Yizilayɛma Belemgbunli Mɔɔ Limoa

Gyihova maanle Yizilayɛma ndɛnebuavolɛma mɔɔ nea bɛ nwo zo a, noko bɛhanle kɛ bɛkpondɛ belemgbunli. Bɛzele Samoɛle kɛ: ‘Maanle mɔɔ ɛbɔ yɛ nwo ɛyia la amuala lɛ arelemgbunli. Yɛdayɛ noko yɛkpondɛ bie.’ Samoɛle nwunle kɛ ɛhye ɛnle adwenle kpalɛ, yemɔti ɔyɛle nwolɛ asɔne. Gyihova zele ye kɛ: ‘Tɛ ɛdawɔ a menli ne ɛkpo wɔ a. Medame a bɛkpo me a. Ka kile bɛ kɛ bɛbanyia belemgbunli noko ɔbamaa bɛayɛ ninyɛne dɔɔnwo.’ Noko menli ne hanle kɛ: ‘Ɔnvale yɛ nwo, yɛkpondɛ belemgbunli!’

Gyihova hanle hilele Samoɛle kɛ ɔbamaa nrenyia bie mɔɔ bɛfɛlɛ ye Sɔɔlo la ayɛ bɛ belemgbunli. Mekɛ mɔɔ Sɔɔlo hɔkpɔlale Samoɛle wɔ Releema la, Samoɛle vale nwole kpokpale ye kɛ Yizilayɛ belemgbunli mɔɔ limoa.

Nzinlii Samoɛle maanle Yizilayɛma amuala yiale kɛ ɔfa bɛ belemgbunli fofolɛ ne yeahile bɛ. Noko ɛnee bɛnnwu ɛleka mɔɔ Sɔɔlo wɔ a. Ɛnea a duzu ati ɔ? Ɔnriandile ɔhɔveale la ati ɔ. Nzinlii mɔɔ bɛnwunle Sɔɔlo la, bɛ nee ye rale menli ne anyunlu. Ɛnee ɔwale ɔtɛla awie biala yɛɛ ɔ nwo yɛ fɛ kpalɛ. Samoɛle hanle kɛ: ‘Bɛnlea ahenle mɔɔ Gyihova ɛkpa nu ɛye ye la.’ Menli ne deanle nu kɛ: ‘Belemgbunli ɛnyi ɛhyɛ!’

Alimoa ne, Sɔɔlo diele Samoɛle nee Gyihova. Noko amozii ɔhakyile. Kɛ neazo la, ɛnee ɔnle kɛ belemgbunli bɔ afɔle. Kenle ko bie, Samoɛle hanle hilele Sɔɔlo kɛ ɔhendɛ ye, noko Samoɛle amba ndɛ. Yemɔti Sɔɔlo zile kpɔkɛ kɛ ɔdaye mumua ne ɔbabɔ afɔle ne. Duzu a Samoɛle yɛle a? Ɔhanle ɔhilele ye kɛ: ‘Anrɛɛ ɔwɔ kɛ ɛtie Gyihova.’ Asoo Sɔɔlo zukoale debie vile nvonleɛ mɔɔ ɔyɛle la anu ɔ?

Nzinlii, Sɔɔlo hɔle kɛ ɔ nee Amalɛkema kaho, Samoɛle hanle hilele ye kɛ anrɛɛ ɔmmagyakyi sonla ko bɔbɔ. Noko Sɔɔlo angu Belemgbunli Egage. Gyihova zele Samoɛle kɛ: ‘Sɔɔlo ɛkpo me yɛɛ ɔndie me ne.’ Samoɛle lile nyane kpole na ɔzele Sɔɔlo kɛ: ‘Kɛmɔ ɛndie Gyihova ane la ati, ɔbaye belemgbunli fofolɛ.’ Mɔɔ Samoɛle hakyile ɔ nwo kɛ ɔkɔ la, Sɔɔlo zɔle ye tɛladeɛ ne anu, yemɔti ye tɛladeɛ aguzo ne anloa dele. Akee Samoɛle zele ye kɛ: ‘Gyihova ɛlie belemgbunlililɛ ne ɛvi ɛ sa nu.’ Ɛnee Gyihova bava belemgbunlililɛ ne amaa awie fofolɛ mɔɔ bahulo ye na yeadie ye la.