Raalɛ Bie Wɔ Bula Ne Azo

Mɔɔ bɛwiele Akpabɛnwo ne na Gyisɛse nee ye ɛdoavolɛma ne ɛlɛsia ahɔ Galeli la, bɛhɔvale Samɛlea. Mɔɔ bɛbikyele Saekaa la, Gyisɛse dɛnlanle Gyekɔbo bula ne azo. Mɔɔ ɔlɛdie ɔ menle wɔ ɛkɛ ne la, ye ɛdoavolɛma ne hɔle sua zo kɛ bɛkadɔ aleɛ.

Raalɛ bie rale bula ne azo kɛ ɔbaza nzule. Gyisɛse zele ye kɛ: “Maa me nzule ne bie meno.” Raalɛ ne hanle kɛ: ‘Duzu ati a ɛ nee me ɛlɛtendɛ a? Mele Samɛleanli. Dwuuma nee Samɛleama ɛnga.’ Gyisɛse zele ye kɛ: ‘Saa ɛze me sonla holɛ a, anrɛɛ ɛbabiza me na meamaa wɔ ngoane nzule.’ Raalɛ ne buale ye kɛ, ‘Edwɛkɛ boni a ɛlɛka la, ɛnlɛ bokiti bɔbɔ mɔɔ ɛbava wɔaza nzule a.’ Gyisɛse hanle kɛ: “Awie biala mɔɔ kɛnlo nzule ne mɔɔ mebava meamaa ye la, nzuhɔne ɛnrɛhu ye bieko.” Raalɛ ne hanle kɛ, “Yɛmenle, maa me nzule ɛhye bie maa meno.”

Akee Gyisɛse zele ye kɛ: ‘Kɔvɛlɛ ɛ hu bɛla.’ Raalɛ ne hanle kɛ: “Mengya nrenyia.” Gyisɛse hanle kɛ: ‘Wɔha nɔhalɛ. Wɔhɔ agyalɛ fane nnu, na nrenyia ne mɔɔ ɛ nee ye de kɛkala la, ɔnle ɛ hu.’ Raalɛ ne hanle kɛ: ‘Menwu kɛ ɛle ngapezonli. Yɛmɛ yɛdie yɛdi kɛ yɛkola yɛsonle Nyamenle wɔ boka ɛhye azo, noko Dwuuma se Gyɛlusalɛm ala a ɔwɔ kɛ yɛsonle a. Medie medi kɛ Mɛzaya ne ba a, ɔbahile yɛ kɛzi ɔwɔ kɛ yɛsonle la.’ Akee Gyisɛse hanle edwɛkɛ mɔɔ ɔtɛbɔle zolɛ ɔtɛkilele awie biala ɛlɛ la: ‘Medame a mele Mɛzaya ne a.’

Raalɛ ne nriandile hɔle sua ne azo hɔhanle hilele Samɛleama ne kɛ: ‘Ɔzɔho kɛ menwu Mɛzaya ne. Ɔze me nwo edwɛkɛ biala. Bɛrɛla bɛranlea!’ Bɛdoale ye bɛhɔle bula ne azo na bɛdiele Gyisɛse.

Samɛleama hanle hilele Gyisɛse kɛ ɔdɛnla bɛ sua ne azo. Ɔdɛnlanle bɛ nwo ɛkɛ ne kenle nwiɔ na ɔhilehilele bɛ, na menli dɔɔnwo liele ye lile. Bɛhanle bɛhilele raalɛ ne kɛ: “Yɛde na yɛnwu kɛ nrenyia ɛhye le ewiade ne ngoanedievolɛ amgba.”