ƐZUKOALƐDEƐ 15
Duzu Ati A Ɔwɔ Kɛ Ɛkɔ Zo Ɛsukoa A?
1. Kɛzi ɛkɔ zo ɛsukoa Baebolo ne a ɔbaboa wɔ ɛ?
Ɔda ali kɛ Baebolo mɔlebɛbo ngilehilelɛ ɛhye mɔɔ yɛzuzu nwolɛ la ɛmaa Gyihova anwo ɛlɔlɛ mɔɔ ɛlɛ la anu ɛmia. Ɔwɔ kɛ yɛbɔ mɔdenle yɛmaa ɛlɔlɛ ɛhye kɔ zo yɛ kpole. (1 Pita 2:2) Saa ɛsukoa Nyamenle Edwɛkɛ ne na ɛbikye ye kpalɛ a, ɛbanyia dahuu ngoane.—Kenga Dwɔn 17:3; Dwuudu 21.
Mekɛ mɔɔ ɛlɛnyia Nyamenle anwo ndelebɛbo kpole la, wɔ diedi ne anu bayɛ se. Diedi baboa wɔ yeamaa wɔayɛ mɔɔ sɔ Nyamenle anye la. (Hibuluma 11:1, 6) Ɔbamaa wɔanlu ɛ nwo na wɔayɛ nzenzaleɛ mɔɔ fɛta la wɔ wɔ ɛbɛlabɔlɛ nu. —Kenga Gyima ne 3:19.
2. Kɛzi Nyamenle anwo ndelebɛbo mɔɔ ɛlɛ la baboa awie mɔ ɛ?
Ɛ nee Gyihova banyia agɔnwolɛvalɛ titili
Ɛbahulo kɛ ɛbaha mɔɔ wɔzukoa la wɔahile awie mɔ—yɛ muala yɛ nye die kɛ yɛbaha edwɛkɛ kpalɛ yɛahile awie mɔ. Mɔɔ ɛlɛkɔ zo wɔazukoa Baebolo ne la, ɛbanwu kɛzi ɛbava Baebolo ne wɔahilehile Gyihova anu diedi mɔɔ ɛlɛ nee edwɛkpa ne anu la.—Kenga Wulomuma 10:13-15.
Menli dɔɔnwo bɔ ɔ bo ka edwɛkpa ne kile bɛ gɔnwo mɔ nee bɛ mbusuafoɔ. Dua nrɛlɛbɛ adenle zo yɛ zɔ. Mmaka kɛ bɛ ɛzonlenlɛ ne ɛnle kpalɛ, emomu ka Nyamenle ɛwɔkɛ ne mɔ anwo edwɛkɛ kile bɛ. Eza kakye kɛ menli nye ta die wɔ nyɛleɛ kpalɛ nwo tɛla mɔɔ ɛka la.—Kenga 2 Timote 2:24, 25.
3. Agɔnwolɛvalɛ boni a ɛ nee Nyamenle banyia a?
Saa ɛsukoa Nyamenle Edwɛkɛ ne a ɔbamaa wɔanyi sunsum nu. Akee ɛ nee Gyihova banyia agɔnwolɛvalɛ titili. Ɛbahola wɔayɛ ye ɛdeɛ na wɔaboka ye abusua ne anwo. —Kenga 2 Kɔlentema 6:18.
4. Kɛ ɔkɛyɛ na wɔahɔ zo wɔanyia anyuhɔlɛ ɛ?
Saa ɛkɔ zo ɛsukoa Nyamenle Edwɛkɛ ne a ɛbanyia anyuhɔlɛ wɔ sunsum nu. (Hibuluma 5:13, 14) Ka kile Gyihova Alasevolɛ ne mɔ anu ko kɛ ɔlua Duzu A Baebolo Ne Kola Kilehile Yɛ A? buluku ne azo ɔ nee wɔ ɛzukoa Baebolo ne. Saa ɛkɔ zo ɛsukoa Nyamenle Edwɛkɛ ne a wɔ ɛbɛlabɔlɛ bawie wɔ boɛ. —Kenga Edwɛne 1:1-3; 73:27, 28.
Edwɛkpa ne vi Gyihova, anyelielɛ Nyamenle ne ɛkɛ. Saa ɛbikye Nyamenle menli ne a ɛbahola wɔabikye ye. (Hibuluma 10:24, 25) Saa ɛbɔ mɔdenle ɛyɛ mɔɔ sɔ Gyihova anye a, ɛbanyia nɔhalɛ ngoane ne—dahuu ngoane. Nyamenle mɔɔ ɛbabikye ye la a le debie kpalɛ mɔɔ ɔwɔ kɛ ɛyɛ a. —Kenga 1 Timote 1:11; 6:19.