ƐZUKOALƐDEƐ 5
Samoɛle Hɔle Zo Yɛle Mɔɔ Le Kpalɛ
Mekɛ mɔɔ Samoɛle le kakula kpalɛ la, ɔdɛnlanle ndanlɛsua ne anu na ɔyɛle gyima wɔ ɛkɛ, ɛnee menli ba ɛkɛ basonle Gyihova. Ɛze kɛzi ɔyɛle mɔɔ Samoɛle hɔle ndanlɛsua ne anu ɔ? Mɔɔ lumua la, maa yɛzukoa Samoɛle mame, Hana anwo debie.
Mekɛ bie anu, ɛnee Hana ɛnlɛ ɔ ra ɔnva nwo kɛ ɔlɛkpondɛ kakula la. Yemɔti ɔzɛlɛle Gyihova kɛ ɔboa ye. Ɔbɔle ɛwɔkɛ kɛ ɔwo ralɛ nrenya a, ɔbamaa yeahɔdɛnla ndanlɛsua ne anu na yeayɛ gyima wɔ ɛkɛ. Gyihova buale ye asɔneyɛlɛ ne na ɔwole kakula nrenya. Ɔdonle ye Samoɛle. Na kɛmɔ Hana bɔle nwolɛ ɛwɔkɛ la, Samoɛle nyianle ɛvolɛ nsa anzɛɛ nna la, ɔvale ye ɔhɔle ndanlɛsua ne anu kɛ ɔhɔzonle Nyamenle wɔ ɛkɛ.
Yilae a ɛnee le ɛsɔfo kpanyinli wɔ ndanlɛsua ne anu a. Ɛnee ɔ mra mrenya nwiɔ ne noko yɛ gyima wɔ ɛkɛ. Kakye kɛ ɛnee ndanlɛsua ne le ɛleka mɔɔ bɛsonle Nyamenle wɔ ɛkɛ, na ɔwɔ kɛ menli mɔɔ wɔ ɛkɛ la bɔ ɛbɛla kpalɛ. Noko ɛnee Yilae amra ne mɔ bɔ ɛbɛlatane. Samoɛle nwunle mɔɔ ɛnee bɛlɛyɛ la. Asoo Samoɛle bɔle ɛbɛlatane kɛ Yilae amra ne mɔ la?— Kyɛkyɛ, ɔhɔle zo ɔyɛle mɔɔ le kpalɛ, kɛmɔ ye awovolɛ hilele ye kɛ ɔyɛ la.
Ɛdwenle kɛ duzu a anrɛɛ ɔwɔ kɛ Yilae yɛ ɔ mra mrenya nwiɔ ne a?— Anrɛɛ ɔwɔ kɛ ɔtea bɛ. Anrɛɛ ɔnle kɛ ɔmaa bɛyɛ gyima wɔ Nyamenle sua nu ɛkɛ ne bieko. Noko Yilae anyɛ zɔ, yemɔti Gyihova vale ɔdaye nee ɔ mra mrenya nwiɔ ne anwo ɛya. Gyihova zile kpɔkɛ kɛ ɔbadea bɛ.
Samoɛle hanle Gyihova edwɛkɛ ne hilele Yilae
Kenle ko nɔɔzo mɔɔ Samoɛle ɛla la, ɔdele kɛ awie ɛlɛfɛlɛ ye: ‘Samoɛle!’ Ɔnriandile ɔhɔle Yilae anwo ɛkɛ ne, na Yilae hanle kɛ: ‘Metɛfɛlɛle wɔ.’ Ɔvɛlɛle ye fane nwiɔ bieko. Mɔɔ tɔ zo nsa la anzi, Yilae hanle hilele Samoɛle kɛ saa ɔfɛlɛ wɔ bieko a ka kɛ: ‘Gyihova, mesɛlɛ wɔ tendɛ, na melɛtie.’ Yemɔti kɛ Samoɛle yɛle la ɛne. Akee Gyihova hanle hilele Samoɛle kɛ: ‘Ka kile Yilae kɛ mebadea ye abusua ne wɔ ɛbɛlatane mɔɔ bɛbɔ la anwo.’ Ɛdwenle kɛ ɛnee ɔnyɛ se kɛ Samoɛle baha edwɛkɛ ɛhye ahile Yilae ɔ?— Kyɛkyɛ, ɛnee ɔyɛ se. Noko ɔnva nwo kɛ ɛnee Samoɛle sulo la, ɔyɛle mɔɔ Gyihova se ɔyɛ la. Mɔɔ Gyihova hanle la rale nu. Bɛhunle Yilae amra mrenya nwiɔ ne, yɛɛ Yilae noko wule.
Samoɛle le neazo kpalɛ maa yɛ. Ɔnwunle kɛ menli ɛlɛbɔ ɛbɛlatane ɛdeɛ, noko ɔyɛle mɔɔ le kpalɛ la. Na ɛdawɔ noko ɛ? Asoo ɛbayɛ kɛ Samoɛle la na wɔahɔ zo wɔayɛ mɔɔ le kpalɛ la? Saa ɛyɛ zɔ a, ɛbamaa Gyihova nee wɔ awovolɛ anye alie.