Dwɔn Yekile

Mɔɔ ɛzoanvolɛ Dwɔn la efiade wɔ Patemɔso bɔra ne azo la, Gyisɛse yele ninyɛne 16 mɔɔ bazi kenle bie la hilele ye. Ɛnee ninyɛne ɛhye mɔ kile kɛzi bɛbade Gyihova duma nwo, kɛzi ye Belemgbunlililɛ ne bara, yɛɛ kɛzi ye ɛhulolɛdeɛ bayɛ ɛkɛ wɔ azɛlɛ ye azo kɛ anwuma la.

Wɔ ko anu, Dwɔn nwunle Gyihova kɛ ɔde ye anyunlunyia belemgbunli ebia zo wɔ anwuma yɛɛ mgbanyima 24 mɔɔ wula adɛladeɛ fufule na nvutuke abotile bobɔ bɛ ti la ɛbɔ ɛyia ye. Bɛdele ɛsɛlɛmanye nee ezulehululɛ ne wɔ belemgbunli ebia ne anyunlu. Mgbanyima 24 ne koto Gyihova na bɛsonle ye. Dwɔn eza nwunle menli ekpunli kpole mɔɔ bɛvi maanle, menli nee aneɛ kɔsɔɔti anu mɔɔ bɛsonle Gyihova la. Gyisɛse mɔɔ le Boaneralɛ ne la nea bɛ nwo zo na ɔfa bɛ ɔkɔ ngoane nzule nwo. Nzinlii, ɔnwunle Gyisɛse kɛ ɔ nee mgbanyima 24 ne ɛlɛdi Belemgbunli wɔ anwuma. Eza ɔnwunle kɛ Gyisɛse nee ɛwɔlɛ ne mɔɔ le Seetan la nee ye sunsum ɛtane ne mɔ honle. Gyisɛse vuandinle bɛ guale azɛlɛ ye azo.

Akee Dwɔn nwunle Boaneralɛ ne nee menli 144,000 ne mɔɔ bɛgyi Zayɔn Boka ne azo la anwo nvoninli kɛnlɛma bie. Eza ɔnwunle kɛ anwumabɔvolɛ bie ɛdu ɔlua anwomanyunlu na ɔlɛka yeahile menli kɛ bɛzulo Nyamenle na bɛwula Ye anyunlunyia.

Akee ɔnwunle kɛ bɛho Amagɛdɔn konle ne. Gyisɛse nee ye ɛlɔne ne ɛli Seetan ɛtane ewiade ne azo konim wɔ konle ne anu. Awieleɛ bɔkɔɔ ne, Dwɔn nwunle kɛ koyɛlɛ mɔɔ di munli la wɔ anwuma nee azɛlɛ ye azo. Bɛzɛkye Seetan nee ɔ bo zo amra bɔkɔɔ. Awie biala mɔɔ wɔ anwuma nee azɛlɛ ye azo la bu Gyihova duma ne kɛ ɔle nwuanzanwuanza na ɔsonle ɔ ngomekye ala.