ƐZUKOALƐDEƐ 18

Maa Tievolɛma Ɛnyia Zolɛ Nvasoɛ

1 Kɔlentema 9:19-23

MƆƆ ƆHYIA KƐ ƐYƐ: Maa wɔ tievolɛma ne ɛdwenle edwɛkɛ ne anwo, amaa bɛade nganeɛ kɛ bɛzukoa debie mɔɔ nwolɛ hyia la.

Suzu mɔɔ wɔ tievolɛma ze ye dɛba la anwo. Kɛ anrɛɛ ɛbaha edwɛkɛ mɔɔ bɛde ye ɛlɛ zɔhane ala la, boa bɛ maa bɛde ɔ bo wɔ adenle fofolɛ zo.

Mmasɛkye mekɛ dɔɔnwo wɔ edwɛkɛ mɔɔ bɛze ye dɛba la anwo. Noko tɔ ɛ rɛle aze kilehile ninyɛne mɔɔ le fofolɛ la anu.
Yɛ neɛnleanu na dwenledwenle nwo. Saa ɔkɛyɛ boɛ a, ka edwɛkɛ mɔɔ bɛnze ye kpalɛ anzɛɛ edwɛkɛ mɔɔ ɛzi kenle nsa ye la fa kile wɔ edwɛkɛ titili ne mɔ anu. Dwenle wɔ gyimalilɛ ne anwo kpalɛ, na nwu kɛzi edwɛkɛ ne fale mɔɔ ɛkulo kɛ ɛkilehile nu anwo la.

Bɔ mɔdenle dwenle edwɛkɛ ne mɔɔ ɛlɛsukoa la anwo ɔlua kpuya le kɛ ‘duzu, kɛmɔti ɛ, kenlenzu, nienwu, nwane, yɛɛ kɛzi’ mɔɔ ɛbabiza ɛ nwo la azo. Wɔ wɔ ngilehilelɛ ne kɔsɔɔti anu, biza kpuya ɛhye mɔ bie na bua amaa wɔ ɛdendɛlɛ ne ayɛ anyelielɛ.
Maa bɛnwu nvasoɛ mɔɔ wɔ wɔ edwɛkɛ ne azo la. Kilehile kɛzi Ngɛlɛlera ne bahola aboa wɔ tievolɛma wɔ bɛ ɛbɛlabɔlɛ nu alehyenlɛ biala la anu. Ɛ nee bɛ ɛzuzu tɛnlabelɛ titili bie, subane anzɛɛ nyɛleɛ bie mɔ mɔɔ fɛta na ɔbaboa bɛ la anwo.