Akɛlɛ Nɔhavo Nee Badwema Ne A Le Nwane?

Ɔka ekyii Gyisɛse wu la, ɔ nee ye ɛdoavolɛma nna​—Pita, Gyemise, Dwɔn nee Andelu hɔle ahane na bɛlile adwelie. Mɔɔ Gyisɛse ɛlɛkile ye ɛralɛ wɔ awieleɛ mekɛ ne anu anwo sɛkɛlɛneɛ ne anu la, ɔbizale kpuya ɛhye mɔɔ anwo hyia la: “Nwane a le akɛlɛ nɔhavo nee badwema ne mɔɔ ɔ menle ɛkpa ye kɛ ɔnlea ye sonvolɛma anwo zo na ɔmaa bɛ aleɛ wɔ mekɛ kpalɛ nu la?” (Mateyu 24:3, 45; Maake 13:3, 4) Ɛnee Gyisɛse ɛlɛmaa ye ɛdoavolɛma ne anwosesebɛ kɛ, kɛmɔ ɔle bɛ “menle” la ati, ɔbakpa menli mɔɔ bava sunsum nu aleɛ amaa ye ɛdoavolɛma wɔ awieleɛ mekɛ ne anu la. Nwane mɔ a bayɛ akɛlɛ ɛhye a?

Ɔle Gyisɛse ɛdoavolɛma ekpunli ekyi mɔɔ bɛkpokpa bɛ. Bɛnwu “akɛlɛ” ne kɛ yemɔ a le Gyihova Alasevolɛ Neazo Eku ne. Ɔfa sunsum nu aleɛ ɔmaa Gyihova azonvolɛ wɔ ye mekɛ nloa. Yɛ nye la kɛ akɛlɛ nɔhavo ɛhye bamaa yɛ “aleɛ wɔ mekɛ kpalɛ nu.”​—Luku 12:42.

Ɔnea Nyamenle sua nu ninyɛne zo. (1 Timote 3:15) Gyisɛse vale gyima kpole mɔɔ le Gyihova azɛlɛ ye azo ahyehyɛdeɛ ne anwo gyimalilɛ la wulale akɛlɛ ne asa anu​—kɛ bɛnlea ye ninyɛne zo, bɛhile edwɛkɛhanlɛ gyima ne adenle na bɛlua asafo ne azo bɛhilehile yɛ. Ɛhye ati, amaa yɛanyia mɔɔ yɛhyia nwo la wɔ ye mekɛ nloa la, “akɛlɛ nɔhavo nee badwema ne” ɛlɛdua mbuluku mɔɔ yɛfa yɛdi gyima wɔ daselɛlilɛ nu nee debiezukoalɛ bo yɛɛ nyianu ngakyile nwo ngyehyɛleɛ mɔɔ bɛyɛ la azo ava sunsum nu aleɛ amaa yɛ.

Akɛlɛ ne fa nɔhalɛlilɛ ka Baebolo ne anu nɔhalɛ ne na ɔbɔ edwɛkpa ne nolo yɛɛ ɔle badwema ɔluakɛ ɔfi nrɛlɛbɛ nu ɔnea Kelaese ninyɛne mɔɔ wɔ azɛlɛ ye azo la azo kpalɛ. (Gyima ne 10:42) Gyihova ɛlɛmaa ye gyima ne anyia anyuhɔlɛ, na ɔlɛfa sunsum nu ninyɛne dɔɔnwo yeamaa.​—Ayezaya 60:22; 65:13.

• Nwane a Gyisɛse kpale ye kɛ ɔmaa ye ɛdoavolɛma sunsum nu aleɛ a?

• Ndenle boni azo a akɛlɛ ne le nɔhavo nee badwema a?