Bɛvale Pɔɔlo Bɛhɔle Wulomu

Pɔɔlo adendulɛ ne mɔɔ tɔ zo nsa la hɔwiele wɔ Gyɛlusalɛm. Ɔhɔdwule ɛkɛ la, bɛhyele ye bɛdole efiade. Nɔe ne, Gyisɛse hanle hilele ye wɔ ɛnyelɛzodeɛnwunlɛ nu kɛ: ‘Ɛbahɔ Wulomu na wɔaha edwɛkɛ ne wɔ ɛkɛ.’ Bɛ nee Pɔɔlo vi Gyɛlusalɛm hɔle Sizalia na ɔlale efiade ɛvolɛ nwiɔ wɔ ɛkɛ. Mɔɔ bɛvale Pɔɔlo bɛhɔle Amɛnlado Fɛsetɛse anyunlu la, ɔhanle kɛ: ‘Maa Siza ɛli me edwɛkɛ wɔ Wulomu.’ Fɛsetɛse hanle kɛ: “Wɔdo wɔ edwɛkɛ ne wɔmaa Siza a; ɛnee Siza ɛkɛ ne a ɛbahɔ a.” Bɛmaanle Pɔɔlo vole meli bie mɔɔ ɛlɛkɔ Wulomu la anu na Kilisiene mediema nwiɔ, Luku nee Alesetaakɛse nee ye hɔle.

Mɔɔ bɛlua nyevile ne azo la, ahumu kpole bie dule na ɔlile kenle dɔɔnwo. Awie biala dwenlenle kɛ bɛbawu. Noko Pɔɔlo hanle kɛ: ‘Ayi mɔ, anwumabɔvolɛ bie hanle hilele me wɔ ɛlalɛ nu kɛ: “Pɔɔlo mmasulo. Ɔwɔ kɛ ɛkɔgyinla Siza anyunlu, na nea! Nyamenle balie bɛdabɛ mɔɔ ɛ nee bɛ lua la amuala ngoane.” Bɛzi ahonle na yɛnrɛwu.’

Ahumu ne dule too kenle 14. Nzinlii, akee bɛnwunle azɛlɛ bie. Mɔleta bɔra ne ɔ. Meli ne hɔnwenle na ɔbubule, noko menli 276 ne mɔɔ wɔ nu la biala anwu. Bie mɔ weɛle hɔle file zo yɛɛ bie mɔ noko vole meli ne mɔɔ ɛbubu la ndaboa ne bie mɔ azo. Menli mɔɔ wɔ Mɔleta la nleanle bɛ na bɛzɔle senle bɛmaanle bɛdɛnlanle nwolɛ.

Siane nsa anzi, sogyama ne vale meli gyɛne na bɛ nee Pɔɔlo hɔle Wulomu. Mɔɔ bɛdwule ɛkɛ la, mediema ne mɔ rayiale ye. Mɔɔ Pɔɔlo nwunle bɛ la, ɔyɛle Gyihova mo na ɔnyianle akɛnrasesebɛ. Ɛnee Pɔɔlo le pilizanli, noko bɛmaanle ɔdɛnlanle sua mɔɔ yehaye la anu na sogyanli bie zinzale ye. Ɔdɛnlanle ɛkɛ ne too ɛvolɛ nwiɔ. Menli rale ye ɛkɛ na ɔhanle Nyamenle Belemgbunlililɛ ne nee Gyisɛse anwo edwɛkɛ dɔɔnwo ɔhilele bɛ. Eza Pɔɔlo hɛlɛle ngɛlata hɔmaanle asafo ne mɔ mɔɔ wɔ Ehyea Ekyi nee Dwudiya la. Gyihova maanle Pɔɔlo bɔle edwɛkpa ne nolo hilele maanle maanle ne mɔ amgba.