Gyisɛse Bɔle Belemgbunlililɛ Edwɛkɛ Ne Nolo

Mɔɔ bɛzɔnenle Gyisɛse bɛwiele la, yeangyɛ ɔbɔle ɔ bo ɔbɔle nolo kɛ: ‘Nyamenle Belemgbunlililɛ ne ɛbikye.’ Ɛdoavolɛma lile ɔ nzi wɔ mekɛ mɔɔ ɔlɛkpɔsa Galeli nee Dwudiya la. Mɔɔ Gyisɛse ziale rale ye sua zo Nazalɛte la, ɔhɔle nyianusua ne anu, ɔbukele Ayezaya nwomamobɔleɛ ne anu na ɔgengale ye kpole kɛ: ‘Gyihova ɛmaa me sunsum nwuanzanwuanza amaa meahola meabɔ edwɛkpa ne nolo.’ Duzu a ɛnee ɛhye kile a? Ɔkile kɛ, ɛnee menli kpondɛ kɛ bɛnwu kɛ Gyisɛse ɛlɛyɛ nwanwane ninyɛne ɛdeɛ, noko debie titili mɔɔ ɔti ɔnyianle sunsum nwuanzanwuanza ne la a le kɛ ɔbabɔ edwɛkpa ne nolo. Akee ɔzele menli mɔɔ ɛlɛtie ye la kɛ: ‘Ɛnɛ, ngapezo ɛhye ɛra nu.’

Gyisɛse doale zo hɔle Galeli Nyevile ne anloa, na ɔyiale ye ɛdoavolɛma ne anu nna mɔɔ bɛkye fɛlɛ la. Ɔhanle ɔhilele bɛ kɛ: ‘Bɛrɛla na mebamaa bɛahye menli kɛ bɛkye fɛlɛ la.’ Ɛdoavolɛma nna ne a le Pita, Andelu, Gyemise yɛɛ Dwɔn. Ɛkɛ ne ala, bɛgyakyile bɛ fɛlɛhyelɛ gyima ne na bɛdoale Gyisɛse. Bɛhɔhanle Gyihova Belemgbunlililɛ ne anwo edwɛkɛ wɔ Galeli amuala. Bɛhanle edwɛkɛ ne wɔ nyianu azua nu, gua nu nee awɔdenle zo. Menli dɔɔnwo lile bɛ nzi hɔle ɛleka biala mɔɔ bɛhɔle la. Gyisɛse anwo edwɛkɛ dɛlɛle hɔle ɛleka biala too ɔhɔdwule Selea bɔbɔ.

Nzinlii, Gyisɛse maanle ye ɛdoavolɛ ne mɔ bie tumi kɛ bɛyɛ menli ayile na bɛdu sunsum ɛtane. Mekɛ mɔɔ ɔlɛbɔ nolo ne wɔ azuamgbole nee namunamu zo la awie mɔ nee ye hɔle. Mraalɛ nɔhavoma bie mɔ le kɛ Mɛle Magedalene, Dwowana yɛɛ Susana noko nee bɛ hɔle, na bɛboale Gyisɛse nee ye ɛdoavolɛma ne.

Mɔɔ Gyisɛse tetele ye ɛdoavolɛ ne mɔ wiele la, ɔzoanle bɛ kɛ bɛhɔbɔ edwɛkpa ne nolo. Mɔɔ bɛhɔkpɔsale Galeli amuala la, menli dɔɔnwo rayɛle ɛdoavolɛma na bɛzɔnenle bɛ. Ɛnee menli dɔɔnwo kulo kɛ bɛyɛ ɛdoavolɛma, yemɔti Gyisɛse vale bɛ totole ɛya mɔɔ nuhua ma ɛdwu kɛ bɛte la anwo. Ɔhanle kɛ: ‘Bɛzɛlɛ Gyihova kɛ ɔmaa gyimayɛvoma ɛrɛla ye ma ɛdelɛ gyima ne anu.’ Nzinlii, ɔkpale ɛdoavolɛma 70 na ɔzoanle bɛ nwiɔ nwiɔ kɛ bɛhɔha edwɛkɛ ne wɔ Dwudiya amuala. Bɛhilehilele menli ngakyile kɔsɔɔti Belemgbunlililɛ ne anwo debie. Mɔɔ ɛdoavolɛ ne mɔ ziale rale la, bɛhanle mɔɔ zile la bɛhilele Gyisɛse. Abɔnsam angola anyɛ debie biala anva anzi edwɛkɛhanlɛ gyima ne adenle.

Gyisɛse boale ye ɛdoavolɛma amaa saa ɔsia ɔkɔ anwuma a, bɛahola bɛadoa zo bɛayɛ gyima ɛhye mɔɔ hyia la. Ɔhanle ɔhilele bɛ kɛ: ‘Bɛbɔ edwɛkpa ne nolo wɔ ewiade amuala. Bɛhilehile menli Nyamenle Edwɛkɛ ne na bɛzɔne bɛ.’