ƐZUKOALƐDEƐ 36
Di Nɔhalɛ Wɔ Debie Biala Anu
Awie biala kulo agɔnwolɛma mɔɔ bɛdi nɔhalɛ la. Gyihova noko kpondɛ kɛ ɔ gɔnwo mɔ di nɔhalɛ. Noko nɔhalɛlilɛ ɛnla aze wɔ ewiade mɔɔ menli dɔɔnwo ɛnli nɔhalɛ wɔ nu la anu. Saa yɛdi nɔhalɛ wɔ debie biala anu a, nvasoɛ boni mɔ a wɔ zo a?
1. Debie titili boni ati a yɛdi nɔhalɛ a?
Saa yɛka nɔhalɛ yɛkile awie mɔ a, ɔmaa Gyihova nwu kɛ yɛkulo ye yɛɛ yɛbu ye. Suzu nwolɛ nea: Gyihova ze debie biala mɔɔ yɛdwenle nwo nee mɔɔ yɛyɛ la. (Hibuluma 4:13) Saa yɛsi kpɔkɛ kɛ yɛbali nɔhalɛ a ɔnwu ye na ɔmaa ɔ nye die. Ye Edwɛkɛ ne ka kɛ: “Gyihova kyi mɛlɛbɛla sonla, noko Ɔ nee tenlenema nyia agɔnwolɛvalɛ kyengye.”—Mrɛlɛbulɛ 3:32.
2. Ndenle mɔɔ yɛbahola yɛalua zo yɛali nɔhalɛ alehyenlɛ biala la bie mɔ a le boni?
Gyihova kulo kɛ ‘yɛka nɔhalɛ yɛkile yɛ nwo ngoko.’ (Zɛkalaya 8:16, 17) Ɛhye kile nzɔne? Ɛhye kile kɛ saa yɛlɛka edwɛkɛ yɛahile yɛ mbusuafoɔ, yɛ gɔnwo mɔ gyimayɛvoma, yɛ mediema Kilisienema anzɛɛ arane mgbanyima a, yɛmbɔ adalɛ anzɛɛ yɛmbɛlɛbɛla bɛ. Menli mɔɔ di nɔhalɛ la ɛnwua awie mɔ anzɛɛ ɛnsisi bɛ. (Kenga Mrɛlɛbulɛ 24:28 yɛɛ Ɛfɛsɛsema 4:28.) Eza bɛtua bɛ adwule biala. (Wulomuma 13:5-7) Yɛdua ndenle ɛhye mɔ nee ngakyile zo, “yɛfa nɔhalɛlilɛ yɛbɔ yɛ ɛbɛla wɔ debie biala anu.”—Hibuluma 13:18.
3. Nvasoɛ boni mɔ a wɔ nɔhalɛlilɛ zo a?
Saa menli nwu yɛ kɛ yɛdi nɔhalɛ a bɛdie yɛ bɛdi. Yɛmaa asafo ne yɛ kɛ abusua mɔɔ ɛlɔlɛ wɔ nu la yɛɛ ɔbɔ menli mɔɔ wɔ nu la anwo bane. Yɛnyia adwenle mɔɔ anu te la. Eza yɛ nɔhalɛlilɛ ne ‘maa bɛkanvo yɛ Ngoanedievolɛ Nyamenle ne ngilehilelɛ ne,’ na ɔmaa menli mɔɔ ɛnle asafo ne anu la anye die nɔhalɛ ɛzonlenlɛ nwo.—Taetɛse 2:10.
SUKOA DƆƆNWO
Nea kɛzi nɔhalɛlilɛ ka Gyihova nee ɛdawɔ la, na sukoa kɛzi ɛbahola wɔali nɔhalɛ wɔ tɛnlabelɛ biala anu la anwo debie.
4. Gyihova anye die nɔhalɛlilɛ nwo
Kenga Edwɛne 44:21 yɛɛ Malakae 3:16, na akee bɛzuzu kpuya ɛhye mɔ anwo:
Ɛnea a duzu ati a nrɛlɛbɛ ɛnle nu kɛ yɛbanyia adwenle kɛ yɛkola yɛfea nɔhalɛ ne azo ɛ?
Saa ɔyɛ se bɔbɔ kɛ yɛbaha nɔhalɛ na yɛsi kpɔkɛ kɛ yɛbali nɔhalɛ a, ɛnea a kɛzi Gyihova te nganeɛ wɔ nwo ɛ?
Saa ngakula ka nɔhalɛ a, bɛ awovolɛ anye die. Saa yɛka nɔhalɛ a, Gyihova anye die
5. Di nɔhalɛ dahuu
Menli dɔɔnwo die di kɛ bɛnrɛhola bɛnrɛli nɔhalɛ dahuu. Noko nea deɛmɔti ɔwɔ kɛ yɛdi nɔhalɛ dahuu la. Ye VIDIO ne.
Kenga Hibuluma 13:18, na akee bɛzuzu kɛzi yɛbahola yɛali nɔhalɛ wɔ ɛleka ɛhye mɔ la anwo:
yɛ abusua ne anu.
gyima anzɛɛ sukulu nu.
tɛnlabelɛ gyɛne biala anu.
6. Nɔhalɛlilɛ boa yɛ
Nɔhalɛlilɛ bahola amaa yɛayia ngyegyelɛ bie mɔ. Noko kɛ ɔde ye biala la, yemɔ a le debie kpalɛ mɔɔ ɔwɔ kɛ ɛyɛ a. Kenga Edwɛne 34:12-16, na akee bɛzuzu kpuya ɛhye anwo:
Kɛzi nɔhalɛlilɛ maa ɛ nwo tɔ wɔ wɔ ɛbɛlabɔlɛ nu ɛ?
A. Kunlima nee yelɛma mɔɔ di nɔhalɛ la agyalɛ nu mia
B. Gyimamenlema die gyimayɛvoma mɔɔ di nɔhalɛ la di
D. Arane gyimayɛvoma kanvo maanlema mɔɔ di nɔhalɛ la
BIE MƆ KA KƐ: “Ɛbɔ adalɛ ngyikyi a ɔnyɛ ɛhwee.”
Duzu ati a ɛdie ɛdi kɛ Gyihova kyi adalɛ biala a?
EDWƐKƐ TITILI
Gyihova kpondɛ kɛ ɔ gɔnwo mɔ di nɔhalɛ wɔ edwɛkɛ biala mɔɔ bɛka nee debie biala mɔɔ bɛyɛ la anu.
Ndinu
Ndenle mɔɔ yɛbahola yɛalua zo yɛali nɔhalɛ la bie mɔ a le boni?
Duzu ati a nrɛlɛbɛ ɛnle nu kɛ yɛbanyia adwenle kɛ yɛkola yɛfea nɔhalɛ ne azo ɛ?
Duzu ati a ɛkulo kɛ ɛdi nɔhalɛ dahuu a?
KPONDƐ DƆƆNWO
Kɛzi awovolɛ bahola ahilehile bɛ mra bɛamaa bɛali nɔhalɛ ɛ?
Saa yɛdi yɛ ɛwɔkɛ zo a nvasoɛ boni a wɔ zo a?
Nea deɛmɔti saa bɛnva adwule bɛnli gyima kpalɛ bɔbɔ a ɔwɔ kɛ yɛtua la.
Duzu a maanle nrenyia bie mɔɔ ɛnli nɔhalɛ la hakyile na ɔvale nɔhalɛlilɛ ɔbɔle ye ɛbɛla a?
“Menwu Ye Kɛ Gyihova Se Anwunvɔne Yɛɛ Ɔfa Ɛtane Ɔkyɛ” (Ɛzinzalɛ Arane, May 1, 2015)