Gyihova Liele Gyɛhɔhyafate

Dwuda Belemgbunli Gyɛhɔhyafate zɛkyele Beeyale afɔlemokyea nee ananze mɔɔ wɔ maanle ne anu la. Ɛnee ɔkpondɛ kɛ menli ne nwu Gyihova mɛla ne. Yemɔti ɔzoanle mgbanyima nee Livaema ɔmaanle bɛhɔle Dwuda ɛleka biala bɛhɔhilehilele menli ne Gyihova mɛla ne.

Ɛnee maanle mɔɔ zuozua Dwuda la sulo kɛ bɛbava konle bɛadoa bɛ ɔluakɛ bɛze kɛ Gyihova nee ye menli ne lua. Bɛhyɛle Belemgbunli Gyɛhɔhyafate ninyɛne bɔbɔ. Noko Mowabema, Amɔnoma nee menli mɔɔ vi Siyɛ maanzinli nu la rale kɛ bɛ nee Dwuda baho. Ɛnee Gyɛhɔhyafate ze kɛ kyesɛ Gyihova boa ye. Ɔmaanle mrenyia, mraalɛ nee ngakula ne mɔ kɔsɔɔti rayiale Gyɛlusalɛm. Ɔgyinlanle bɛ nyunlu ɔyɛle asɔne kɛ: ‘Gyihova, saa wɔamboa yɛ a, yɛnrɛhola yɛnrɛli konim. Yɛsɛlɛ wɔ kile yɛ mɔɔ ɔwɔ kɛ yɛyɛ la.’

Gyihova buale bɛ asɔneyɛlɛ ne na ɔhanle kɛ: ‘Bɛmmasulo. Mebaboa bɛ. Bɛgyinla bɛ bo zo ne, bɛmmatu bɛ bo, na bɛnlea kɛzi mebalie bɛ la.’ Kɛzi Gyihova liele bɛ ɛ?

Aleɛ hyenle la, Gyɛhɔhyafate maanle edwɛndolɛma dole edwɛne lile sogyama ne anyunlu. Bɛvi Gyɛlusalɛm bɛhɔle konle ne anloa wɔ Tɛkowa.

Mɔɔ edwɛndolɛma ne ɛlɛto edwɛne aye Gyihova ayɛlɛ la, Gyihova honle maanle ye menli ne. Ɔmaanle Amɔnoma nee Mowabema anye zo danle bɛ, na bɛhunle bɛ nwo. Noko Gyihova bɔle Dwudama, sogyama ne yɛɛ ɛsɔfo ne mɔ anwo bane. Maanle ngakyile mɔɔ bikye bɛ la dele mɔɔ Gyihova ɛyɛ la, yemɔti ɛnee bɛze kɛ Gyihova ɛlɛko amaa ye menli ne. Kɛzi Gyihova die ye menli ɛ? Ɔdua ndenle ngakyile zo. Ɔngyia menli moalɛ na yealie bɛ.