Kɛzi Yɛkola Yɛboa Yɛmaa Bɛsiezie Belemgbunlililɛ Asalo Ɛkɛ Ɛ?

Nyamenle duma nwuanzanwuanza ne la Gyihova Alasevolɛ Belemgbunlililɛ Asalo biala azo. Ɛhye ati, yɛte nganeɛ kɛ saa yɛboa yɛmaa sua ne anwo te, ɔyɛ kɛnlɛma mɔɔ debie ɛtɛsɛkyele wɔ nwolɛ a, ɔle enililɛ nee yɛ ɛzonlenlɛ nwuanzanwuanza ne foa mɔɔ hyia a. Awie biala bahola aboa.

Bɛkpɔne debiezukoalɛ a tu ɛ nwo maa siezie ɛkɛ. Bɛkpɔne debiezukoalɛ biala a, mediema mrenyia nee mraalɛ fa anyelielɛ siezie Belemgbunlililɛ Asalo ɛkɛ. Bɛye kenle ko wɔ dapɛne ne anu bɛfa bɛsiezie ɛkɛ ne kpalɛ. Kpanyinli anzɛɛ sonvolɛ nea gyima ne azo, na ɔkile ninyɛne mɔɔ ɔwɔ kɛ bɛyɛ la. Bɛnea gyima mɔɔ wɔ ɛkɛ ne la anwo na bɛtu bɛ nwo bɛmaa bɛkpoa ɛkɛ, bɛkpuda na bɛkyikyi azɛlɛ ne anwo, bɛkyikyi mbia nwo, bɛsiezie bɛ boɛ, bɛsiezie abialeɛ ne na bɛfa ayile bɛgua ɛkɛ, bɛkpuda nvɛnzɛlɛ nee neanleɛ nu, bɛfuandi ewula bɛgua, anzɛɛ bɛsiezie nwolɛ nee alienwo ɛkɛ. Ɛvolɛ biala, bɛye kenle ko bɛsie ɛkɛ bɛfa bɛyɛ gyima dɔɔnwo wɔ ɛkɛ. Saa yɛmaa yɛ mra yɛ bie a, ɔmaa bɛnyia ɛbulɛ bɛmaa ɛleka mɔɔ yɛsonle la.​—Nolobɔvo 5:1.

Boa maa bɛyɛ debie biala mɔɔ ɛzɛkye la boɛ. Ɛvolɛ biala, bɛneɛnlea Belemgbunlililɛ Asalo ne anu nee nwolɛ kpalɛ. Bɛneɛnlea nwolɛ bɛwie a, bɛyɛ ngyehyɛleɛ bɛsiezie ɛkɛ na bɛyɛ sua ne boɛ, amaa bɛambɔ kakɛ mgbane. (2 Edwɛkɛsisilɛ 24:13; 34:10) Belemgbunlililɛ Asalo mɔɔ nwolɛ le bɔkɔbɔkɔ na bɛsiezie nwolɛ kɛnlɛma la le ɛleka mɔɔ fɛta kɛ yɛsonle yɛ Nyamenle ne a. Saa yɛyɛ gyima ɛhye bie a, yɛfa yɛkile kɛzi yɛlɛ Gyihova nee ɛleka mɔɔ yɛsonle la anwo ɛlɔlɛ la. (Edwɛne 122:1) Ɛhye noko maa bɛbɔ yɛ duma kpalɛ wɔ ɛleka mɔɔ yɛwɔ la.​—2 Kɔlentema 6:3.

• Duzu ati a ɔnle kɛ yɛbu yɛ nye yɛgua ɛleka mɔɔ yɛsonle la azo a?

• Ngyehyɛleɛ boni a bɛfa bɛsiezie Belemgbunlililɛ Asalo ɛkɛ a?