Asetɛnla Boni A Nyamenle Kpondɛ Kɛ Yɛnyia a?

SAA ɛkenga adwelie ngɛlata, ɛnea TV anzɛɛ ɛtie riledio a, ɛtanelilɛ, konle nee amumuyɛyɛlɛ nwo edwɛkɛ ala a ɛnwu ye anzɛɛ ɛte a. Bie a anwodolɛ anzɛɛ wɔ kulovolɛ bie mɔɔ ɛwu la ɛlɛmaa wɔali nyane.

Biza ɛ nwo kɛ:

• Asoo ɛhye a Nyamenle kpondɛ kɛ ɔto me nee me abusua ne ɔ?

• Nienwu a mebanyia moalɛ meagyinla me ngyegyelɛ nloa a?

• Asoo yɛbanyia anzodwolɛ kenle bie?

Baebolo ne fa mualɛ mɔɔ tɔ ɛzonlɛ nu la maa.

BAEBOLO NE KILEHILE KƐ NYAMENLE BAYƐ NINYƐNE MƆƆ YƐ NWANWANE LA WƆ AZƐLƐ YE AZO.

• Menli ɛnrɛde nyane, bɛnrɛyɛ mgbanyinli yɛɛ bɛnrɛwu bieko.​—Yekile 21:4

• “Abuburama bawuluwulu kɛ weɛlɛ.”​—Ayezaya 35:6

• “Anyenzinliravolɛma anye babuke.”​—Ayezaya 35:5

• Bɛbadwazo mowuamra bɛara ngoane nu.​—Dwɔn 5:28, 29

• Awie biala anwo ɛnrɛdo ye.​—Ayezaya 33:24

• Awie biala mɔɔ wɔ azɛlɛ ye azo la banyia aleɛ dɔɔnwo ali.​—Edwɛne 72:16

  

NYIA MƆƆ BAEBOLO NE KILEHILE LA AZO NVASOƐ

Bie a ɛbaha kɛ buluku ɛhye anu edwɛkɛ mɔɔ limoa la le ɛlalɛ bie ala. Noko Nyamenle ɛbɔ ɛwɔkɛ kɛ ɔnrɛhyɛ ɔbayɛ nzenzaleɛ ɛhye mɔ wɔ azɛlɛ ye azo, na Baebolo ne kilehile kɛzi ɔbayɛ ɛhye la anu.

Baebolo ne eza ka edwɛkɛ dɔɔnwo. Ɔka mɔɔ ɔwɔ kɛ yɛyɛ amaa yɛ nye alie wɔ ɛbɛlabɔlɛ nu kɛkala la. Dwenle ninyɛne mɔɔ gyegye wɔ la anwo ekyii. Bie a ɔle ezukoa, abusua, anwodolɛ anzɛɛ wɔ kulovolɛ bie ewule nwo edwɛkɛ. Baebolo ne bahola aboa wɔ yeamaa wɔagyinla ngyegyelɛ ɛhye mɔ anloa, yɛɛ ɔbahola yeakyekye ɛ rɛle ɔlua kpuya ɛhye mɔ mɔɔ ɔbabua la azo:

• Duzu ati a yɛnwu amaneɛ a?

• Kɛ ɔkɛyɛ na yɛahola yɛagyinla yɛ ngyegyelɛ nloa ɛ?

• Asoo yɛ abusua bahola anyia anyelielɛ?

• Saa yɛwu a yɛkɔ ni?

• Asoo yɛbanwu yɛ alɔvolɛ mɔɔ ɛwu la bieko ɔ?

• Duzu ati a yɛlɛ anwodozo kɛ Nyamenle bali ɛwɔkɛ biala mɔɔ yebɔ la azo a?

Buluku ɛhye mɔɔ ɛlɛkenga la da ye ali kɛ ɛkulo kɛ ɛnwu mɔɔ Baebolo ne kilehile la. Buluku ɛhye baboa wɔ. Kpuya wɔ ɛdendɛkpunli biala abo, na ɔbaboa wɔ yeamaa wɔade Baebolo ne abo kpalɛ. Menli mgbe dɔɔnwo nee Gyihova Alasevolɛ ɛlɛsukoa Baebolo ne. Yɛ nye la kɛ ɛdawɔ noko ɛbayɛ ye zɔ. Nyamenle ɛyila wɔ wɔ mekɛ mɔɔ ɛlɛsukoa mɔɔ Baebolo ne kola kilehile wɔ la!