Deɛmɔti Yɛdwenle Yɛ Tɛladeɛwulalɛ Nee Yɛ Anwoziezielɛ Nwo La

Yɛ muala yɛlɛ tɛladeɛ mɔɔ yɛkulo nee kɛzi yɛkulo kɛ yɛsiezie yɛ nwo la. Saa yɛdi Baebolo ngyinlazo sikalɛ bie mɔ azo a, yɛbahola yɛaziezie yɛ nwo kɛ mɔɔ yɛkulo la na eza yɛazɔ Gyihova anye. Maa yɛzuzu ngyinlazo ɛhye mɔ bie anwo.

1. Ngyinlazo boni mɔ a boa yɛ maa yɛsi yɛ anwoziezielɛ nwo kpɔkɛ a?

Ɔwɔ kɛ yɛfa “mɛlɛbɛnwoaze nee adwenle mɔɔ anu la ɛkɛ la” yɛwula “adɛladeɛ mɔɔ fɛta” la, na yɛmaa yɛ nwo yɛ bɔkɔbɔkɔ yɛfa yɛkile kɛ “[yɛsonle] Nyamenle.” (1 Timote 2:​9, 10) Suzu ngyinlazo nna ɛhye mɔ anwo: (1) Ɔwɔ kɛ yɛwula “adɛladeɛ mɔɔ fɛta” la. Kɛ mɔɔ wɔnwu ye wɔ debiezukoalɛ bo la, Gyihova menli wula adɛladeɛ ngakyile, noko yɛ adɛladeɛ nee yɛ ti zo enrinli kile kɛ yɛbu Nyamenle ne mɔɔ yɛsonle ye la. (2) Yɛfa “mɛlɛbɛnwoaze” yɛwula tɛladeɛ a ɔkile kɛ yɛ anwoziezielɛ ɛmmaa bɛnnyia nla nwo adwenle anzɛɛ ɔndwehwe awie mɔ adwenle ɔmba yɛ nwo zo somaa. (3) Saa yɛnli tɛladeɛ biala mɔɔ badwu zo anzɛɛ anwoziezielɛ biala mɔɔ kɛra la anzi a ɔkile kɛ yɛlɛ “adwenle mɔɔ anu la ɛkɛ la.” (4) Ɔwɔ kɛ dahuu yɛ anwoziezielɛ kile kɛ “[yɛsonle] Nyamenle,” amaa awie mɔ anwu kɛ yɛsonle nɔhalɛ Nyamenle ne.​—1 Kɔlentema 10:31.

2. Kɛzi yɛ anwoziezielɛ ka yɛ gɔnwo mɔ diedima ɛ?

Yɛlɛ adenle yɛkpa tɛladeɛ mɔɔ yɛbawula la ɛdeɛ, noko ɔwɔ kɛ yɛdwenle kɛzi yɛ anwoziezielɛ bahola aha awie mɔ la anwo. Yɛbɔ mɔdenle kɛ yɛnrɛyɛ debie mɔɔ bagyegye awie la, emomu, ‘yɛyɛ debie kpalɛ mɔɔ sɔ yɛ gɔnwo anye la yɛfa yɛmaa ye anwosesebɛ.’​—Kenga Wulomuma 15:​1, 2.

3. Kɛ ɔkɛyɛ na yɛ anwoziezielɛ amaa awie mɔ anye alie nɔhalɛ ɛzonlenlɛ nwo ɛ?

Yɛbɔ mɔdenle yɛsiezie yɛ nwo yɛmaa ɔfɛta wɔ mekɛ biala anu, noko saa yɛlɛkɔ debiezukoalɛ nee daselɛlilɛ a yɛnea yɛ anwoziezielɛ boɛ kpalɛ. Yɛngulo kɛ yɛtwehwe awie mɔ adwenle yɛfi edwɛkpa ne mɔɔ yɛlɛka yɛahile bɛ la azo. Emomu, yɛkulo kɛ yɛ anwoziezielɛ maa awie mɔ anye die nɔhalɛ ne anwo na ‘bɛkanvo yɛ Ngoanedievolɛ ne ngilehilelɛ ne.’​—Taetɛse 2:​10.

SUKOA DƆƆNWO

4. Yɛsiezie yɛ nwo kpalɛ a ɔkile kɛ yɛbu Gyihova

Debie titili boni ati a ɔwɔ kɛ yɛnea yɛ anwoziezielɛ boɛ a? Kenga Edwɛne 47:​2, na akee bɛzuzu kpuya ɛhye mɔ anwo:

• Kɛzi Gyihova mɔɔ yɛze kɛ yɛlɛsonle ye la ɔwɔ kɛ ka yɛ anwoziezielɛ ɛ?

• Ɛnea a ɔhyia kɛ yɛdwenle yɛ anwoziezielɛ nwo wɔ mekɛ mɔɔ yɛlɛkɔ debiezukoalɛ nee daselɛlilɛ la ɔ? Duzu ati ɔ?

5. Mɔɔ baboa yɛ yeamaa yɛaziezie yɛ nwo kpalɛ la

Ye VIDIO ne.

VIDIO: “Bɛyɛ Ɔ Muala Bɛwula Nyamenle Anyunlunyia” (10:18)

Saa yɛ adɛladeɛ bolɛ yɛ se anzɛɛ ye bolɛ ɛnyɛ se o, ɔwɔ kɛ ɔyɛ mɔɔ ɔ nye te na ɔfɛta ɛleka holɛ ko mɔɔ yɛlɛkɔ la. Kenga 1 Kɔlentema 10:​24 yɛɛ 1 Timote 2:​9, 10. Akee bɛzuzu deɛmɔti yɛkpo kɛ yɛbawula adɛladeɛ ɛhye mɔ la anwo:

• tɛladeɛ mɔɔ ɛyɛ evinli anzɛɛ ɛnle kpalɛ la.

• tɛladeɛ mɔɔ kyekye bɛ, ɔmaa bɛ nwo gua ɛkɛ anzɛɛ ɔmaa bɛnyia nla nwo adwenle la.

Kilisienema ɛnle Mosisi Mɛla ne abo ɛdeɛ, noko ɔmaa bɛnwu Gyihova adwenle. Kenga Ditilɔnomi 22:​5, na akee bɛzuzu kpuya ɛhye anwo:

• Duzu ati a ɔnle kɛ yɛwula tɛladeɛ anzɛɛ yɛsiezie yɛ nwo wɔ adenle mɔɔ maa mrenyia sɔho mraalɛ anzɛɛ mraalɛ sɔho mrenyia la azo a?

Kenga 1 Kɔlentema 10:​32, 33 yɛɛ 1 Dwɔn 2:​15, 16, na akee bɛzuzu kpuya ɛhye mɔ anwo:

• Duzu ati a ɔwɔ kɛ yɛnea kɛ yɛ anwoziezielɛ ɛngyegye menli mɔɔ wɔ ɛleka mɔɔ yɛde anzɛɛ asafo ne anu amra bie mɔ a?

• Tɛladeɛ nee anwoziezielɛ boni mɔ a ɛdwu zo wɔ ɛleka mɔɔ ɛwɔ la ɛ?

• Ɛnea a nuhua bie mɔ fɛta maa Kilisienema ɔ? Duzu ati ɔ?

EDWƐKƐ TITILI

Saa yɛsiezie yɛ nwo kpalɛ a, ɔkile kɛ yɛbu Gyihova nee awie mɔ.

Ndinu

• Duzu ati a yɛ tɛladeɛwulalɛ nee yɛ anwoziezielɛ hyia Gyihova a?

• Ngyinlazo mɔɔ ɔwɔ kɛ boa yɛ ɔmaa yɛsiezie nwo kpalɛ la bie mɔ a le boni?

• Kɛzi yɛ anwoziezielɛ ka kɛzi menli bu nɔhalɛ ɛzonlenlɛ la ɛ?

KPONDƐ DƆƆNWO

Nea mɔɔ wɔ anwoziezielɛ maa bɛka ye wɔ ɛ nwo la.

“Kɛzi Me Anwoziezielɛ De Ɛ?” (Edwɛkɛ mɔɔ wɔ jw.org azo)

Nea deɛmɔti ɔwɔ kɛ ɛdwenle nwolɛ kpalɛ kolaa na wɔayɛ tatuu wɔ ɛ nwo la.

“Duzu A Baebolo Ne Ka Ye Wɔ Tattoo Nwo A?” (Edwɛkɛ mɔɔ wɔ jw.org azo)

Nea Baebolo ngyinlazo mɔɔ bahola aboa wɔ yeamaa wɔanyia kɛzi ɛde la anwo adwenle kpalɛ la.

Duzu Ati A Kɛzi Mede La Anwo Hyia Me Somaa A? (4:29)

Kɛzi raalɛ nɔhavo bie nyianle awie mɔ anwoziezielɛ nwo adwenle kpalɛ ɛ?

“Ɛnee Anwoziezielɛ A Gyegye Me A” (Awake!, December 22, 2003)