Ɔmanle Ye Papa Nee Gyihova Anye Liele

Wɔnwu bɛlɛra ne mɔɔ wɔ nvoninli ne anu la ɔ?— Nrenya bie mɔɔ bɛfɛlɛ ye Gyɛfeta la ara ɔ. Baebolo ne ambɔ ye duma angile yɛ, noko yɛze kɛ ɔmanle ye papa nee Gyihova anye liele. Maa yɛzukoa ɔdaye nee ye papa Gyɛfeta anwo debie.

Gyɛfeta le sonlakpalɛ mɔɔ ɔnyianle mekɛ dɔɔnwo ɔhilehilele ɔ ra raalɛ ne Gyihova anwo debie a. Ɛnee ɔ nwo yɛ se yɛɛ ɔdi menli nyunlu ɔmaa bɛyɛ debie. Yemɔti Yizilayɛma hanle kɛ ɔli bɛ nyunlu ɔmaa bɛho bɛtia bɛ kpɔvolɛma.

Gyɛfeta zɛlɛle Nyamenle kɛ ɔboa ye ɔmaa ɔli konim. Gyɛfeta bɔle ɛwɔkɛ kɛ saa ɔdi konim a, awie biala mɔɔ kɛlumua kɛvi ye sua nu ɛkɛ ne kɛvinde kɛ ɔbayia ye la ɔbava yeamaa Gyihova. Sonla ɛhye badɛnla Nyamenle ndanlɛsua ne anu na yeayɛ gyima wɔ ɛkɛ wɔ ye ngoane mekɛ kɔsɔɔti anu. Zɔhane mekɛ ne ɛnee ndanlɛsua ne anu a menli sonle Nyamenle a. Gyɛfeta lile konim wɔ konle ne anu amgba! Mekɛ mɔɔ ɔziale ɔrale sua nu la, ɛze awie mɔɔ lumuale vindele rayiale ye la ɔ?—

Gyɛfeta ara raalɛ ne ɔ! Ɔ ra ala ɛne, noko ɔwɔ kɛ Gyɛfeta maa ɔkɔ. Ɛhye manle ɔlile nyane kpole. Noko, kakye kɛ yebɔ ɛwɔkɛ. Ɔ ra raalɛ ne buale ye kɛ: ‘Egya, saa wɔbɔ Gyihova ɛwɔkɛ a ɛnee fa me yɛ mɔɔ ɛhanle la.’

Gyɛfeta ara raalɛ ne noko lile nyane. Wɔ ndanlɛsua ne anu, ɔnrɛgya yɛɛ ɔnrɛwo mralɛ. Noko ɛnee ɔkulo kɛ ɔdi ye papa ɛwɔkɛ ne azo na ɔmaa Gyihova anye die. Ɛnee yemɔ anwo hyia ye tɛla kɛ ɔbahɔ agyalɛ anzɛɛ ɔbawo mralɛ la. Yemɔti ɔvile sua nu na ɔhɔdɛnlanle ndanlɛsua ne anu wɔ ye ngoane mekɛ kɔsɔɔti anu.

Ɛsuzu kɛ mɔɔ ɔyɛle la manle ye papa nee Gyihova anye liele ɔ?— Ɛhɛe, ɔmanle bɛ nye liele! Saa ɛyɛ tieyɛ na ɛkulo Gyihova a, ɛbayɛ kɛ Gyɛfeta ara raalɛ ne la. Ɛdawɔ noko ɛbamaa wɔ awovolɛ nee Gyihova anye alie kpole.