Geebeleɛle Hɔkpɔlale Mɛle

Ɛnee Ɛlezabɛte busuanli Mɛle mɔɔ le bɛlɛra la de Nazalɛte mɔɔ wɔ Galeli la. Ɛnee Dwosefi mɔɔ le kapentanli la ɛbɔ Mɛle ɛwɔkɛ kɛ ɔbagya ye. Mɔɔ Ɛlezabɛte nrenzɛle siane nsia la, anwumabɔvolɛ Geebeleɛle rale Mɛle anwo ɛkɛ. Ɔhanle kɛ: ‘Anzodwolɛ ɛha wɔ, Mɛle. Gyihova ɛlo wɔ kpole.’ Mɛle ande mɔɔ Geebeleɛle hanle la abo. Akee ɔzele ye kɛ: ‘Ɛbanrenzɛ wɔawo rale nrenyia, na ɛbado ye duma Gyisɛse. Ɔbali Belemgbunli. Ye Belemgbunlililɛ ɛnrɛra awieleɛ ɛlɛ.’

Noko Mɛle hanle kɛ: ‘Menze nrenyia. Kɛ ɔkɛyɛ na meawo ralɛ ɛ?’ Geebeleɛle hanle kɛ: ‘Debie biala ɛnyɛ se ɛmmaa Gyihova. Sunsum nwuanzanwuanza ne bara ɛ nwo zo, na ɛbawo ralɛ nrenyia. Wɔ busuanli Ɛlezabɛte noko ɛnrenzɛ.’ Akee Mɛle hanle kɛ: “Gyihova sonvolɛ bɛlɛra a le me. Mɔɔ wɔha la ɛyɛ zɔ ɛmaa me.”

Mɛle hɔle sua bie mɔɔ gua awoka zo la azo kɛ ɔkakpɔla Ɛlezabɛte. Mɔɔ Mɛle bizale ye ahye la, Ɛlezabɛte dele kɛ kakula ne mɔɔ la ɔ kunlu la ɛwulu. Sunsum nwuanzanwuanza ne yile Ɛlezabɛte tɛkɛɛ na ɔhanle kɛ: ‘Mɛle, Gyihova ɛyila wɔ. Menyia nwolɛ adenle kɛ me Awulae mame ɛra me sua nu la.’ Mɛle hanle kɛ: ‘Me ahonle muala kanvo Gyihova.’ Mɛle nee Ɛlezabɛte dɛnlanle siane nsa na ɔziale ɔhɔle Nazalɛte.

Mɔɔ Dwosefi nwunle kɛ Mɛle ɛlɛnrenzɛ la, ɔnyianle adwenle kɛ ɔbagyakyi ye. Noko anwumabɔvolɛ rale ɔ nwo ɛkɛ wɔ ɛlalɛ nu na ɔhanle kɛ: ‘Mmasulo kɛ ɛbagya ye. Ɔtɛyɛle ɛtane biala.’ Yemɔti Dwosefi gyale ye na ɔvale ye ɔhɔle ye sua nu.