɛzuzu kpuya ɛhye anwo:
Saa Neazo Eku ne ɛlɛsi kpɔkɛ ɛnɛ a bɛkpondɛ adehilelɛ bɛfi ni?
BIE MƆ KA KƐ: “Saa ɛtie Neazo Eku ne a, ɛnee ɛlɛyɛ mɔɔ menli ka la.”
Duzu a maa ɛdie ɛdi kɛ Gyisɛse a ɛlɛkile Neazo Eku ne adenle a?
EDWƐKƐ TITILI
Neazo Eku ne a le “akɛlɛ nɔhavo nee badwema ne” mɔɔ Kelaese ɛkpa ye la. Ɔmaa Kilisienema mɔɔ wɔ ewiade amuala la adehilelɛ nee sunsum nu aleɛ.
Ndinu
Nwane a kpale “akɛlɛ nɔhavo nee badwema ne” a?
Kɛzi Neazo Eku ne nea yɛ ɛ?
Ɛdie ɛdi kɛ Neazo Eku ne a le “akɛlɛ nɔhavo nee badwema ne” ɔ?
KPONDƐ DƆƆNWO
Nea kɛzi Neazo Eku ne yɛ ye gyima ne anwo ngyehyɛleɛ la.
“Gyihova Alasevolɛ Neazo Eku Ne A Le Nzɔne?” (Edwɛkɛ mɔɔ wɔ jw.org azo)
Sukoa kɛzi Neazo Eku ne nea kɛ yɛ sa baha sunsum nu aleɛ kpalɛ la anwo debie.
Kɛzi Neazo Eku ne anu amra bu gyima mɔɔ Gyisɛse ɛva ɛwula bɛ sa kɛ bɛyɛ la ɛ?
Kɛzi yɛ debiezukoalɛ nee yɛ nyianu ne mɔ kile kɛ Gyihova ɛlɛkile Neazo Eku ne adenle ɛ?