ƐZUKOALƐDEƐ 45

Mɔɔ Afoa Biala Mɔɔ Yɛngyinla Kile La

Kɛlata Zo Ɛdeɛ

Gyisɛse hanle kɛ ye ɛdoavolɛma ‘ɛnle ewiade ne afoa.’ (Dwɔn 15:19) Ɛhye kile kɛ bɛngyinla afoa biala wɔ ewiade maanyɛlɛ edwɛkɛ nee konle nu. Nɔhalɛ nu, tɛ dahuu a ɔla aze ɔmaa yɛ kɛ yɛnrɛgyinla afoa biala a. Bie a ɛhye ati bɛbagolo yɛ nwo. Kɛ ɔkɛyɛ na yɛangyinla afoa biala na yɛahɔ zo yɛali nɔhalɛ yɛamaa Gyihova Nyamenle ɛ?

1. Kɛzi nɔhalɛ Kilisienema bu sonla arane ɛ?

Kilisienema bu arane. Yɛyɛ mɔɔ Gyisɛse hanle la na ‘yɛfa Siza ɛdeɛ yɛmaa Siza’—ɛhye kile kɛ yɛdi mɛla mɔɔ wɔ maanle ne anu, le kɛ adwule mɔɔ ɔwɔ kɛ yɛtua la azo. (Maake 12:17) Baebolo ne kilehile kɛ arane ne mɔ ɛlɛdi tumi ɔluakɛ Gyihova ɛmaa bɛ adenle la ati ɔ. (Wulomuma 13:1) Ɔti yɛte ɔ bo kɛ arane ne mɔ tumi ne lɛ ye ɛweɛne anzɛɛ ɔndwu Nyamenle ɛdeɛ ne. Yɛ nye la kɛ yɛ Nyamenle ne nee ye anwuma Belemgbunlililɛ ne bali alesama ngyegyelɛ nwo gyima.

2. Kɛ ɔkɛyɛ na yɛahile kɛ yɛngyinla afoa biala ɛ?

Yɛnva yɛ nwo yɛnwulonwula maanyɛlɛ nu kɛ mɔɔ Gyisɛse yɛle la. Mekɛ mɔɔ menli ne nwunle nwanwane debie mɔɔ Gyisɛse yɛle la, bɛbɔle mɔdenle kɛ bɛmaa yeayɛ bɛ belemgbunli wɔ azɛlɛ ye azo, noko yeammaa bɛ adenle. (Dwɔn 6:15) Duzu ati ɔ? Ɔluakɛ nzinlii ɔhanle kɛ, “me Belemgbunlililɛ ɛnvi ewiade ɛhye anu.” (Dwɔn 18:36) Kɛmɔ yɛle Gyisɛse ɛdoavolɛma la ati, yɛdua ndenle dɔɔnwo azo yɛkile kɛ yɛngyinla afoa biala. Kɛ neazo la, yɛngɔ konle. (Kenga Maeka 4:3.) Yɛbu maanle sɛkɛlɛneɛ le kɛ fɛlɛnra ne mɔ noko yɛnzonle bɛ. (1 Dwɔn 5:21) Eza yɛngyinla maanyɛlɛ eku bie anzɛɛ nuhua sonla mɔɔ ɛlɛkpondɛ tumi la anzi. Yɛdua ndenle ɛhye mɔ nee gyɛne zo yɛkile kɛ yɛdi nɔhalɛ bɔkɔɔ yɛmaa Nyamenle arane ne—ye Belemgbunlililɛ ne.

SUKOA DƆƆNWO

Nea tɛnlabelɛ bie mɔ mɔɔ bahola amaa yeayɛ se kɛ yɛnrɛgyinla afoa biala la na nea kɛzi ɛbahola wɔazi kpɔkɛ mɔɔ bamaa Gyihova anye alie la.

Nrenyia bie angyinla afoa biala. Ɔndie maanyɛlɛma nwiɔ ne mɔɔ wɔ eku ngakyile nu mɔɔ ɛlɛtendɛ ahile menli ne la.

3. Nɔhalɛ Kilisienema ɛngyinla afoa biala

Gyisɛse nee ye ɛdoavolɛma yɛle neazo maanle yɛ. Kenga Wulomuma 13:1, 5-7 yɛɛ 1 Pita 2:13, 14. Akee, ye VIDIO ne na bɛzuzu kpuya ɛhye mɔ anwo.

VIDIO: Nɔhalɛ Kilisienema Ɛngyinla Afoa Biala—Foa 1 (4:28)

Duzu ati a ɔwɔ kɛ yɛbu arane ne mɔ a?
Ndenle mɔɔ yɛdua zo yɛkile kɛ yɛbɛlɛ yɛ nwo aze yɛmaa bɛ la bie mɔ a le boni?

Konle si a, bie a maanle bie mɔ baha kɛ bɛngyi afoa biala, noko bɛboa afoa nwiɔ ne mɔɔ ɛlɛko la. Duzu a afoa biala mɔɔ yɛngyinla la kile amgba a? Kenga Dwɔn 17:16. Akee, ye VIDIO ne na bɛzuzu kpuya ɛhye anwo.

VIDIO: Nɔhalɛ Kilisienema Ɛngyinla Afoa Biala—Foa 2 (3:11)

Duzu a afoa biala mɔɔ yɛngyinla la kile a?

Na saa arane ka kɛ ɛyɛ debie mɔɔ ko tia Nyamenle mɛla ɛ? Kenga Gyima ne 5:28, 29. Akee, ye VIDIO ne na bɛzuzu kpuya ɛhye mɔ anwo.

VIDIO: Nɔhalɛ Kilisienema Ɛngyinla Afoa Biala—Foa 3 (1:18)

Saa sonla mɛla ko tia Nyamenle mɛla a, nwane mɛla a ɔwɔ kɛ yɛdi zo a?
Tɛnlabelɛ boni mɔ anu a ɛnea a Kilisienema ɛnrɛdie arane ne mɔ a?

4. Mmagyinla afoa biala wɔ wɔ nzuzulɛ nee wɔ nyɛleɛ nu

Kenga 1 Dwɔn 5:21. Akee, ye VIDIO ne na bɛzuzu kpuya ɛhye mɔ anwo.

VIDIO: Deɛmɔti Nɔhalɛ Kilisienema Hyia Akɛnrasesebɛ La—Amaa Bɛangyinla Afoa Biala (2:49)

Wɔ vidio ne anu, duzu ati a Ayenge amboka maanyɛlɛ eku ne anwo anzɛɛ anyɛ maanle ne anu ninyɛne bie mɔ le kɛ fɛlɛnra ahyebizalɛ ɛ?
Ɛnea a ɔzile kpɔkɛ kpalɛ ɔ?

Tɛnlabelɛ gyɛne boni mɔ a bahola amaa yeayɛ se kɛ yɛnrɛgyinla afoa biala a? Ye VIDIO ne, na akee bɛzuzu kpuya ɛhye mɔ anwo.

VIDIO: Ɛzinzalɛ Arane Ne Anu Ɛzukoalɛdeɛ—Mmagyinla Afoa Biala Wɔ Ewiade Mɔɔ Mgbakyemgbakyenu Wɔ Nu La Anu (5:16)

Saa maanle ngakyile ɛlɛdi nwɔhoa bie na yɛlɛnea bie a, kɛ ɔkɛyɛ na yɛangyinla afoa biala ɛ?
Saa maanyɛlɛma kpɔkɛzilɛ boa yɛ anzɛɛ ɔgyegye yɛ bɔbɔ a, kɛ ɔkɛyɛ na yɛangyinla afoa biala ɛ?
Kɛzi edwɛkɛ mɔɔ yɛte wɔ tɛlevihyɛne nee riledio zo nee mɔɔ yɛ gɔnwo mɔ ka la bahola aha afoa biala mɔɔ yɛngyinla la ɛ?

Nvoninli: 1. Menli ekpunli bie mɔɔ bɛva ɛya la dedɛ sɛkɛlɛneɛ ngakyile na bɛlɛyɛ yɛkile. 2. Nrenyia bie mɔɔ anye ɛlie la ɛmaa fɛlɛnra zo wɔ nwɔhoalilɛ bie abo. 3. Awie mɔɔ kɔ sukulu la ɛlɛka ndane. 4. Sogyanli bie lɛ etu. 5. Menli nwiɔ mɔɔ wɔ maanyɛlɛ eku ngakyile nu la ɛlɛkilehile bɛ edwɛkɛ nu. 6. Raalɛ bie ɛlɛfa ɛradolɛ kɛlata awula ɛlɛka bie anu. — Ɛleka boni mɔ a ɔnle kɛ Kilisienenli gyinla afoa biala wɔ ye nzuzulɛ nee ye nyɛleɛ nu a?

BIE A AWIE BABIZA KƐ: “Duzu ati a bɛmbiza fɛlɛnra ahye anzɛɛ bɛndo maanle edwɛne a?”

Kɛzi ɛbabua ye ɛ?

EDWƐKƐ TITILI

Kilisienema bɔ mɔdenle kpalɛ amaa bɛangyinla afoa biala wɔ maanyɛlɛ nu wɔ bɛ nzuzulɛ, bɛ edwɛkɛhanlɛ nee bɛ nyɛleɛ nu.

Ndinu

Duzu a yɛyɛ yɛmaa sonla arane a?
Duzu ati a yɛngyinla afoa biala wɔ maanyɛlɛ nu a?
Tɛnlabelɛ boni mɔ a bahola amaa yeayɛ se kɛ yɛnrɛgyinla afoa biala a?

Yɛwiele ɛzukoalɛdeɛ ne wɔ:

Bodane

Nea tɛnlabelɛ bie mɔɔ bahola amaa yeayɛ se kɛ ɛnrɛgyinla afoa biala la, na dimoa si kɛzi ɛbali nwolɛ gyima la anwo kpɔkɛ.

Bodane gyɛne:

Your other goal

KPONDƐ DƆƆNWO

Afɔle boni mɔ a bie a ɔwɔ kɛ yɛbɔ amaa yɛangyinla afoa biala a?

Gyihova Ɛtɛgyakyile Yɛ Ɛlɛ (3:14)

Duzu a mbusua bahola ayɛ ava aziezie bɛ nwo amaa ninyɛne mɔɔ bahola amaa yeayɛ se kɛ bɛnrɛgyinla afoa biala la ɛ?

Yɛngyinla Afoa Biala Wɔ Bagua Nu Debieyɛlɛ Nu (4:25)

Duzu ati a awie maanle mɔɔ ɔko yeamaa ye la ɛnle enililɛ kpole ɛmmaa ye a?

“Nyamenle Kola Yɛ Debie Biala” (5:19)

Nea kɛzi ɛlɛsi gyima mɔɔ ɛbayɛ la anwo kpɔkɛ a ɛnrɛhɔ ewiade ne afoa la.

“Awie Biala Ɔdaye Ɔbazoa Ye Adesoa” (Ɛzinzalɛ Arane, March 15, 2006)