ƐZUKOALƐDEƐ 10
Kakyihakyi Ɛ Ne
Mrɛlɛbulɛ 8:4, 7
MƆƆ ƆHYIA KƐ ƐYƐ: Maa adwenle nee nganeɛdelɛ mɔɔ wɔ nu la ɛla ali ɔlua ɛ ne mɔɔ ɛbamaa ye zo anzɛɛ ɛbaha ye aze, wɔayɛ ye kpole anzɛɛ nretee na wɔaha ye ndɛndɛ anzɛɛ bɛtɛɛ la azo.
KƐZI ƐBAYƐ YE LA:
Maa ɛ ne zo anzɛɛ ka ye aze. Maa ɛ ne zo fa da edwɛkɛ titili mɔɔ wɔ nu la ali na fa maa wɔ tievolɛma anwosesebɛ. Saa ɛlɛkenga Ngɛlɛlera bie mɔɔ ka ndɛnebualɛ nwo edwɛkɛ a maa ɛ ne zo. Ka ɛ ne aze fa maa bɛ nye ɛla debie ade anzɛɛ fa da ɛzulolɛ anzɛɛ nyanelilɛ ali.
Yɛ ɛ ne kpole anzɛɛ nretee. Saa ɔfɛta wɔ bɛ aneɛ ne anu a, yɛ ɛ ne kpole fa da wuluwuluyɛlɛ anzɛɛ kɛzi debie kpole de anzɛɛ fa da adenle bie tendenle ali. Yɛ ɛ ne nretee fa da alɔbɔlɛlilɛ anzɛɛ nyanelilɛ ali.
Ka ye ndɛndɛ anzɛɛ bɛtɛɛ. Saa edwɛkɛ ne yɛ anyelielɛ a, tendɛ ndɛndɛ. Akee saa ɛlɛka edwɛkɛ mɔɔ hyia la a, tendɛ bɛtɛɛ.