Kɛzi Yɛyɛ Yɛ Debiezukoalɛ Ne Mɔ Ɛ?

Ɛnee alimoa Kilisienema ne yia nu to edwɛne, yɛ asɔne, kenga Ngɛlɛlera ne na bɛsuzu nwolɛ, na ɛnee bɛnva amaamuo biala bɛmboka nwo. (1 Kɔlentema 14:26) Deɛ ko ne ala a ɛbanwu ye wɔ yɛ debiezukoalɛ ne mɔ abo a.

Ngilehilelɛ ne gyi Baebolo ne azo yɛɛ ɔboa. Wɔ dapɛne awieleɛ, asafo biala yia nu na bɛtie mitini 30 Baebolo ɛdendɛlɛ mɔɔ kile kɛzi Ngɛlɛlera ne ka yɛ ɛbɛlabɔlɛ na ɔka mekɛ mɔɔ yɛde nu anwo edwɛkɛ la. Bɛmaa yɛ muala yɛbuke yɛ Baebolo ne na yɛdi ɔ nzi. Bɛmaa ɛdendɛlɛ ne bɛwie a, bɛfa dɔnehwele ko bɛyɛ “Ɛzinzalɛ Arane” Ɛzukoalɛ ne, na bɛmaa asafo ne anu amra ka Ɛzinzalɛ Arane ne mɔɔ bɛlɛsukoa la anwo edwɛkɛ. Edwɛkɛ ɛhye mɔɔ yɛsuzu nwolɛ la boa maa yɛfa Baebolo ne anu adehilelɛ yɛbɔ yɛ ɛbɛla. Bɛsukoa edwɛkɛ ko ne ala wɔ yɛ asafo mɔɔ bo 120,000 la ne mɔ ko biala anu wɔ ewiade amuala.

Bɛboa yɛ bɛmaa yɛkilehile kpalɛ. Eza yɛyia nu nɔsolɛ nu wɔ dapɛne ne avinli yɛyɛ debiezukoalɛ mɔɔ wɔ nu nsa mɔɔ bɛfɛlɛ ye Yɛ Kilisiene Ɛbɛlabɔlɛ Nee Yɛ Ɛzonlenlɛ mɔɔ gyi siane ne anu edwɛkɛ mɔɔ wɔ Yɛ Ɛbɛlabɔlɛ Nee Yɛ Ɛzonlenlɛ Nyianu Buluku ne anu azo la. Debiezukoalɛ ne foa mɔɔ limoa, Nyamenle Edwɛkɛ Ne Azo Nvasoɛ ne, boa yɛ maa yɛnwu Baebolo ne foa bie mɔɔ asafo ne ɛlimoa ɛgenga la anu edwɛkɛ kpalɛ. Mɔɔ doa ye la a le Yɛ Daselɛlilɛ Gyima Ne Kpalɛ, na kɛzi yɛ nee awie mɔ bazukoa Baebolo ne la anwo yɛkile wɔ nu. Folɛtuvolɛ bie maa yɛnwu ninyɛne mɔɔ ɔbaboa yɛ yeamaa yɛanyia anyuhɔlɛ wɔ ɛgengalɛ nee ɛdendɛlɛ nu la. (1 Timote 4:13) Foa mɔɔ li awieleɛ, Yɛ Kilisiene Ɛbɛlabɔlɛ ne, maa yɛnwu kɛzi yɛbava Baebolo ngyinlazo yɛabɔ yɛ ɛbɛla alehyenlɛ biala la. Foa ɛhye le kpuya nee mualɛ mɔɔ maa yɛte Baebolo ne abo kpalɛ a.

Saa ɛkɔ yɛ debiezukoalɛ ne mɔ bie a, ɔda ali kɛ ɛ nye balie Baebolo nu ngilehilelɛ kpalɛ mɔɔ ɛbanyia la anwo.​—Ayezaya 54:13.

• Duzu a ɛ nye la kɛ ɛbade ye wɔ Gyihova Alasevolɛ debiezukoalɛ bo a?

• Yɛ dapɛne biala debiezukoalɛ ne boni a ɛkulo kɛ ɛkɔ bie a?