Busiama Bulu Nee Nwiɔ Ne

Yizilayɛma vile Saenae Boka ne anwo na bɛvale Peelan fienemgbole ne anu bɛhɔle ɛleka bie mɔɔ bɛfɛlɛ ye Keedɛhye la. Gyihova hanle hilele Mosisi kɛ: ‘Soa menli 12 mɔɔ ko biala vi Yizilayɛ mbusua ekpunli bulu nee nwiɔ ne anu la maa bɛhɔnleɛnlea Keena azɛlɛ ne mɔɔ mebava meamaa bɛ la azo.’ Yemɔti Mosisi kpale mrenyia 12 na ɔhanle kɛ: ‘Bɛhɔ Keena azɛlɛ ne azo na bɛnlea saa bɛdua aleɛ wɔ azɛlɛ ne azo a ɔyɛ boɛ a. Bɛnlea saa menli ne anwo yɛ se anzɛɛ bɛ nwo ɛnyɛ se a, yɛɛ saa menli ne dede tɛnte nu anzɛɛ azuamgbole zo a.’ Dwɔhyua nee Keelɛbe boka busiama 12 ne mɔɔ bɛhɔle Keena la anwo.

Wɔ kenle 40 anzi, busiama ne ziale rale na bɛvale feege ma, pɔmegelanate yɛɛ vanye ma bɛrale. Busiama ne hanle kɛ: ‘Azɛlɛ ne le kpalɛ bɔkɔɔ, noko menli mɔɔ wɔ zolɛ la anwo yɛ se, yɛɛ bɛdo bane ndendenle wɔ bɛ azuamgbole ne mɔ anwo.’ Noko Keelɛbe hanle kɛ: ‘Yɛbahola yɛali bɛ nwo zo konim. Bɛmaa yɛhɔ ndɛndɛ!’ Asoo ɛze deɛmɔti Keelɛbe hanle zɔhane edwɛkɛ ne la ɔ? Ɔluakɛ ɛnee ɔ nee Dwɔhyua lɛ Gyihova anu anwodozo. Noko busiama 10 ne mɔɔ ɛha la hanle kɛ: ‘Kyɛkyɛ! Menli mɔɔ wɔ ɛkɛ la le mgbole kɛ kakanyinlima ne la! Saa yɛgyi bɛ nwo ɛkɛ a yɛzɔho abɛbɛ.’

Yizilayɛma asa anu dole. Bɛdendɛle bɛ nzo abo na bɛhanle kɛ: ‘Bɛmaa yɛkpa kpanyinli fofolɛ yɛmaa ɔli yɛ nyunlu na yɛzia yɛhɔ Yigyibiti. Duzu ati a ɔwɔ kɛ yɛkɔ ɛkɛ ne na bɛku yɛ a?’ Dwɔhyua nee Keelɛbe hanle kɛ: ‘Bɛmmayɛ Gyihova anwo anzosesebɛ, eza bɛmmamaa bɛ ahonle tu. Gyihova babɔ yɛ nwo bane.’ Noko Yizilayɛma andie. Anrɛɛ bɛku Dwɔhyua nee Keelɛbe bɔbɔ!

Duzu a Gyihova yɛle a? Ɔhanle ɔhilele Mosisi kɛ: ‘Meyɛ ninyɛne dɔɔnwo memaa Yizilayɛma, noko bɛndie me ne. Yemɔti bɛbali ɛvolɛ 40 wɔ fienemgbole ne anu, na ɛkɛ ne yɛɛ bɛbawu bɛagua a. Bɛ mra nee Dwɔhyua yɛɛ Keelɛbe a bahɔ azɛlɛ ne mɔɔ meva mebɔ bɛ ɛwɔkɛ la azo a.’