Bɛdele Atua Bɛtiale Gyihova

Mɔɔ Yizilayɛma wɔ fienemgbole ne anu la, Kɔla, Deetan nee Abaelam yɛɛ menli 250 dwazole tiale Mosisi. Bɛhanle bɛhilele ye kɛ: ‘Akee bɛyɛ bɛmaa yebo zolɛ! Duzu ati a ɔwɔ kɛ ɛdi yɛ nyunlu na Aalɔn yɛ ɛsɔfo kpanyinli a? Tɛ ɛ nee Aalɔn angomekye a Gyihova nee bɛ lua a, ɔ nee yɛ muala lua.’ Yeanyɛ Gyihova fɛ. Ɔbule ye kɛ bɛlɛte ɔ nwo atua!

Mosisi hanle hilele Kɔla nee ɔ sa zo ne mɔ kɛ: ‘Ɛhyema, bɛrɛla ɛdanlɛsua ne anwo, na bɛva ayilevuanlɛ bɛgua bɛ ayilevuanlɛ ahyɛnze ne mɔ anu bɛrɛla. Na Gyihova bamaa yɛanwu ahenle mɔɔ yekpa ye la.’

Aleɛ hyenle la, Kɔla nee mrenyia 250 ne hɔyiale Mosisi wɔ ɛdanlɛsua ne anwo. Bɛyelale ayilevuanlɛ wɔ ɛkɛ kɛ asɛɛ bɛle ɛsɔfoma la. Gyihova hanle hilele Mosisi nee Aalɔn kɛ: ‘Bɛhwe bɛ nwo bɛvi Kɔla nee ɔ sa zo ne mɔ anwo.’

Kɔla hɔyiale Mosisi wɔ ɛdanlɛsua ne anwo, noko Deetan, Abaelam nee bɛ mbusuafoɔ angɔ bie. Gyihova hanle hilele Yizilayɛma kɛ bɛhwe bɛ nwo bɛvi Kɔla, Deetan nee Abaelam ɛdanlɛ azua ne mɔ anwo. Ɛkɛ ne ala Yizilayɛma hwenle bɛ nwo. Deetan, Abaelam nee bɛ mbusuafoɔ gyinlanle bɛ ɛdanlɛsua ne mɔ anyunlu. Azɛlɛ ne kpakyele arɛlevilɛ nu na ɔmenle bɛ muala! Eza senle vi anwuma rayelale Kɔla nee menli 250 ne wɔ ɛdanlɛsua ne anwo.

Akee Gyihova hanle hilele Mosisi kɛ: ‘Maa abusua ekpunli bulu nee nwiɔ ne anu abusua kpanyinli biala ɛva kpɔma ko ɛrɛla na kɛlɛ ye duma wɔ nwolɛ. Noko Livae abusua ekpunli ne kpɔma ɛdeɛ ne, kɛlɛ Aalɔn duma wɔ nwolɛ. Fa kpɔma ne mɔ gua ɛdanlɛsua ne anu, na ahenle mɔɔ mebakpa ye la kpɔma ɛdeɛ ne bafifi ayɛ felawɔse.’

Aleɛ hyenle la, Mosisi vale kpɔma ne mɔ amuala hɔhilele mgbanyima ne mɔ. Aalɔn kpɔma ɛdeɛ ne fifile yɛle felawɔse na ɔzole alemɔndo ma mɔɔ ɛbolo la. Gyihova luale adenle ɛhye azo hilele kɛ yekpa Aalɔn kɛ ɔyɛ ɛsɔfo kpanyinli.