Anwumabɔvolɛma Bɔle Gyisɛse Awolɛ Ne Nolo

Wulomu Maanle Belemgbunli Siza Ɔgɛsetɛse hanle kɛ Dwuuma amuala ɛzia ɛhɔ bɛ sua zo bɛmaa bɛhɛlɛ bɛ aluma. Yemɔti Dwosefi nee Mɛle ziale hɔle Bɛtelɛhɛm, ɛleka mɔɔ Dwosefi nee ye abusua ne vi la. Ɛnee ɔka ekyii Mɛle wo.

Mɔɔ bɛdwule Bɛtelɛhɛm la, bɛannyia ɛleka biala yemɔti bɛhɔlale nane tunli nu. Ɛkɛ ne a Mɛle wole ɔ ra Gyisɛse a. Ɔvale avuazinli ɔkyekyele ɔ nwo kɛnlɛma na ɔvale ye ɔdole nane adidilɛka nu.

Ɛnee mboaneneavolɛma bie wɔ alienwo ɛlɛnea bɛ mboane wɔ ɛleka mɔɔ bikye Bɛtelɛhɛm la. Arɛlevilɛ nu ala, anwumabɔvolɛ bie ragyinlanle bɛ nyunlu ɛkɛ na Gyihova anyunlunyia ne dale bɛ nwo zo. Mboaneneavolɛma ne ahonle dule, noko anwumabɔvolɛ ne hanle kɛ: ‘Bɛmmasulo. Melɛfa anyelielɛ edwɛkɛ mearɛlɛ bɛ. Ɛnɛ, bɛwo Mɛzaya ne wɔ Bɛtelɛhɛm.’ Ɛkɛ ne ala, anwumabɔvolɛma dɔɔnwo vindele anwomanyunlu na bɛhanle kɛ: ‘Anyunlunyia ɛha Nyamenle wɔ anwuma, na anzodwolɛ ɛrɛla azɛlɛ ye azo.’ Akee anwumabɔvolɛ ne mɔ hɔle. Duzu a mboaneneavolɛma ne yɛle a?

Bɛhanle bɛhilele bɛ nwo kɛ: ‘Bɛmaa yɛhɔ Bɛtelɛhɛm kɛkala.’ Mɔɔ bɛhɔle la, bɛnwunle Dwosefi nee Mɛle yɛɛ kakula ne wɔ nane tunli ne anu.

Awie biala mɔɔ dele edwɛkɛ mɔɔ anwumabɔvolɛ ne hanle hilele mboaneneavolɛma ne la ɔzinle ɔ nwo. Mɛle dwenlenle anwumabɔvolɛ ne edwɛkɛ ne anwo kpalɛ na ɔ rɛle anvi ye ɛlɛ. Mboaneneavolɛma ne ziale hɔnleanle bɛ mboane ne, na bɛyɛle Gyihova mo wɔ mɔɔ bɛnwunle ye nee mɔɔ bɛdele la amuala anwo.