ƐZUKOALƐDEƐ 28
Kile Mɔɔ Gyihova Nee Gyisɛse Ɛyɛ Ɛmaa Wɔ La Anwo Anyezɔlɛ
Saa ɛ gɔnwo bie kyɛ wɔ debie kɛnlɛma bie a kɛzi ɛte nganeɛ ɛ? Ɔyɛ wɔ fɛ kpalɛ na ɛmaa ɛ gɔnwo ne nwu kɛ ɛ nye die ahyɛlɛdeɛ ne anwo. Gyihova nee Gyisɛse ɛmaa yɛ ahyɛlɛdeɛ mɔɔ tɛla biala a. Nzɔne debie ɔ, na kɛ ɔkɛyɛ na yɛahile nwolɛ anyezɔlɛ ɛ?
1. Adenle ko boni a yɛdua zo yɛkile mɔɔ Nyamenle nee Kelaese ɛyɛ ɛmaa yɛ la anwo anyezɔlɛ a?
Baebolo ne bɔ ɛwɔkɛ kɛ “awie biala mɔɔ kɛla ye ali kɛ ɔlɛ diedi wɔ [Gyisɛse anu]” la banyia dahuu ngoane. (Dwɔn 3:16) Diedi mɔɔ awie da ye ali la kile duzu? Ɔngile kɛ yɛdie Gyisɛse yɛali ala. Eza ɔwɔ kɛ yɛdua yɛ kpɔkɛzilɛ nee ninyɛne mɔɔ yɛyɛ la azo yɛda yɛ diedi ali. (Gyemise 2:17) Saa yɛdua mɔɔ yɛyɛ nee mɔɔ yɛka la azo yɛda yɛ diedi ali a, ɔmaa agɔnwolɛvalɛ mɔɔ yɛ nee Gyisɛse yɛɛ ɔ Ze Gyihova lɛ la anu mia.—Kenga Dwɔn 14:21.
2. Debie titili boni a boa yɛ maa yɛkile mɔɔ Gyihova nee Gyisɛse ɛyɛ la anwo anyezɔlɛ a?
Nɔsolɛ ne mɔɔ aleɛ kye a Gyisɛse bawu la, ɔhilele ye ɛdoavolɛma adenle bieko mɔɔ ɔwɔ kɛ bɛdua zo bɛkile ye afɔlebɔlɛ ne anwo anyezɔlɛ la. Ɔvale debie titili bie mɔɔ Baebolo ne fɛlɛ ye “Awulae Nɔsolɛ Aleɛ ne,” mɔɔ eza bɛfɛlɛ ye Kelaese Ewule Ngakyelɛlilɛ ne la ɔziele ɛkɛ. (1 Kɔlentema 11:20) Gyisɛse yɛle ɛhye amaa ye ɛzoanvolɛma—yɛɛ nɔhalɛ Kilisienema kɔsɔɔti mɔɔ yɛli bɛ nzi la—ahakye kɛ ɔwule ɔmaanle yɛ. Gyisɛse hanle deɛ ɛhye mɔɔ ɔwɔ kɛ bɛyɛ la anwo edwɛkɛ kɛ: “Bɛhɔ zo bɛyɛ ɛhye bɛva bɛhakye me.” (Luku 22:19) Saa ɛkɔ Ngakyelɛlilɛ ne bie a, ɛmaa ɔda ali kɛ ɛ nye sɔ ɛlɔlɛ kpole mɔɔ Gyihova nee Gyisɛse lɛ maa yɛ la.
SUKOA DƆƆNWO
Sukoa ndenle ngakyile mɔɔ ɛbalua zo wɔahile ɛlɔlɛ kpole mɔɔ Gyihova nee Gyisɛse ɛla ye ali la anwo anyezɔlɛ la. Nea kɛzi Kelaese ewule Ngakyelɛlilɛ ne anwo hyia la.
3. Anyezɔlɛ ka yɛ maa yɛyɛ debie
Fa ye kɛ ɛlɛnoma wɔ azule nu yɛɛ awie ɛlie wɔ a. Ɛbamaa ɛ rɛle avi mɔɔ ahenle yɛle maanle wɔ la ɔ? Anzɛɛ ɛbakpondɛ ndenle wɔalua zo wɔamaa yeanwu kɛ ɛ nye sɔ mɔɔ ɔyɛle ɔmaanle wɔ la?
Gyihova a ɛmaa yɛ ngoane a. Kenga 1 Dwɔn 4:8-10, na akee bɛzuzu kpuya ɛhye mɔ anwo:
Duzu ati a Gyisɛse afɔlebɔlɛ ne le ahyɛlɛdeɛ titili a?
Kɛzi ɛbu mɔɔ Gyihova nee Gyisɛse ɛyɛ ɛmaa wɔ la ɛ?
Kɛ ɔkɛyɛ na yɛahile mɔɔ Gyihova nee Gyisɛse ɛyɛ ɛmaa yɛ la anwo anyezɔlɛ ɛ? Kenga 2 Kɔlentema 5:15 yɛɛ 1 Dwɔn 4:11; 5:3. Ɛkenga tɛkese ko biala ɛwie a, bɛzuzu kpuya ɛhye anwo:
Kɛ mɔɔ tɛkese ɛhye kile la, duzu a yɛbahola yɛayɛ yɛava yɛahile nwolɛ anyezɔlɛ a?
4. Sukoa Gyisɛse
Adenle bieko mɔɔ yɛdua zo yɛkile anyezɔlɛ la a le kɛ yɛbazukoa Gyisɛse. Kenga 1 Pita 2:21, na akee bɛzuzu kpuya ɛhye anwo:
Ndenle boni mɔ a ɛbahola wɔalua zo wɔali Gyisɛse agyakɛ anzi kpalɛ a?
Gyisɛse hulole Nyamenle Edwɛkɛ ne, ɔbɔle edwɛkpa ne nolo na ɔboale awie mɔ
5. Kɔ Kelaese ewule Ngakyelɛlilɛ ne bie
Amaa wɔanwu mɔɔ hɔle zo wɔ Awulae Nɔsolɛ Aleɛ mɔɔ limoa la abo la, kenga Luku 22:14, 19, 20. Akee bɛzuzu kpuya ɛhye mɔ anwo:
Duzu a hɔle zo wɔ Awulae Nɔsolɛ Aleɛ ne abo a?
Duzu a paano ne nee nwanye ne gyi ɛkɛ maa a?—Nea ngyehyɛnu 19 nee 20.
Ɛnee Gyisɛse kpondɛ kɛ ye ɛdoavolɛma yɛ Awulae Nɔsolɛ Aleɛ ne kokye ɛvolɛ biala bɛfa bɛkakye kenle mɔɔ ɔwule la. Ɔti, Gyihova Alasevolɛ yia nu ɛvolɛ biala na bɛkakye Kelaese ewule ne kɛ mɔɔ ɔhilele kɛ bɛyɛ ye la. Amaa wɔazukoa ayia ɛhye mɔɔ anwo hyia la anwo debie la, ye VIDIO ne. Akee bɛzuzu kpuya ɛhye anwo.
Duzu a bɛyɛ ye wɔ Ngakyelɛlilɛ ne abo a?
Paano ne nee nwanye ne gyi ɛkɛ maa debie. Paano ne gyi ɛkɛ maa Gyisɛse sonlabaka ne mɔɔ di munli mɔɔ ɔvale ɔbɔle afɔle ɔmaanle yɛ la. Nwanye ne gyi ɛkɛ maa ye mogya ne
BIE MƆ KA KƐ: “Ɛdie Gyisɛse ɛdi ala a ɛbanyia ngoane.”
Kɛzi ɛbava Dwɔn 3:16 yɛɛ Gyemise 2:17 wɔahile kɛ dɔɔnwo boka nwo ɛ?
EDWƐKƐ TITILI
Saa yɛda ye ali kɛ yɛlɛ diedi wɔ Gyisɛse anu na yɛkɔ ye ewule Ngakyelɛlilɛ ne abo a, ɔkile kɛ yɛ nye sɔ mɔɔ yeyɛ yemaa yɛ la.
Ndinu
Diedi mɔɔ awie da ye ali wɔ Gyisɛse anu la kile duzu?
Kɛzi ɛkulo kɛ ɛkile mɔɔ Gyihova nee Gyisɛse ɛyɛ ɛmaa wɔ la anwo anyezɔlɛ ɛ?
Duzu ati a ɔhyia kpalɛ kɛ ɛkɔ Kelaese ewule Ngakyelɛlilɛ ne bie a?
KPONDƐ DƆƆNWO
Duzu a Kelaese ewule ne ka yɛ maa yɛyɛ a?
Sukoa diedi nwo ninyɛne dɔɔnwo nee kɛzi yɛbahola yɛala ye ali la.
“Nyia Gyihova Ɛwɔkɛ Ne Mɔ Anu Diedi” (Ɛzinzalɛ Arane, October 2016)
Wɔ anwubielɛ ne mɔɔ se, “Mete Nganeɛ Kɛ Me Nwo Te, Mede Ngoane Nu Yɛɛ Me Nye Die” la anu, nea kɛzi Kelaese afɔlebɔlɛ ne mɔɔ raalɛ bie zukoale nwolɛ debie la hakyile ye ɛbɛlabɔlɛ la.
Nea deɛmɔti menli ekyi bie a di Ngakyelɛlilɛ aleɛ ne bie la.